აშშ-ში წითელას კიდევ ერთი ბავშვი ემსხვერპლა - როგორია ეპიდემიოლოგიური ვითარება ქვეყანაში?
აშშ, ვისკონსინის შტატში, წითელას კიდევ ერთი ბავშვი ემსხვერპლა. ამის შესახებ შტატის ჯანდაცვის დეპარტამენტი იუწყება.
უწყების ინფორმაციით, ეს ვისკონსინში 2026 წელს წითელასთან დაკავშირებული გარდაცვალების მეორე შემთხვევაა. არასრულწლოვნისა და მისი ოჯახის პირადი ინფორმაციის დაცვის მიზნით, დამატებითი დეტალები არ გასაჯაროებულა.
- შეგახსენებთ, ბოლო 30 წლის განმავლობაში პირველად, აშშ-ში წითელათი ბავშვი გარდაიცვალა. ეს იყო ამასთანავე, ვირუსით გარდაცვალების ზოგადად პირველი შემთხვევაც ამ პერიოდის განმავლობაში.
როგორია ეპიდვითარება ქვეყანაში
აშშ-ში წითელას შემთხვევები მკვეთრად არის გაზრდილი. ქვეყნის დაავადებათა კონტროლისა და პრევენციის ცენტრის (CDC) მონაცემებით, წელს 5 400-ზე მეტი ინფიცირებაა დადასტურებული, შტატების ჯანდაცვის უწყებების მონაცემებით კი, დაავადებასთან დაკავშირებული გარდაცვალების შემთხვევების რაოდენობამ 10-ს მიაღწია.
ეპიდემიის ფონზე აშშ-მ წითელას ელიმინაციის სტატუსიც დაკარგა. დაავადება ქვეყანაში 2000 წელს აღმოფხვრილად გამოცხადდა, თუმცა ვირუსის უწყვეტი გავრცელება 12 თვეზე მეტხანს გრძელდება.
სპეციალისტები წითელათი გავრცელების ერთ-ერთ მნიშვნელოვან ფაქტორად ვაქცინაციის მაჩვენებლის შემცირებას ასახელებენ. 2019-2020 სასწავლო წელს საბავშვო ბაღის ასაკის ბავშვებში ვაქცინაციის მაჩვენებელი 95.2% იყო, 2025-2026 სასწავლო წელს კი 92.4%-მდე შემცირდა.
ასევე იხილეთ: