"რუსეთი ქაოსის ექსპორტს ეწევა და პუტინი არ გაჩერდება“ - ბრიტანეთის დაზვერვის უფროსის, ბლეიზ მეტრეველის იშვიათი საჯარო განცხადება
მედიაში ქვეყნდება ბრიტანული დაზვერვის სამსახურის, MI6-ის ხელმძღვანელის, ბლეიზ მეტრეველის იშვიათი განცხადება. ეს არის ბლეიზ მეტრეველის პირველი საჯარო გამოსვლა მას შემდეგ, რაც ბრიტანეთის დაზვერვის სამსახურის ხელმძღვანელის პოსტი დაიკავა.
- "რუსეთი ქაოსის ექსპორტს ეწევა და პუტინი არ გაჩერდება“, - განაცხადა მეტრეველმა. მან რუსეთიდან მომავალ "სერიოზულ საფრთხეებზე“ ისაუბრა და აღნიშნა, რომ კრემლი მიზანმიმართულად ცდილობს მსოფლიოში ქაოსის დათესვას.
"ქაოსის ექსპორტი რუსული სტრატეგიაა“, - ამბობს მეტრეველი.
მან განსაკუთრებული ყურადღება დაუთმო ე.წ. ჰიბრიდულ ომს, რომელიც მოიცავს კიბერშეტევებსა და დრონების ფრენას კრიტიკულად მნიშვნელოვან ობიექტებთან. ბრიტანული დაზვერვა ამ ყველაფერში რუსულ სპეცსამსახურებს ადანაშაულებს.
- "რუსეთი მსოფლიოში ქაოსს განზრახ თესავს. ეს მათი პოლიტიკის მთავარი სტილია. ჩვენ უნდა ვიცოდეთ, რომ ეს არ შეწყდება, სანამ პუტინს არ აიძულებენ, თავისი გეგმები შეცვალოს“, - განაცხადა მეტრეველმა.
მისი თქმით, ბრიტანეთი გააგრძელებს პუტინზე ზეწოლას და უკრაინის მხარდაჭერას, რადგან რუსეთის ამჟამინდელი კურსი ევროპული უსაფრთხოებისთვის "მწვავე საფრთხეს“ წარმოადგენს.
აქცენტი ტექნოლოგიებზე
ბლეიზ მეტრეველი პირველი ქალია, რომელიც ბრიტანეთის დაზვერვას ჩაუდგა სათავეში. მან პოსტი მიმდინარე წლის ოქტომბერში დაიკავა. საინტერესოა მისი კარიერული გზა:
- დაზვერვაში მუშაობა 1999 წელს, კემბრიჯის უნივერსიტეტის სტუდენტობისას დაიწყო.
- კარიერის დიდი ნაწილი ახლო აღმოსავლეთსა და ევროპაში გაატარა.
- ხელმძღვანელობდა MI6-ის ტექნოლოგიებისა და ინოვაციების განყოფილებას, რომელსაც პირობითად "Q“-ს უწოდებენ (ჯეიმს ბონდის ფილმების მსგავსად).
მეტრეველი მიიჩნევს, რომ თანამედროვე ჯაშუშისთვის კომპიუტერული კოდის (მაგალითად, Python-ის ენა) ცოდნა ისეთივე აუცილებელია, როგორც უცხო ენების ფლობა. მისი თქმით, ბიომეტრიული სკანირების ეპოქაში, როცა საზღვარზე ყალბი პასპორტით გადასვლა თითქმის შეუძლებელია, დაზვერვამ აქცენტი ციფრულ ტექნოლოგიებზე უნდა გადაიტანოს.