რამდენი წყალი უნდა დავლიოთ დღეში და რატომ არ მუშაობს "8 ჭიქის წესი“?
დღეში რვა ჭიქა წყლის დალევის რეკომენდაცია წლებია საყოველთაოდ აღიარებულ ნორმად ითვლება, თუმცა თანამედროვე მედიცინა ამ მიდგომას კითხვის ნიშნის ქვეშ აყენებს. ექიმებისა და დიეტოლოგების განმარტებით, წყალზე ორგანიზმის მოთხოვნილება გაცილებით კომპლექსურია და ინდივიდუალურ ფაქტორებზეა დამოკიდებული.
-
რატომ არის წყალი სასიცოცხლოდ მნიშვნელოვანი?
როგორც თერაპევტი სვაპნილ პატელი აღნიშნავს, წყალი მონაწილეობს ორგანიზმის თითქმის ყველა ფუნქციაში:
- არეგულირებს სხეულის ტემპერატურას;
- გადააქვს საკვები ნივთიერებები და გამოაქვს ნივთიერებათა ცვლის ნარჩენები;
- უზრუნველყოფს სახსრებისა და ქსოვილების დატენიანებას;
- მხარს უჭერს ტვინის მუშაობას, კოგნიტიურ უნარებსა და განწყობას.
დიეტოლოგ ჯანა დიმარიას თქმით, მსუბუქმა დეჰიდრატაციამაც კი შეიძლება გამოიწვიოს თავის ტკივილი, დაღლილობა, თავბრუსხვევა და ყურადღების კონცენტრაციის დაქვეითება.
-
საიდან გაჩნდა "8 ჭიქის წესი“?
ეს ფორმულა ჯერ კიდევ 1940-იან წლებში აშშ-ის კვების საბჭოს რეკომენდაციებიდან იღებს სათავეს. მაშინ მიიჩნეოდა, რომ ადამიანს ყოველ მიღებულ 2000 კალორიაზე 2 ლიტრი (დაახლოებით 8 ჭიქა) სითხე სჭირდებოდა. თუმცა, დროთა განმავლობაში დაიკარგა მთავარი დეტალი: ამ მოცულობაში იგულისხმებოდა არა მხოლოდ სუფთა წყალი, არამედ საკვებიდან მიღებული სითხეც.
-
რა განსაზღვრავს წყლის რეალურ ნორმას?
სპეციალისტების თქმით, უნივერსალური ციფრი არ არსებობს. საჭირო რაოდენობა დამოკიდებულია:
- ასაკზე, წონასა და სქესზე;
- ფიზიკური აქტივობის დონეზე;
- კლიმატსა და გარემო ტემპერატურაზე;
- ჯანმრთელობის მდგომარეობასა და მედიკამენტების მიღებაზე;
- კვების რაციონზე (მაგალითად, მარილისა და ცილის მაღალ შემცველობაზე).
აშშ-ის მედიცინის ეროვნული აკადემიის თანამედროვე გაიდლაინებით, მამაკაცებისთვის რეკომენდებულია დღეში საშუალოდ 3.7 ლიტრი, ხოლო ქალებისთვის - 2.7 ლიტრი სითხე (ჯამურად, საკვების ჩათვლით).
-
როგორ მივხვდეთ, ვიღებთ თუ არა საკმარის წყალს?
ორგანიზმის ჰიდრატაციის საუკეთესო ინდიკატორი შარდის ფერია:
საკმარისი ჰიდრატაცია: ღია ყვითელი ან გამჭვირვალე ფერი, რეგულარული შარდვა (ყოველ 3-4 საათში).
დეჰიდრატაცია: მუქი ფერის შარდი, იშვიათი შარდვა, პირის სიმშრალე და გაძლიერებული წყურვილის გრძნობა.
პრაქტიკული რჩევები ბალანსის შესანარჩუნებლად:
არ დაივიწყოთ საკვები: სითხის დაახლოებით 20%-ს საკვებიდან ვიღებთ. მიირთვით წყლით მდიდარი პროდუქტები: კიტრი, პომიდორი, საზამთრო, ნესვი და წვნიანები. თუ უბრალო წყლის დალევა გიჭირთ, დაამატეთ ლიმონი, პიტნა ან კენკრა.
აკონტროლეთ ელექტროლიტები: ინტენსიური ვარჯიშისას მხოლოდ წყალი საკმარისი არ არის — ორგანიზმს ნატრიუმი, კალიუმი და მაგნიუმიც სჭირდება.
საინტერესოა, რომ კვლევების თანახმად, რძე ორგანიზმში სითხეს უფრო დიდხანს აკავებს, ვიდრე წყალი, თუმცა ის ძირითად სასმელად არ უნდა იქცეს.
ნუ ეცდებით მკაცრად დაიცვათ "8 ჭიქის" წესი. მოუსმინეთ საკუთარ სხეულს და გაითვალისწინეთ თქვენი ცხოვრების წესი - ეს საუკეთესო გზაა ჯანმრთელობის შესანარჩუნებლად.
იხილეთ ასევე: