სახლში დაბრუნებაზე მაშინაც უარს ამბობდა, როცა გაიგო, რომ ბავშვს ჰოსპიტალიზაცია დასჭირდა - რას ჰყვებიან პოლიციელები დედაზე, რომელმაც 4 შვილი მარტო დატოვა და ვეგასში წავიდა
ფლორიდაში მცხოვრები დედა, რომელსაც ბრალად ედება ოთხი შვილის სახლში მარტო დატოვება ლას-ვეგასში მივლინებით გამგზავრების გამო, პოლიციის ინფორმაციით, შინ დაბრუნებაზე უარს ამბობდა მაშინაც კი, როდესაც სამართალდამცველებმა შეატყობინეს, რომ მისი უმცროსი შვილი საავადმყოფოში გადაიყვანეს.
- 50 წლის ირინ მილერი პარასკევს ორლანდოს საერთაშორისო აეროპორტში დააკავეს. მას ბავშვების უგულებელყოფა ედება ბრალად. ოსეოლას ოლქის შერიფის ოფისის ინფორმაციით, ქალმა 9, 11, 12 და 14 წლის შვილები საცხოვრებელ ბინაში ზედამხედველობის გარეშე დატოვა.
პოლიციელებმა მილერს გასულ ოთხშაბათს შეატყობინეს, რომ მისი 9 წლის ვაჟი თავის არეში მიღებული ჭრილობის გამო საავადმყოფოში გადაიყვანეს. სამართალდამცველების ცნობით, ბავშვმა ტრავმა მას შემდეგ მიიღო, რაც მას ჰანტელი დაეცა. მანამდე მისმა უფროსმა დამ დახმარების გამოსაძახებლად 911-ზე დარეკა.
მილერმა, რომელიც რუსეთში დაბადებული ფოტოგრაფია, განაცხადა, რომ პარასკევამდე ლას-ვეგასში დარჩენას აპირებდა და შინ დაბრუნებას ვერ შეძლებდა. ამის შესახებ ოსეოლას ოლქის შერიფის ოფისის კაპიტანმა კიმ მონტესმა Daily Mail-ს განუცხადა.
-
ამის შემდეგ სამართალდამცველები ბავშვების მამას, 53 წლის მარკ მილერს დაუკავშირდნენ. კაპიტნის თქმით, კაცმა არ იცოდა, რომ ცოლმა შვილები ზედამხედველობის გარეშე დატოვა.
მონტესის განცხადებით, ბავშვები მამასთან გადაიყვანეს და ისინი "აღტაცებულები“ იყვნენ. აღსანიშნავია, რომ მარკ მილერს მიმდინარე წელს ცოლის, ირინ მილერის წინააღმდეგ სისხლის სამართლის წესით წაყენებული ბრალდება ჰქონდა ოჯახში ძალადობასთან დაკავშირებით.
- ჰანტელთან დაკავშირებული შემთხვევა მაშინ მოხდა, როდესაც ოთხი ბავშვი პლედებისგან ქოხს აწყობდა და მის დასამაგრებლად ჰანტელს იყენებდა. ამის შესახებ Daily Mail-ს ოჯახის ერთ-ერთმა მეგობარმა განუცხადა.
მეგობრის თქმით, ადგილზე ბევრი სისხლი იყო.
მედიის ინფორმაციით, წყვილი 15-წლიანი ქორწინების შემდეგ განქორწინების პროცესშია. სასამართლო დოკუმენტების თანახმად, მარკი 21 აგვისტოს დააკავეს მას შემდეგ, რაც, სავარაუდოდ, შვილების სკოლის წინ ცოლს დაარტყა.
მას ბრალი წარუდგინეს, მოგვიანებით კი 10 000 დოლარის ოდენობის გირაოს სანაცვლოდ გაათავისუფლეს. სასამართლო ჩანაწერების მიხედვით, 4 სექტემბერს, თავდასხმის შესახებ წაყენებული ბრალდების შემდეგ, მოსამართლემ მას ცოლთან კონტაქტი აუკრძალა.
- ოთხივე ბავშვი ამჟამად მამასთან ერთად ერთოთახიან მოტელში ცხოვრობს. მარკი, რომელიც მოულოდნელად ოთხი შვილის ერთადერთ მზრუნველად იქცა, ბავშვების დასახმარებლად GoFundMe-ზე თანხას აგროვებს. მისი მიზანი 5 000 დოლარის შეგროვებაა.
ოთხი შვილის მამა, რომელიც უკრაინაშია დაბადებული, წერს, რომ „ყველაფერს აკეთებს იმისთვის, რომ შვილები უსაფრთხოდ ჰყავდეს. ამასთან, ის აღნიშნავს, რომ არ მიაჩნია, თითქოს მისი ცოლი "ცუდი ადამიანია“ - მისი აზრით, მან უბრალოდ ისეთი გადაწყვეტილებები მიიღო, რომელთა შედეგებზეც სათანადოდ არ დაფიქრებულა.