“მოღალატეებს რომ უწოდებს თანაგუნდელებს, ნეტა სინდისი არ აწუხებს? პირველი მე ვიქნები, ვინც პასუხს მოსთხოვს ჩემ შვილს, თუ ვინმეს გავლენით რაიმე თქვა“ - ბუდუ ზივზვაძის მამა გიორგი გველესიანის განცხადებას ეხმაურება
საქართველოს ეროვნული ნაკრების ფეხბურთელის, ბუდუ ზივზივაძის მამა - კახა ზივზივაძე ეხმაურება გიორგი გველესიანის ერთ-ერთ განცხადებას, რომელიც მან საფეხბურთო კარიერის დასრულების შემდეგ საბა საპანაძესთან ვრცელ ინტერვიუში გააკეთა.
გველესიანმა ინტერვიუში სპორტისა და პოლიტიკის თანხვედრაზე ისაუბრა. მისი თქმით, სპორტი და პოლიტიკა ერთმანეთის განუყრელი "მეგობრები" არიან და ამის გამიჯვნა შეუძლებელია. ამასთან, გველესიანმა აღნიშნა, რომ “2024 წლის აპრილში საქართველოს ეროვნული ნაკრების ფეხბურთელებს სხვადასხვა ძალებისგან გარკვეული წნეხი ჰქონდათ, რომ მხარდამჭერი პოსტები და განცხადებები დაედოთ სოციალურ ქსელში. უმეტესობამ დაწერა, რომ ჩვენი გზა არის ევროპაში და ეს არის აქსიომა“.
სწორედ აღნიშნულ განცხადებას ეხმაურება კახა ზივზივაძე:
“არ ვაპირებდი პასუხს მაგრამ მართლა მაინტერესებს, ამ ბიჭმა გამაგებინოს რომელმა ძალებმა იმოქმედეს და დაწნეხეს ფეხბურთელები (პირველი მე ვიქნები ვინც პასუხს მოსთხოვს ჩემ შვილს, თუ ვინმეს გავლენით რაიმე თქვა), რომ თავისი აზრი გამოეხატათ... მოღალატეებს რომ უწოდებს თანაგუნდელებს, ნეტა სინდისი არ აწუხებს?
რა გამოდის 26 ფეხბურთელიდან 4- მა “გაუძლო“ ძალების დაწნეხვას?
რად უნდა კონსტიტუციის დაცვას და რეფერენდუმის შედეგებს ვინმე ძალების ზეწოლა? ვალდებულები არა ვართ?“ - წერს კახა ზივზივაძე.
- “2024 წლის აპრილში, როცა საქართველოს ეროვნული ნაკრების ფეხბურთელებს სხვადასხვა ძალებისგან გარკვეული წნეხი ჰქონდათ, რომ მხარდამჭერი პოსტები და განცხადებები დაედოთ სოციალურ ქსელში. უმეტესობამ დაწერა, რომ ჩვენი გზა არის ევროპაში და აი, ეს არის აქსიომა. მე დავსვი აქ შეკითხვა, რომ არ ვარ ბატონებო ამის წინააღმდეგი, მაგრამ ვიცით, ეს რას მოუტანს ჩვენს ეკონომიკას? გააზრებული გვაქვს, ეს რას მოუტანს ჩვენს დემოგრაფიულ მდგომარეობას? კითხვა დაისვა - რაიმე კავშირში შესვლა რატომ არის ჩვენი პანაცეა... დღესაც საჯაროა ჩემი პოსტი. ჯერ კიდევ მაშინ ვსაუბრობდი, თუ რა მოაქვს ფობიებს, ქსენოფობიებს, რუსოფობიებს და ზოგადად სხვადასხვა ფობიებს - არაფერი კარგი, რაც ახლა აქტუალურია ჩვენს პოლიტიკაში" - თქვა გველესიანმა.
2024 წლის აპრილში, მას შემდეგ რაც პარლამენტმა დააინიციირა “გარე გავლენის გამჭვირვალობის შესახებ კანონი“, საქართველოში საპროტესტო დემონსტრაციები დაიწყო. მასშტაბური აქციები მალე მონაწილეებსა და პოლიციას შორის ფიზიკურ დაპირისპირებაში გადაიზარდა, დაშავდა უამრავი მშვიდობიანი მოქალაქე.
იმ პერიოდში საქართველოს ეროვნული ნაკრების უამრავმა ფეხბურთელმა დააფიქსირა მისი პოზიცია და განაცხადა, რომ საქართველოს მომავალი ევროპაშია.
იხილეთ ასევე: