"განგაში მან დაიწყო" - 6 წლის ნინა, ავიაკატასტროფას გადარჩენილი თვითმფრინავის კიდევ ერთი გმირი

10:39 / 02-10-2026

სანამ მსოფლიო მედია დუბაიდან თელ-ავივისკენ მიმავალ Boeing 737 Max 8-ის ბორტზე მომხდარი ტერორისტული თავდასხმისა და შეიარაღებული დაპირისპირების დეტალებს აშუქებდა, ყურადღების მიღმა დარჩა პატარა გოგონა, რომლის უბრალო თხოვნამაც მოვლენათა განვითარება სრულიად შეცვალა.

6 წლის ნინა მანესი მშობლებთან - თალისთან და ცვიკასთან ერთად მგზავრობდა. ფრენის დაწყებიდან დაახლოებით ორ-ნახევარი საათი იყო გასული, როდესაც ნინამ დედას სთხოვა, საპირფარეშოში გაჰყოლოდა. ეს აღმოჩნდა ის გადამწყვეტი წამი, როდესაც მეორე პილოტმა (ომანის მოქალაქემ) ხომალდის მეთაურს, ინდოელ სმიტ მაჩჰარს, დანით ჭრილობები მიაყენა, რათა თვითმფრინავზე კონტროლი ხელში ჩაეგდო.

კაბინასთან მდგარმა დედამ საეჭვო ხმები გაიგონა. "იქ ყველაფერი სისხლში იყო და სასტიკი დაპირისპირება მიმდინარეობდა. ყვირილი დავიწყე: “პილოტს დანას ურტყამს, მიშველეთ!“, მაგრამ ხალხი გაოცებული უყურებდა და ვერ ხვდებოდა, რა ხდებოდა“ - იხსენებს თალი.

ამ დროს თვითმფრინავმა მკვეთრი ვარდნა დაიწყო. საპირფარეშოში მყოფი ბავშვების განწირულმა ყვირილმა - "მამა, არ გვინდა სიკვდილი!“ - ნინას მამა, ცვიკა აიძულა, დაუყოვნებლივ სამოქმედოდ გადასულიყო და კაბინისკენ გაქცეულიყო.

სწორედ ნინას თხოვნამ და მისმა განგაშმა მისცა მგზავრებს შესაძლებლობა, დროულად შეეღწიათ კაბინაში, შეეკავებინათ თავდამსხმელი და გადაერჩინათ ბორტი. მგზავრებს შორის აღმოჩნდა სტომატოლოგი შოთა მუსაევი, რომელმაც დაჭრილ კაპიტანს პირველადი დახმარება გაუწია, სისხლდენა შეაჩერა და ჟანგბადის ნიღაბი მიაწოდა.

ხომალდი იორდანიის საზღვართან ახლოს, საუდის არაბეთში მშვიდობიანად დაეშვა. კაპიტან სმიტ მაჩჰარის მდგომარეობა ამჟამად სტაბილურია, ხოლო თავდამსხმელი დაკავებულია. გამოძიებაში საუდის არაბეთთან ერთად ჩართულები არიან ისრაელის, აშშ-ის, საამიროებისა და ომანის სპეცსამსახურები.