"წარმოდგენაც არ გვაქვს, გადაურჩება თუ არა ჩვენი ულამაზესი სახლი ამ საშინელებას" - საფრანგეთში ხანძრის გამო ჯორჯ და ამალ კლუნების ევაკუაცია განხორციელდა

ჯორჯ და ამალ კლუნებმა საფრანგეთში მდებარე სახლი ტყის ხანძრის გამო დატოვეს: „არ ვიცით, გადარჩება თუ არა ჩვენი ულამაზესი სახლი“

ჰოლივუდის მსახიობს, ჯორჯ კლუნისა და მის მეუღლეს, ამალ კლუნის, სამხრეთ-აღმოსავლეთ საფრანგეთში მდებარე საცხოვრებლის დატოვება ტყის ხანძრის გამო მოუწიათ. ინფორმაცია მსახიობის აგენტმა Associated Press-ს ხუთშაბათს დაუდასტურა.

• კლუნებმა მამული 2021 წელს შეიძინეს და მას შემდეგ ის მათი მთავარი საცხოვრებელი გახდა. გასული წლის დეკემბერში საფრანგეთის მთავრობამ მთელი ოჯახი - მათ შორის წყვილის ცხრა წლის ტყუპებიც საფრანგეთის მოქალაქეობით დააჯილდოვა.

ბრინიოლის მერის, დიდიე ბრემონისადმი მიწერილ წერილში ჯორჯ კლუნი წერს:

"ამ ეტაპზე წარმოდგენაც არ გვაქვს, გადაურჩება თუ არა ჩვენი ულამაზესი სახლი ამ საშინელებას, მაშინ როცა ბრინიოლის დატოვება გვიწევს. თუმცა ორი რამის თქმა მინდა.პირველ რიგში, იმედი გვაქვს, რომ თქვენ და ჩვენი ქალაქის მოსახლეობა უსაფრთხოდ ხართ. მეორე კი ისაა, რომ მე და ამალს მტკიცედ გვაქვს გადაწყვეტილი, რაც უნდა მოხდეს, ჩვენს სოფელში, ამ საზოგადოების ნაწილად დავრჩეთ და მის აღდგენაში ჩვენი წვლილი შევიტანოთ.

ჩვენ გვიყვარს ბრინიოლი და იქ მცხოვრები ჩვენი მეგობრები.“

ადგილობრივი ხელისუფლების ინფორმაციით, ბრინიოლის მახლობლად ხანძარი ოთხშაბათს დღის მეორე ნახევარში გაჩნდა და დაახლოებით 130 ჰექტარი ტერიტორია მოიცვა. ევაკუაცია 600-მდე მოსახლეს შეეხო.

• ნახეთ ასევე:
• საფრანგეთი, ესპანეთი, იტალია, საბერძნეთი, პორტუგალია და ა.შ. - ევროპაში ხანძრის ზონები მომრავლდა: ევაკუირებულია სოფლები, გადაიწვა დასახლებები (ფოტო)