"უპოვარი", რომელიც "შორეული ქალაქის" დედოფალი გახდა: როგორია გონჯა ჯილასუნის ცხოვრება სასტიკი გმირის მიღმა - "არასოდეს ეხება შვილების თემას"
თურქი მსახიობი გონჯა ჯილასუნი, ისევე როგორც ბევრი მისი კოლეგა, კინოკარიერაზე ადრეული ბავშვობიდან ოცნებობდა. თუმცა, ოცნების რეალობად ქცევა მან მხოლოდ ზრდასრულ ასაკში შეძლო. მისი ცხოვრების გზა ღრმა სიღარიბიდან კინოს სამყაროს მწვერვალებამდე ნამდვილი შთაგონებაა მსახიობობაზე მეოცნებე ადამიანებისთვის.
ბავშვობა სიღარიბეში და განათლებისკენ სწრაფვა
გონჯა ჯილასუნი დაიბადა 1966 წლის 9 მაისს თურქეთის ქალაქ აქჰისარში მრავალშვილიან ოჯახში. ის ოჯახში მეხუთე შვილი იყო, მოგვიანებით კიდევ ერთი უმცროსი და შეემატა. გონჯა იხსენებს, რომ მისი ოჯახი „თაგვივით ღარიბი“ იყო. მშობლებს ძალიან ბევრი შრომა უწევდათ ოჯახის გამოსაკვებად.
მიუხედავად მძიმე მატერიალური მდგომარეობისა, მომავალი ვარსკვლავი ადრეული ასაკიდანვე დაინტერესდა თეატრითა და კინემატოგრაფით. თუმცა, იცოდა, რომ ოჯახში არსებული ფინანსური პრობლემების გამო სასურველ განათლებას ვერ მიიღებდა. უფროს კლასებში გონჯა აქტიურად მონაწილეობდა სკოლის სპექტაკლებში.
ატესტატის მიღების შემდეგ, იგი ჰაჯეტეპეს უნივერსიტეტის საკონსულტაციო ფაკულტეტზე ჩააბარა, პარალელურად კი ისტორიასა და გეოგრაფიას სწავლობდა. დიპლომის აღების შემდეგ, გონჯამ გადაწყვიტა ბავშვობის ოცნება აესრულებინა და ანკარის უნივერსიტეტის სამსახიობო ფაკულტეტის სტუდენტი გახდა.
რთული გზა პროფესიისკენ: მუშაობა და დამოუკიდებლობა
საკუთარი თავის უზრუნველსაყოფად და სწავლის საფასურის გადასახდელად, გონჯამ მუშაობა დაიწყო. თავდაპირველად კონსულტანტად, შემდეგ რადიოსადგურზე გადავიდა, საიდანაც ტელევიზიაში მოხვდა.
„მე ახალი ამბების წამყვანად ვმუშაობდი. ეს იმდენად ამაღელვებელი იყო. ეს სულაც არ ჰგავს სატელევიზიო სერიალების ინდუსტრიას“, - იხსენებდა მსახიობი იმ პერიოდს. ტელევიზიასა და რადიოში მუშაობის გამოცდილება დაეხმარა მას კამერასთან ურთიერთობისა და საზოგადოებასთან კომუნიკაციის უნარების დახვეწაში, რაც მოგვიანებით სამსახიობო კარიერაში გამოადგა.
მსახიობი აღნიშნავს, რომ სწორედ ამ მძიმე შრომის წლებმა გამოაწრთო და დამოუკიდებლობა შეაძინა. იგი ყოველთვის ამაყობდა იმით, რომ საკუთარი ოცნებისკენ მიმავალ გზაზე არაფერს დახარბებია და ყველაფერს თავისი შრომით მიაღწია.
კინო-დებიუტი და პოპულარობის ზრდა
გონჯა ჯილასუნის დებიუტი კინემატოგრაფიაში საკმაოდ გვიან, 2010 წელს შედგა, 44 წლის ასაკში. პირველი როლი მან სერიალში „უკანა რიგში მყოფნი“ მიიღო. ამას მოჰყვა როლები სხვა მრავალსერიან ფილმებში, როგორებიცაა „თევზები, რომლებსაც წყალი მობეზრდათ“ და „იმედი ჯერ კიდევ მაქვს“.
პირველი დიდი პოპულარობა მას სერიალში "შავი ყვავილი“ შესრულებულმა ფიქრიეს როლმა მოუტანა, რომელიც 2013 წლიდან 2016 წლამდე გადიოდა. თუმცა, 2018 წლამდე გონჯა ძირითადად მცირე, მეორეხარისხოვანი როლებით კმაყოფილდებოდა. მსახიობის თქმით, ეს მისთვის პრობლემას არ წარმოადგენდა – ჯილასუნს მოსწონდა გადაღების პროცესი და თითქმის ყველა როლზე თანხმდებოდა, რაც მას საშუალებას აძლევდა, დაეხვეწა თავისი ოსტატობა და ინდუსტრიაში გამოცდილება მიეღო.
გარღვევა და საკვანძო როლები
მისი კარიერა რადიკალურად შეიცვალა 2018 წელს, როდესაც მიიღო მიწვევა სერიალში „შეჯახება“, სადაც სერპილ ქორქმაზის როლი შეასრულა. ამას მოჰყვა მონაწილეობა ისეთ პროექტებში, როგორებიცაა „გიულიზარი“ (სადაც მუაზეზის როლი შეასრულა) და „ელჩის ქალიშვილი“, რომელშიც მან ჰალისე ეფეოღლუს ძლიერი და დომინანტი პერსონაჟი შექმნა და კიდევ უფრო დაიმკვიდრა თავისი ადგილი მაყურებლის გულში.
2021 წელს გონჯა ჯილასუნი პირველად მონაწილეობს ისტორიულ პროექტში - სერიალში „ბარბაროსები: ხმელთაშუა ზღვის მახვილი“, სადაც ხუმას სახე განასახიერა.
2023 წელს მან ითამაშა სერიალში „ცეცხლოვანი ფრინველები“, ხოლო ერთი წლის შემდეგ მიიღო მიწვევა სერიალში „შორეული ქალაქი“, რომელიც მის კარიერაში განსაკუთრებული მნიშვნელობის გახდა.
"შორეული ქალაქი" და პრინციპული სადაქათი
საინტერესოა, რომ გონჯა თავდაპირველად უარს ამბობდა "შორეულ ქალაქში“ მონაწილეობაზე.
"კიდევ ერთი მელოდრამა - არ მინდა, დავიღალე. მაგრამ სცენარის გულდასმით შესწავლისა და კარგად დაფიქრების შემდეგ, ბოლოს დავთანხმდი და არასდროს მინანია. მივხვდი, რომ სადაქათი ბოროტი კი არა, მკაცრი, დისციპლინირებული და ჩემგან ძალიან განსხვავებული პერსონაჟი იყო. ეს მომეწონა კიდეც“, - ამბობდა მსახიობი თავის გმირზე.
სადაქათ ალბორას როლი ამ სერიალში მსახიობს კიდევ უფრო მეტ პოპულარობას მოუტანს. ჯილასუნმა შეძლო, განესახიერებინა არა მხოლოდ ტიპური ბოროტმოქმედი, არამედ ძლიერი ქალი, რომლის სიმკაცრეც რთული ცხოვრებისეული გამოცდილებითაა განპირობებული. მისმა დამაჯერებელმა შესრულებამ მაყურებელს ახალი რაკურსით დაანახა "დედოფლის" პერსონაჟი.
დღეისათვის, გონჯა ჯილასუნის ფილმოგრაფია 16-ზე მეტ კინო და სატელევიზიო პროექტს მოიცავს.
პირადი ცხოვრება: ზღაპარი კონკიასა და პრინცზე
გონჯა ჯილასუნი პირველად ანკარის უნივერსიტეტში სწავლის დროს დაქორწინდა თანაკურსელზე. მათ ერთობლივად გახსნეს ივენთ-სააგენტო. მიუხედავად იმისა, რომ ჯილასუნმა მთელი ძალები ოჯახური ბიზნესის განვითარებას შეალია, მტკიცე ქორწინების შექმნა ვერ მოახერხა. რამდენიმე წლის შემდეგ წყვილი განქორწინდა.
ვარსკვლავის მეორე რჩეული გახდა მუსიკოსი და კომპოზიტორი ენგინ ჰიზარჯი. ისინი 1998 წელს დაქორწინდნენ და მას შემდეგ ბედნიერ ქორწინებაში არიან.
გონჯა არ მალავს, რომ ჰიზარჯისთან ქორწინებას "ზეციურ საჩუქრად" მიიჩნევს. ერთ-ერთ ინტერვიუში მსახიობმა აღიარა, რომ ის ნამდვილი კონკიაა ზღაპრიდან: მან შეძლო სიღარიბიდან თავის დაღწევა და "პრინცის" პოვნა. წყვილს შვილები არ ჰყავს, ყოველ შემთხვევაში, ღია წყაროებში მათ შესახებ ინფორმაცია არ მოიპოვება, ხოლო თავად ვარსკვლავი არასოდეს ეხება შვილების თემას ინტერვიუებში.
გონჯა ჯილასუნი დღეს
ამჟამად თურქი მსახიობი აგრძელებს გადაღებებს პოპულარულ სერიალში "შორეული ქალაქი“. პროექტის მეორე სეზონი ეთერში 15 სექტემბერს დაბრუნდა. მისი პერსონაჟი სადაქათი კვლავაც რჩება სერიალის ერთ-ერთ ყველაზე საინტერესო და დამაინტრიგებელ ფიგურად.
ჯილასუნი აქტიურ ცხოვრების წესს ამჯობინებს: ის ბევრს მოგზაურობს, დადის დაივინგზე და ცხენოსნობაზე, უყვარს კითხვა, შესანიშნავად ფარიკაობს და სროლა ეხერხება, იცის შელესვა, კერვა და ქსოვა. მისი მთელი ცხოვრება ერთ პრინციპზეა აგებული: "ჩვენ მხოლოდ ერთი სიცოცხლე გვაქვს - რატომ არ უნდა ვიცხოვროთ ის სრულად?“
გონჯა ჯილასუნის გზა სიღარიბეში დაბადებიდან თურქული კინოს დედოფლობამდე ნათელი მაგალითია იმისა, რომ შრომა, შეუპოვრობა და ოცნების რწმენა ყოველთვის აისახება რეალობაში, განურჩევლად იმისა, თუ როდის დაიწყებ შენს დიდ კარიერას - ახალგაზრდობაში თუ ზრდასრულ ასაკში. მისი გამორჩეული ნიჭი და ეკრანული ქარიზმა მას თურქული კინემატოგრაფიის ერთ-ერთ ყველაზე მნიშვნელოვან და დასამახსოვრებელ ფიგურად აქცევს.
წაიკითხეთ ასევე: