რა გახდა ლინდსი გრემის მოულოდნელი გარდაცვალების მიზეზი - სენატორის ბავშვობა და გზა ტრამპის მწვავე კრიტიკოსიდან ერთგულ მოკავშირემდე

ამერიკული პოლიტიკის ერთ-ერთი ყველაზე გავლენიანი ფიგურა, რესპუბლიკელი სენატორი ლინდსი გრემი 71 წლის ასაკში გარდაიცვალა. სენატორი, რომელიც დონალდ ტრამპის უახლოეს გარემოცვაში შედიოდა, შაბათ საღამოს "ხანმოკლე და მოულოდნელი ავადმყოფობის" შედეგად დაიღუპა.

• სამედიცინო ექსპერტის პირველადი დასკვნით, გრემის გარდაცვალების მიზეზი აორტის გაგლეჯა გახდა. აღსანიშნავია, რომ ტრაგედიამდე სულ ცოტა ხნით ადრე სენატორი კიევში იმყოფებოდა, სადაც პარასკევს უკრაინის პრეზიდენტს, ვოლოდიმირ ზელენსკის შეხვდა.

დონალდ ტრამპმა განაცხადა, რომ სენატორს გარდაცვალებამდე რამდენიმე საათით ადრე ესაუბრა და ის “შესანიშნავად საუბრობდა“, თუმცა ცოტა დაღლილი ჩანდა. ტრამპმა მას “ნამდვილი ამერიკელი პატრიოტი“ უწოდა და აღნიშნა, რომ გრემი ძალიან დააკლდებათ.

• პოლიტიკური ტრანსფორმაცია: მწვავე კრიტიკოსიდან ერთგულ მოკავშირემდე

ლინდსი გრემის პოლიტიკური კარიერა საოცარი მეტამორფოზებით იყო სავსე. 2015 წელს ის ტრამპს “რასისტსა და ქსენოფობს“ უწოდებდა, თუმცა მოგვიანებით მისი ერთ-ერთი ყველაზე მგზნებარე მხარდამჭერი გახდა.

გრემმა მხარი დაუჭირა ტრამპს 2024 წლის არჩევნებშიც და ამის მიზეზად პრეზიდენტის მიერ საზღვრის დაცვის პოლიტიკა, ყასემ სულეიმანის მკვლელობა და კონსერვატორი მოსამართლეების დანიშვნა დაასახელა.

“დონალდ ტრამპს აქვს ბნელი მხარე... მაგრამ ის ძალიან კარგი პრეზიდენტი იყო. მე მასთან ვრჩები, რადგან ვნახე, რა გააკეთა“, - ამბობდა გრემი.

• "ომის ქორი" და ისრაელის უახლოესი მეგობარი

საგარეო პოლიტიკაში გრემი ცნობილი იყო თავისი ინტერვენციული პოზიციით. ის აქტიურად უჭერდა მხარს უკრაინის შეიარაღებას და მოსკოვის წინააღმდეგ მკაცრ სანქციებს. ვოლოდიმირ ზელენსკიმ მის გარდაცვალებასთან დაკავშირებით მწუხარება გამოთქვა და აღნიშნა, რომ “ამერიკამ და მსოფლიომ მტკიცე ლიდერი დაკარგა“.

გარდა ამისა, გრემი ისრაელის ერთ-ერთ უდიდეს მეგობრად ითვლებოდა. პრემიერ-მინისტრმა ბენიამინ ნეთანიაჰუმ აღნიშნა, რომ “ლინდსის ესმოდა - ისრაელისა და ამერიკის უსაფრთხოება განუყოფელია“.

სულ ცოტა ხნის წინ, თავის ერთ-ერთ ბოლო ინტერვიუში, გრემი ირანის “განადგურებით“ იმუქრებოდა, თუ ქვეყანა ჰორმუზის სრუტეზე აშშ-ის კონტროლს არ დაემორჩილებოდა.

• მძიმე ბავშვობა და კარიერა სენატამდე

ლინდსი გრემის ცხოვრება ადრეულ ასაკშივე სავსე იყო გამოწვევებით. უნივერსიტეტში სწავლისას მან ორი წლის ინტერვალით დედაც დაკარგა და მამაც, რის შემდეგაც უმცროსი და თავად გაზარდა და საბოლოოდ შვილადაც აიყვანა. სანამ 2002 წელს სენატში აირჩევდნენ, ის აშშ-ის სამხედრო-საჰაერო ძალებში პროკურორად და ადვოკატად მუშაობდა.

ამჟამად სამხრეთ კაროლინის გუბერნატორს უფლება აქვს, გრემის დროებითი შემცვლელი დანიშნოს, ხოლო მუდმივ მემკვიდრეს ნოემბრის შუალედურ არჩევნებზე აირჩევენ. ამ დროისთვის რესპუბლიკელები სენატში 53-47 უმრავლესობას ფლობენ, თუმცა გრემის გარდაცვალება და სენატორ მიტჩ მაკკონელის ჰოსპიტალიზაცია პოლიტიკურ ვითარებას კიდევ უფრო ართულებს.

წყარო

იხილეთ ასევე:

• "ლინდსი იყო ჩემი უახლოესი მეგობრის, ჯონ მაკკეინის ახლო ძმაკაცი... მე და მაკკეინმა ძალით შევაგდეთ ადიდებულ შავ ზღვაში" - რას იხსენებს მიხეილ სააკაშვილი ლინდსი გრემის შესახებ