რა ელის ქალს, რომელიც ორი სასიკვდილო ინიექციის შემდეგ გადარჩა და როგორ მოქმედებს პრეპარატი: კრისტა პაიკის სკანდალური საქმე
აშშ-ში, ტენესის შტატში, 50 წლის სიკვდილმისჯილი კრისტა პაიკი ორჯერადი სასიკვდილო ინიექციის გაკეთების შემდეგ ცოცხალი გადარჩა. პატიმარი საავადმყოფოში გადაიყვანეს, სადაც ექიმები მისი სიცოცხლის გადასარჩენად იბრძვიან, ხოლო მომხდარმა აშშ-ში სასიკვდილო განაჩენის აღსრულების მეთოდებთან დაკავშირებით ახალი სკანდალი წარმოშვა.
-
რა მოხდა სიკვდილით დასჯის დროს?
კრისტა პაიკს 1996 წელს 19 წლის კოლინ სლემერის მკვლელობისთვის მიესაჯა სიკვდილით დასჯა, რაც მან თავის იმჟამინდელ შეყვარებულთან, თადარილ შიპთან ერთად ჩაიდინა.
ოთხშაბათს საღამოს, აშშ-ის უზენაესი სასამართლოს მიერ ბოლო წუთს მიღებული გადაწყვეტილების შემდეგ, განაჩენის აღსრულების ნებართვა გაიცა. პაიკს პენტობარბიტალის ორი შპრიცი შეიყვანეს, თუმცა მისმა ადვოკატებმა განაცხადეს, რომ მედიკამენტმა გულის გაჩერება ვერ გამოიწვია და პატიმრის ხვრინვაც კი ისმოდა.
ტენესის სასჯელაღსრულების დეპარტამენტმა დაიცვა გამოყენებული მეთოდი და განაცხადა, რომ არსებული პროტოკოლი იმ საღამოს ჩატარებული პროცედურების მიღმა დამატებით ღონისძიებებს არ ითვალისწინებს. სააგენტო AP-ის ცნობით, შტატის პროტოკოლში მკაფიოდ არ არის განსაზღვრული, რა უნდა მოხდეს იმ შემთხვევაში, თუ პატიმარი მეორე დოზის შემდეგაც ცოცხალი რჩება.
-
სამედიცინო შეფასებები და რა ელის პატიმარს?
ოფიციალურ პირებს ჯერ არ განუმარტავთ, რატომ აღმოჩნდა შეყვანილი დოზა არალეთალური, თუმცა სამედიცინო ექსპერტებს თავიანთი ვერსიები აქვთ.
ემორის უნივერსიტეტის მედიცინის სკოლის პროფესორმა, დოქტორმა ჯოელ ზივოტმა, რომელიც პაიკის დაცვის გუნდის სამედიცინო ექსპერტია, BBC-ს განუცხადა, რომ სისხლში პენტობარბიტალის დონემ სავარაუდოდ ვერ მიაღწია იმ ნიშნულს, რაც აპნოესა და გულ-სისხლძარღვთა უკმარისობას გამოიწვევდა. მან ასევე აღნიშნა, რომ რეანიმაციული ღონისძიებების დაგვიანების გამო, სრულიად შესაძლებელია პატიმარს ტვინის დაზიანება მიეღო.
შტატის გუბერნატორმა ბილ ლიმ საქმის დამოუკიდებელი შემოწმება ბრძანა და განაცხადა, რომ წლის ბოლომდე დაგეგმილი უკანასკნელი სიკვდილით დასჯაც შეჩერებულია. მოკლულის დედამ, მეი მარტინესმა, NBC News-თან საუბარში მომხდარ მოვლენებს “ქაოსი“ უწოდა.
პაიკის თანამონაწილე თადარილ შიპი ციხეში რჩება, რადგან დანაშაულის ჩადენისას იგი 17 წლის იყო და შტატის კანონმდებლობით სასიკვდილო განაჩენი აარიდა.
-
პენტობარბიტალი და შეცდომები აშშ-ის სასიკვდილო ინექციებში
პენტობარბიტალი ძლიერი სედატიური საშუალებაა, რომელსაც მაღალი დოზით სასიკვდილო ინიექციებში იყენებენ. გასულ წელს ჯო ბაიდენის ადმინისტრაციის დროს ჩატარებულმა მიმოხილვამ აჩვენა, რომ ამ პრეპარატმა შესაძლოა გაუმართლებელი ტანჯვა გამოიწვიოს, რის გამოც ფედერალურ დონეზე მისი გამოყენება აიკრძალა, თუმცა ეს აკრძალვა ცალკეულ შტატებში არ მოქმედებს.
პაიკის ადვოკატები ამტკიცებენ, რომ გამოყენებული პრეპარატი შესაძლოა ვადაგასული ან დაქვეითებული ეფექტურობის ყოფილიყო. თავის მხრივ, სასჯელაღსრულების დეპარტამენტი აცხადებს, რომ პროტოკოლში შემავალი ქიმიური ნივთიერება ყოველთვის ეფექტური იყო.
აღსანიშნავია, რომ ტენესიში ეს არ არის ერთადერთი შემთხვევა 2026 წელს: მაისში ტონი კარუთერსის სიკვდილით დასჯა გადაიდო მას შემდეგ, რაც პერსონალმა ვენა ვერ იპოვა.
სიკვდილით დასჯის საინფორმაციო ცენტრის (DPI) მონაცემებით, 2022 წელს აშშ-ში სიკვდილით დასჯის შემთხვევების მესამედზე მეტი ხარვეზებით ჩატარდა, ხოლო სასიკვდილო ინიექცია ყველაზე ხშირად იწვევს პრობლემებს. ამჟამად აშშ-ის 50 შტატიდან 27-ში სიკვდილით დასჯა კანონით ნებადართულია.
იხილეთ ასევე: