აშშ-მ ირანის ნავთობზე სანქციები შეაჩერა - ირანი კი ატომურ ობიექტებზე ინსპექტორების დაშვებას უარყოფს: რა იქნება შემდეგ?
აშშ-ს ადმინისტრაციამ ათწლეულების განმავლობაში მოქმედი მკაცრი აკრძალვების შემდეგ, ირანულ ნავთობზე სანქციები 60 დღით შეაჩერა. მიუხედავად ვაშინგტონის განცხადებისა, რომ ეს ნაბიჯი თეირანის მხრიდან ატომურ ობიექტებზე ინსპექტორების დაშვების სანაცვლოდ გადაიდგა, ირანი შეთანხმებას კატეგორიულად უარყოფს.
-
60-დღიანი “ფანჯარა“ ირანული ნავთობისთვის
აშშ-ს ფინანსთა სამინისტრომ გამოსცა სპეციალური ლიცენზია, რომელიც 21 აგვისტომდე ირანული ნავთობითა და ნავთობპროდუქტებით დოლარში ვაჭრობის ნებას იძლევა. დოკუმენტი ითვალისწინებს საბანკო მომსახურებასა და დაზღვევას ნავთობქიმიური პროდუქციის წარმოების, გადაზიდვისა და ვაჭრობისთვის. ეს ნიშნავს, რომ ირანს აღარ დასჭირდება შუამავლების რთული ჯაჭვი და ნავთობის იმპორტი ირანიდან პირდაპირ აშშ-შიც კი ხდება შესაძლებელი.
- აღნიშნული ნაბიჯი 17 აგვისტოს ხელმოწერილი ურთიერთგაგების მემორანდუმის ნაწილია, რომლითაც ვაშინგტონმა ირანზე დაწესებული ყველა ტიპის სანქციის გაუქმების ვალდებულება აიღო. ტრამპის ადმინისტრაციის მხრიდან სანქციების შეჩერება სწორედ ამ ვალდებულების შესრულების პირველი ეტაპია.
ვაშინგტონის პირობა და თეირანის უარი
აშშ-ს ფინანსთა მინისტრის, სკოტ ბესენტის განცხადებით, სანაცვლოდ ირანმა აიღო ვალდებულება, რომ არ გადაკეტავს ჰორმუზის სრუტეს და საკუთარ ბირთვულ ობიექტებზე ატომური ენერგიის საერთაშორისო სააგენტოს (IAEA) ინსპექტორებს დაუშვებს. ვიცე-პრეზიდენტმა ჯეი დი ვენსმა აღნიშნა, რომ ინსპექტორების დაბრუნების პროცესი მიმდინარე კვირაშივე დაიწყება.
თუმცა, ოფიციალური თეირანი ამ ინფორმაციას არ ადასტურებს. ირანის საგარეო უწყების განცხადებით, კვირას გამართულ მოლაპარაკებებზე ქვეყანას ახალი ვალდებულებები არ აუღია და ბირთვული პროგრამის საკითხი მხოლოდ საბოლოო შეთანხმების საგანია. საგარეო საქმეთა სამინისტროს წარმომადგენელმა, ესმაილ ბაგაიმ დასძინა, რომ IAEA-სთან თანამშრომლობა მხოლოდ დადგენილი პროცედურების ფარგლებში გაგრძელდება.
შეგახსენებთ, რომ ინსპექტორებმა ირანი მას შემდეგ დატოვეს, რაც გასულ ზაფხულს, 12-დღიანი ომის დროს, აშშ-მ და ისრაელმა მათ ობიექტებზე დარტყმები განახორციელეს.
იხილეთ ასევე:
- “მიღწეულია იმედისმომცემი პროგრესი“ - აშშ-სა და ირანის მოლაპარაკებები დასრულდა: რაზე შეთანხმდნენ მხარეები?
- “ირანის ნავთობზე დაწესებული სანქციები მოიხსნა და გაყინული აქტივების ნაწილი გათავისუფლდა“ - აბას არაღჩი