"ეს ამბავი საერთოდ არ ვიცოდი, 12 წლის მერე პირველად გავიგე - ერთ-ერთ ბავშვს მამიდისთვის მიუტანია გურამის საფულე და სამაჯური" - ახალი დეტალი გურამ დადიანიძის საქმეში, რომელიც სოფო ბიბილაშვილმა პირდაპირ ეთერში გააჟღერა
"12 წლის მერე პირველად გავიგე, რომ ერთ-ერთ ბავშვს მამიდისთვის მიუტანია გურამის საფულე, სამაჯური და ხურდა" - ამის შესახებ 12 წლის წინ მლეთაში გაუჩინარებული გურამ დადიანიძის დედამ, სოფო ბიბილაშვილმა გადაცემაში "შენი ამბავი თაიასთან" ისაუბრა.
- როგორც სოფო ბიბილაშვილი ამბობს, ეს ყველაფერი მას ეჭვებს უჩენს.
"12 წლის მანძილზე რაც არ დავუკითხივარ, ახლა მკითხავენ გამომძიებლები. მეკითხებიან რა ურთიერთობა მქონდა ბავშვთან, რა ვერსია მაქვს, სად იქნება ბავშვი....
- 12 წლის მერე პირველად გავიგე, რომ ერთ-ერთ ბავშვს მამიდისთვის მიუტანია გურამის საფულე, სამაჯური და ხურდა. მე ეს ამბავი საერთოდ არ ვიცოდი. მამიდას "ტიკ-ტოკის" "ლაივში" უსაუბრია.
ძალიან მაინტერესებს, გურიკა სახლიდან რომ წავიდა და მამიდამ ფული მისცა, ამხანაგებს ჩააბარა გურიკამ ფული, მლეთაში წამომიღეთო?! მლეთიდან რატომ წამოუღეს გურიკას ხურდები ბავშვებმა მამიდას სახლში? ეს ყველაფერი ეჭვებს მიჩენს. მამიდასთან მქონდა კომუნიკაცია და ეს არასდროს არ უთქვამს. ერთხელ რაღაც ნივთი დამჭირდა და დავურეკე (მამიდას) საფულე ხომ არ აქვს გურიკას სახლში დატოვებული-მეთქი და არაო, არაფერი არ არის დატოვებულიო. ახლახან დამჭირდა გურიკას დაბადების მოწმობა და მივწერე ნინოს და პასუხი არ დამიბრუნა"- ამბობს სოფო ბიბილაშვილი.
- ცნობისთვის, 17 წლის გურამ დადიანიძე 2014 წელს გაუჩინარდა. ის, დუშეთის რაიონის სოფელ ქვემო მლეთაში, ლომისობის დღესასწაულზე ექსკურსიაზე იმყოფებოდა. საქმე დღემდე გაუხსნელია, ვინაიდან გურამ დადიანიძის კვალს ვერ მიაგნეს. გაუჩინარებული ბიჭის დედა, სოფო ბიბილაშვილი შვილის პოვნაში დახმარებას დღემდე ითხოვს.
გურამ დადიანიძის გაუჩინარების საქმეში ადვოკატი ტარიელ კაკაბაძე ჩაერთო. იმ ადგილას და მიმდებარედ, სადაც მოწმეთა ჩვენებების მიხედვით საგამოძიებო მოქმედებები და ძებნის სამუშაოები თავიდან ჩატარდა, გამოიყენეს სპეციალური ტექნიკა, სკანერი, თუმცა დაკარგული ბიჭის კვალს ვერ მიაგნეს.
ასევე იხილეთ: