მექსიკის პოლიცია ეძებს ადგილობრივ “ბეტმენს“, რომელიც მოტოციკლების ქურდებს იჭერს, ბოძებზე აკრავს და სახეზე წარწერებს უტოვებს - უცნაური ამბის დეტალები
მექსიკის შტატ ხალისკოში ნამდვილი “კომიქსების გმირი“ გაცოცხლდა. პოლიცია ინტენსიურად ეძებს მამაკაცს, რომელსაც ადგილობრივებმა “ბეტმენი“ შეარქვეს.
იდუმალ შურისმაძიებელს მოტოციკლების ქურდებზე ნამდვილი ნადირობა აქვს გამოცხადებული - ის მათ იჭერს, ქუჩებში ლამპიონების ბოძებზე აკრავს, პირს უკრავს და სახეზე წარწერებს უტოვებს.
მოვლენები ქალაქ ლაგოს-დე-მორენოში ვითარდება. ბოლო 10 დღის განმავლობაში, 13 ივნისიდან მოყოლებული, ქუჩის ბოძებზე სკოჩით მიკრული სულ მცირე 5 მამაკაცი იპოვეს. იდუმალი შურისმაძიებელი მათ დაუნდობლად ეპყრობა, თუმცა მისი “ხელწერა“ მეტად თავისებურია.
თვითმხილველების მიერ გავრცელებულ კადრებში ჩანს, რომ ყველა სავარაუდო ქურდს სახეზე საღებავით დახატული აქვს ულვაშები, კატის ბეწვები და შუბლზე აწერია ესპანური სიტყვა “Thief“ (ქურდი). ერთ-ერთ შემთხვევაში, ორი მამაკაცი ერთმანეთზე ზურგით იყო მიკრული, მათ თავზე კი ვარდისფერი ნიშანი იყო დამაგრებული.
-
დანაშაულის მტკიცებულება - მოპარული ბაიკი იქვე რჩება
როგორც ჩანს, “ბეტმენი“ მხოლოდ საკუთარი ინტუიციით არ მოქმედებს. იმისათვის, რომ საზოგადოებასა და პოლიციას დაანახოს დაკავებულების დანაშაული, მოპარულ მოტოციკლებს პირდაპირ ბოძზე მიკრული მამაკაცების წინ ტოვებს.
ჟურნალისტი ლუის კარდენასი, რომელმაც ეს ამბავი სოციალურ ქსელ X-ში გაავრცელა, აღნიშნავს, რომ ეს შურისმაძიებლის მხრიდან ერთგვარი დემონსტრირებაა იმისა, თუ რისთვის დაისაჯნენ ეს ადამიანები.
მიუხედავად იმისა, რომ ადგილობრივი მოსახლეობის ნაწილი “ბეტმენის“ ქმედებებს მხარს უჭერს, სამართალდამცავები სხვა აზრზე არიან. შტატის უსაფრთხოების მდივანმა, ხუან პაბლო ერნანდესმა განაცხადა, რომ პოლიცია ბოძზე გაკრულ მამაკაცებს “მსხვერპლად“ მიიჩნევს და ძალისხმევას არ იშურებს თავად შურისმაძიებლის დასაკავებლად.
ამ დროისთვის არსებული ინფორმაციით:
დაკავებულებს ჭრილობები დაუმუშავეს და ბოძებიდან გაათავისუფლეს. ჯერჯერობით უცნობია, დაიწყება თუ არა მათ წინააღმდეგ გამოძიება თავად ქურდობის ფაქტებზე.
პოლიციამ უკვე მოახდინა ორი ავტომობილის იდენტიფიცირება, რომლებიც შესაძლოა დაკავშირებული იყოს “ბეტმენის“ ქმედებებთან, თუმცა დაკავებული ჯერ არავინ არის.
იხილეთ ასევე: