80 გარდაცვლილი და 250 საეჭვო შემთხვევა - რამდენად საშიშია ებოლას აფეთქება კონგოს დემოკრატიულ რესპუბლიკაში?
კონგოს დემოკრატიულ რესპუბლიკაში ებოლას ახალი აფეთქება სერიოზულ შეშფოთებას იწვევს. ვირუსი, რომელიც კვირების განმავლობაში შეუმჩნევლად ვრცელდებოდა, განსაკუთრებით სწრაფად ვითარდება. ქვეყნის ამ რეგიონებში შეიარაღებული კონფლიქტი და გადაადგილების შეზღუდული შესაძლებლობა ჯანდაცვის სისტემის ეფექტიან რეაგირებას ძალიან ართულებს.
ჯანდაცვის უწყებების მონაცემებით, ამ ეტაპზე დაფიქსირებულია თითქმის 250 საეჭვო შემთხვევა და დაახლოებით 80 გარდაცვალება. მიუხედავად იმისა, რომ სიტუაცია ჯერ კიდევ შეფასების პროცესშია, სპეციალისტები აღნიშნავენ, რომ რეალური მაჩვენებლები შესაძლოა უფრო მაღალი იყოს.
ჯანდაცვის მსოფლიო ორგანიზაციის (WHO) შეფასებით, მიუხედავად სერიოზულობისა, სიტუაცია არ ნიშნავს გლობალური პანდემიის დაწყებას. ორგანიზაცია ხაზს უსვამს, რომ ებოლას გლობალური რისკი კვლავ დაბალია, თუმცა საჭიროა საერთაშორისო კოორდინირებული რეაგირება.
განსაკუთრებული ყურადღება ეთმობა მეზობელ სახელმწიფოებს — უგანდას, სამხრეთ სუდანსა და რუანდას, სადაც მჭიდრო სავაჭრო და სატრანსპორტო კავშირები ვირუსის გავრცელების რისკს ზრდის. უგანდაში უკვე დაფიქსირდა ორი შემთხვევა, რომელთაგან ერთი ფატალურად დასრულდა.
ექსპერტების თქმით, მიუხედავად იმისა, რომ ებოლა იშვიათი დაავადებაა, მისი სიკვდილიანობის მაჩვენებელი მაღალია - ინფიცირებულთა დაახლოებით მესამედი იღუპება.
-
ბუნდიბუგიოს შტამი - იშვიათი და რთულად სამართავი ვირუსი
ამჟამინდელი აფეთქება დაკავშირებულია ებოლას ბუნდიბუგიოს შტამთან, რომელიც ერთ-ერთ ნაკლებად შესწავლილ ვარიანტად ითვლება. ამ შტამს მხოლოდ ორი დადასტურებული აფეთქება აქვს - 2007 და 2012 წლებში. ორივე შემთხვევაში სიკვდილიანობა დაახლოებით 30%-ს აღწევდა.
სპეციალისტები აღნიშნავენ, რომ ბუნდიბუგიოს წინააღმდეგ ამ ეტაპზე დამტკიცებული ვაქცინები და სპეციფიკური მედიკამენტები არ არსებობს.
-
დაავადების მიმდინარეობა და მკურნალობა
ინფექციის ინკუბაციური პერიოდი ორიდან 21 დღემდე გრძელდება. თავდაპირველად სიმპტომები გრიპს ჰგავს: მაღალი ტემპერატურა, თავის ტკივილი და დაღლილობა. მოგვიანებით ვითარდება ღებინება, დიარეა, ორგანოთა ფუნქციის დარღვევა და ზოგ შემთხვევაში შინაგანი ან გარეგანი სისხლდენა.
სპეციფიკური მკურნალობის არარსებობის გამო, თერაპია ძირითადად დამხმარე ხასიათისაა. ეს არის სითხეების მიწოდება, ტკივილის კონტროლი და მეორადი ინფექციების მართვა. ექიმების თქმით, ადრეული დიაგნოზი მნიშვნელოვნად ზრდის გადარჩენის შანსებს.
მიუხედავად სირთულეებისა, ექსპერტები აღნიშნავენ, რომ კონგოს დემოკრატიულ რესპუბლიკას ებოლასთან ბრძოლის მნიშვნელოვანი გამოცდილება აქვს. ბოლო წლების განმავლობაში ქვეყნის ჯანდაცვის სისტემა გაუმჯობესდა და რეაგირების მექანიზმებიც უფრო ეფექტიანი გახდა.
იხილეთ ასევე: