“მიღწეულია იმედისმომცემი პროგრესი“ - აშშ-სა და ირანის მოლაპარაკებები დასრულდა: რაზე შეთანხმდნენ მხარეები?

შვეიცარიის კურორტ ბიურგენშტოკში აშშ-სა და ირანს შორის გამართული მაღალი დონის მოლაპარაკებები, რომლებიც კვირას დაიწყო, ორშაბათს, შუაღამის შემდეგ დასრულდა.

პარალელურად, ახლო აღმოსავლეთში ვითარება კვლავ უკიდურესად დაძაბულია, ხოლო გლობალური ეკონომიკა ილონ მასკის ახალ რეკორდებსა და ენერგეტიკულ ომებს შორის მერყეობს.

• როგორც კატარისა და პაკისტანის ერთობლოვ განცხადებაშია აღნიშნული, ლუცერნის ტბის სამიტი დადებით და კონსტრუქციულ ატმოსფეროში ჩატარდა.

“მიღწეულია იმედისმომცემი პროგრესი, მათ შორის შემდგომი ტექნიკური მოლაპარაკებების მექანიზმის შექმნის კუთხით...

მემორანდუმის საფუძველზე, მხარეები შეთანხმდნენ მაღალი დონის კომიტეტის შექმნაზე, რომელიც უზრუნველყოფს მედიაციაზე პოლიტიკურ ზედამხედველობას. მთავარი მომლაპარაკებლები რეგულარულად წარუდგენენ ანგარიშს მაღალი დონის კომიტეტს და უხელმძღვანელებენ ბირთვულ, სანქციებზე ორიენტირებულ სამუშაო ჯგუფებს, ასევე მონიტორინგისა და დავების გადაწყვეტის ჯგუფს, რათა უზრუნველყონ მემორანდუმის ეფექტური განხორციელება და სხვა საკითხებზე.

მაღალი დონის კომიტეტი 60 დღის ვადაში საბოლოო შეთანხმების მიღწევის საგზაო რუკაზე შეთანხმდა, რაც საფუძველს ჩაუყრის შემდგომი ტექნიკური მოლაპარაკებების დაუყოვნებლივ დაწყებას“, - აღნიშნულია განცხადებაში.

გარდა ამისა, მხარეებს შორის შეიქმნა საკომუნიკაციო ხაზი ურთიერთგაგების მემორანდუმის მე-5 პუნქტში მითითებული პერიოდისთვის, რათა თავიდან იქნას აცილებული ინციდენტები და არასწორი კომუნიკაცია კომერციული გემების ჰორმუზის სრუტეში უსაფრთხო გავლის მიზნით.

მხარეები ასევე შეთანხმდნენ მხარეებსა და ლიბანის რესპუბლიკას შორის, მედიატორების ხელშეწყობით, კონფლიქტის მოგვარების უჯრედის შექმნაზე, ლიბანში სამხედრო ოპერაციების შეწყვეტის უზრუნველყოფის მიზნით.

• ისტორიული შანსი თუ მორიგი ჩიხი?

კატარისა და პაკისტანის შუამავლობით გამართულ შეხვედრაზე მხარეებმა “დამაიმედებელ პროგრესს“ მიაღწიეს. სპეციალურად შექმნილმა “მაღალი დონის კომიტეტმა“ შეათანხმა 60-დღიანი “საგზაო რუკა“, რომელიც საბოლოო სამშვიდობო შეთანხმების გაფორმებას ითვალისწინებს.

აშშ-ს მოლაპარაკებებზე ვიცე-პრეზიდენტი ჯეი დი ვენსი და დონალდ ტრამპის ნდობით აღჭურვილი პირები - ჯარედ კუშნერი და სტივ უიტკოფი წარმოადგენდნენ. ირანული დელეგაციის შემადგენლობაში კი პარლამენტის სპიკერი მოჰამად-ბაგერ გალიბაფი და საგარეო საქმეთა მინისტრი აბას არაღჩი იყვნენ. ვენსის განცხადებით, მთავარი მიზანი ბირთვული პრობლემის მოგვარება და ლიბანში ცეცხლის შეწყვეტაა.

• ტრამპის ულტიმატუმი და ორმუზის სრუტის ირგვლივ ატეხილი სკანდალი

მიუხედავად დიპლომატიური ძალისხმევისა, პრეზიდენტი დონალდ ტრამპი სოციალურ ქსელ Truth Social-ში კვლავ მკაცრი რიტორიკით გამოირჩევა:

“ირანმა დაუყოვნებლივ უნდა აიძულოს თავისი მაღალანაზღაურებადი პროქსი-ჯგუფები ლიბანში, შეწყვიტონ არეულობა. თუ ამას არ გააკეთებენ, ჩვენ კვლავ მივაყენებთ ირანს ძალიან ძლიერ დარტყმას, ისევე როგორც გასულ კვირას, ოღონდ კიდევ უფრო ძლიერს!!!“- წერს ტრამპი.

• სისხლიანი შეტაკებები ლიბანში და 20 დაღუპული მშვიდობიანი მოქალაქე

სანამ შვეიცარიაში დიპლომატები საუბრობდნენ, ლიბანში ცეცხლის შეწყვეტის შეთანხმება დაირღვა. ისრაელმა და “ჰეზბოლამ“ დარტყმები გაცვალეს. ლიბანის ხელისუფლების ცნობით, ისრაელის ავიაიერიშებს შაბათს სულ მცირე 20 მშვიდობიანი მოქალაქე ემსხვერპლა.

ისრაელი აცხადებს, რომ მხოლოდ “ჰეზბოლას“ პოზიციებს უტევს, საიდანაც მათ მიმართულებით 50-ზე მეტი რაკეტა გაუშვეს.

წყარო

იხილეთ ასევე:

• ირანის დელეგაციამ შვეიცარიაში მიმდინარე მოლაპარაკებები ტრამპის განცხადებების შემდეგ, პროტესტის ნიშნად დატოვა - დეტალები
• “აშშ-ს ახლო აღმოსავლეთის გარდაქმნა სურს“ - ვენსის თქმით, აშშ ირანში “ხედავს მომავალს, სადაც კეთილდღეობისთვის მუშაობა ყველას შეუძლია“: მოლაპარაკებების დეტალები