“თითქოს ამ ლამაზი ბიჭის სახით ნიკუშა თავიდან მომიკლეს და ისევ ვერაფერი ვუშველე...“ - მევლუდ მელაძე ვერაზე მომხდარ საზარელ თავდასხმას ეხმაურება
საავტომობილო ფედერაციის ვიცე-პრეზიდენტი მევლუდ მელაძე ვერაზე მომხდარ საზარელ თავდასხმას ეხმაურება, რომლის დროსაც 17 წლის ნიკოლოზ ღუნაშვილი დაიღუპა.
- თბილისის ცენტრში გუშინ 17 წლის ბიჭი მოკლეს. შეიარაღებულმა პირმა ცეცხლი გაუხსნა ახალგაზრდებს, რის შედეგადაც ოთხი ადამიანი დაჭრა, მათ შორის ორი არასრულწლოვანი. სროლის დროს დაჭრილი ნიკოლოზ ღუნაშვილი კლინიკაში გარდაიცვალა.
“ვუყურებ ამ ფოტოს და სისხლი მიშრება. საშინელ ჭრილობას რომელსაც წლებია ვებრძვი ახალი სიღრმე დაემატა. ისეთი შეგრძნება მაქვს თითქოს ამ ლამაზი ბიჭის სახით ნიკუშა თავიდან მომიკლეს და ისევ ვერაფერი ვუშველე. არავის ვუსურვებ შვილმკვდარი დედის ყურებას თუ როგორ ეძებს მისი თვალები შველას გამუდმებით, როგორ უნდა რომ ეს სიზმარი იყოს, როგორ არ ეგუება რეალობას და ყოველ ჯერზე როცა შვილს დახედავს და რამეს ეტყვის როგორ ჰგონია რომ ის ახლა პასუხს გასცემს.
ძალიან, ძალიან მწარე და უსამართლოა ეს ყველაფერი,“ - წერს მევლუდ მელაძე.
- მკვლელობასა და დაჭრაში ბრალდებული ნიკა კაპანაძეა, რომელიც პოლიციამ უკვე დააკავა. კაპანაძემ დაკავების დროს, პოლიციას შეიარაღებული წინააღმდეგობა გაუწია - ის ამ დროისთვის კლინიკაშია მოთავსებული ხელზე მიღებული დაზიანების გამო.
მომხდარის დეტალები:
არსებული ინფორმაციით, თავდაპირველად შელაპარაკება დაკავებულ ნიკა კაპანაძის დედასა და დაჭრილებს შორის მოხდა. კერძოდ კი, კაფიდან გამოსულ ახალგაზრდებს, რომელთა ავტომანქანაც დაკავებულის საცხოვრებელი სახლის წინ იდგა, ქალმა შენიშვნა მისცა. არსებული ინფორმაციით, სწორედ აღნიშნულის შემდეგ განახორციელა დაკავებულმა გასროლა.
როგორც ირკვევა, ავტომანქანაში მყოფი ოთხი პირიდან ცეცხლსასროლი იარაღიდან გასროლილი ტყვია სამს მოხვდა, მძღოლი კი არ დაშავებულა.
იხილეთ ასევე:
- "გაუფრთხილებია ბავშვები, ნუ იცინითო, გამოიტანა იარაღი და ცეცხლი გაუხსნა... ამათ დაძრეს მანქანა და..." - თბილისის ცენტრში მომხდარი დანაშაულის ახალი დეტალები
- “ძალიან ძნელია დედისთვის ამის თქმა მაგრამ ნეტა ნეტა ჩემი შვილი მომკვდარიყო და ის ცოცხალი ყოფილიყო“ - 17 წლის მოზარდის მკვლელობისთვის დაკავებული ნიკა კაპანაძის დედის პირველი კომენტარი