პაპუნა ლოცულაშვილზე ძალადობისთვის ბრალდებული ერთ-ერთი პოლიციელი 19 წლისაა - მისი ადვოკატის თქმით, "ასეთ ასაკში პატიმრობის გამოყენება მიზანშეწონილი არაა"
პაპუნა ლოცულაშვილის მიმართ განხორციელებულ ძალადობაში ბრალდებული ერთ-ერთი პოლიციელი საბა წაველიძე 19 წლისაა.
სასამართლო პროცესზე, სადაც წაველიძისა და დანარჩენი სამართალდამცავების მიმართ აღკვეთის ღონისძიების შეფარდებაზე მსჯელობენ, პროკურატურა ყველას მიმართ ყველაზე მკაცრი აღკვეთის ღონისძიების პატიმრობის გამოყენებას შუამდგომლობს.
ამ შუამდგომლობას დაცვის მხარე არ ეთანხმება.
პოლიციელ საბა წაველიძის ადვოკატის, ზურა კაპანაძის განმარტებით, მისი დაცვის ქვეშ მყოფი 19 წლისაა. ადვოკატის თქმით, ის გამოძიებასთან მოთხოვნის შესაბამისად, პირველივე დღიდან აქტიურად თანამშრომლობს. კაპანაძის თქმით, ახალგაზრდული ასაკი მხოლოდ ბიოლოგიური გარემოება არაა და 19 წლის პირი რეაბილიტაციის შესაძლებლობის მქონე პირს წარმოადგენს, პატიმრობის გამოყენება ასეთ ასაკში კი მიზანშეწონილი არაა. ადვოკატის თქმით, ბრალდებულს კრიმინალური წარსული არ აქვს და წარსულში რაიმე ძალადობრივი ქმედება არ განუხორციელებია.
კაპანაძის თქმით, აღკვეთის მიზნების მიღწევა შესაძლებელია გირაოს გამოყენებით, შინა პატიმრობით, ელექტრონული სამაჯურით, პოლიციაში გამოცხადების ვალდებულებითაც.
ცნობისთვის, გორში, ე.წ. კომბინატის დასახლებაში სამართალდამცავები ორ პირს - პაპუნა ლოცულაშვილსა და მის მეგობარს ფიზიკურად გაუსწორდნენ.
მომხდართან დაკავშირებით, დაკავებულია 6 სამართალდამცავი. მათ ბრალდება სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით წარედგინებათ, რაც სამსახურებრივი უფლებამოსილების გადამეტებას გულისხმობს, ჩადენილს ძალადობით. აღნიშნული ქმედება სასჯელის სახედ და ზომად 5-დან 8 წლამდე თავისუფლების აღკვეთას ითვალისწინებს.
ამასთან, გამოძიება დაწყებულია პაპუნა ლოცულაშვილის მიმართაც სისხლის სამართლის კოდექსის 353-ე მუხლით, რაც პოლიციელის მიმართ განხორციელებულ ძალადობას გულისხმობს.
წაიკითხეთ ასევე:
- რას ამბობს ჯანდაცვის მინისტრი პოლიციელების მიერ ნაცემი პაპუნა ლოცულაშვილის მდგომარეობაზე
- "პაპუნა ღმუოდა თურმე ამ წამების დროს... მასთან ერთად სცემეს ჩემი შვილი" - პოლიციელების მიერ სასტიკად ნაცემი მეგობრები და ახალი დეტალები გახმაურებულ საქმეზე
- გორში დაკავებული ორი პოლიციელი: ვლადიმერ გოდერძიშვილი და ივანე მისირელი ბრალს აღიარებენ და პატიებას ითხოვენ - დეტალები პროცესიდან