"რევოლუციაზე წარუმატებელი და სასოწარკვეთილი პოლიტიკოსები ლაპარაკობენ"

"ჩვენ მხარს ვუჭერთ საქართველოს, განსაკუთრებით საარჩევნო კანონმდებლობის რეფორმირების განხორციელებაში, რომელმაც უნდა უზრუნველყოს ხელისუფლების სრულყოფილი და დემოკრატიული გადაცემა მომდევნო 2012-2013 წლებში", - განაცხადა აშშ-ის სახელმწიფო მდივანმა ჰილარი კლინტონმა ბერლინში, ნატოს ქვეყნების საგარეო საქმეთა მინისტრების შეხვედრაზე.

რასაც წინ უსწრებდა სახელმწიფო დეპარტამენტის კრიტიკული ანგარიში და საქართველოში ამერიკის ელჩ ჯონ ბასის გამოსვლა. ოპოზიციაში მიიჩნევენ, რომ ხელისუფლებას დემოკრატიული რეფორმების აუცილებლობაზე დასავლეთი უკვე დაუფარავად მიუთითებს, თუმცა ხელისუფლების წარმომადგენლები სხვანაირად ფიქრობენ. გვესაუბრება პარლამენტის ვიცე-სპიკერი გიგი წერეთელი.

- ბატონო გიგი, აშშ-ის სახელმწიფო დეპარტამენტის ანგარიშში ლაპარაკია საქართველოში არსებულ შერჩევით სამართალზე, მედიის თავისუფლების შეზღუდვაზე, ოპოზიციასა და არასამთავრობო სექტორზე ზეწოლასა და პენიტენციური სისტემის პრობლემებზე, ელიტურ კორუფციაზე და ა.შ...

- ასეთი ანგარიშები ქვეყნდება ყოველწლიურად. ბუნებრივია, ეს ყურადსაღებია, ჯერ მხოლოდ იმის გამო, რომ აშშ ჩვენი სტრატეგიული პარტნიორია. მაგრამ არის საკითხები, რომლებიც ადგილობრივმა ორგანიზაციებმა მიაწოდეს, რაც ანგარიშშიც არის მითითებული. ამიტომაც იქ ჩაწერილი ყველა საკითხი არ უნდა გაიგივდეს სახელმწიფო დეპარტამენტის თვალსაზრისთან.

მიმაჩნია, რომ ეს ჩვეულებრივი სამუშაო დოკუმენტია, რომელსაც ეცნობა ხელისუფლებაც და ოპოზიციაც, თუ რაიმეს ვეთანხმებით და ჩვენც მივიჩნევთ, რომ გამოსასწორებელია, მასზე აუცილებლად ვიმუშავებთ, თუ მივიჩნევთ, რომ რაიმე არაზუსტი ინფორმაციაა, ამაზე შესაბამისი განცხადებებიც გაკეთდება და ამერიკის სახელმწიფო დეპარტამენტსაც მიეწოდება ყველა ის დოკუმენტი, რომელიც გააბათილებს ამა თუ იმ მოსაზრებას.

- რას იტყვით ჯონ ბასის გამოსვლაზე, როდესაც მან ამ ანგარიშზე კომენტარი საელჩოს მიერ ნათარგმნი სუბტიტრების თანხლებით გაავრცელა.

- მაგ დროს ბრიუსელში, ევროპარლამენტში გვქონდა შეხვედრები, ამიტომაც არ მინახავს ეს გამოსვლა. ვფიქრობ, რომ ჯონ ბასის ანგარიშში დიდი სიახლე არაფერი ყოფილა. იქ იყო როგორც დადებითი, ასევე უარყოფითი შეფასებები.

- ანგარიშში ლაპარაკია მედიის შეზღუდვაზე. ბევრი მიიჩნევს, რომ ის ფორმა, რა ფორმითაც ამერიკის ელჩმა წარმოადგინა თავისი კომენტარი, ხაზს უსვამს, რომ ხშირად ტელეკომპანიები ხელისუფლების დაკვეთით ამახინჯებენ დიპლომატთა გამოსვლებს...

- როგორც ვიცი, "ხელისუფლების დაკვეთა" არც ანგარიშში უხსენებიათ და არც ბასს უთქვამს. ამა თუ იმ ჩანაწერისა თუ მოვლენის ინტერპრეტაციის მსურველი კი ამ ქვეყანაში ბევრია. ბასი გონიერი ადამიანია, მან, ალბათ, დაიზღვია თავი შესაძლო გაუგებრობისგან.

- ახლახან გავრცელდა ჰილარი კლინტონის განცხადება, სადაც ის საქართველოში დემოკრატიულ რეფორმებზე, განსაკუთრებით კი საარჩევნო კანონმდებლობის რეფორმირებაზე ლაპარაკობს...

- დემოკრატიის ხარისხი ქვეყანაში უფრო მაღალი უნდა იყოს და ამის სურვილი ჩვენც გვაქვს. ქალბატონი კლინტონის განცხადებაში არაფერია სიახლე. თქვენ ვერ იპოვით აშშ-ის წარმომადგენლების ვერც ერთ განცხადებას, სადაც არ ამბობენ, რომ ამა თუ იმ ქვეყანას გარკვეული პირობების გათვალისწინებით უჭერენ მხარს. ჩვენ სწორედ იმიტომ გვიჭერენ მხარს, რომ საქართველომ გადაწყვიტა, პოსტსაბჭოთა ქვეყნიდან გახდეს მოდერნიზებული, განვითარებული ქვეყანა, როგორც დემოკრატიის, ასევე ეკონომიკის თვალსაზრისით.

- თუმცა ოპოზიციონერები ამბობენ, რომ ხელისუფლებასა და ოპოზიციურ "რვიანს" შორის საარჩევნო კანონმდებლობაზე დაწყებული დიალოგი სწორედ ხელისუფლების მიზეზით შევიდა ჩიხში.

- ჩვენ მზად ვიყავით და დღესაც მზად ვართ დიალოგისთვის. არაერთხელ მოხერხდა შეთანხმების მიღწევა, მაგალითად, თბილისის მერი პირდაპირი წესით სწორედ ოპოზიციის მოთხოვნის გათვალისწინებით აირჩა. ამ ქვეყანაში ერთხელ და სამუდამოდ უნდა დასრულდეს საარჩევნო გარემოზე, როგორც რაღაც საფრთხეზე ლაპარაკი და ამას, დასავლეთის გარდა, ითხოვს ქართველი საზოგადოებაც. არ ვფიქრობ, რომ მოლაპარაკების პროცესი ჩიხშია, ოპოზიციის მხრიდან გარკვეული წინადადებები მოვისმინეთ, ნაწილი გავიზიარეთ, მაგრამ არის საკითხები, რაზეც შეიძლება ვერ შევთანხმდეთ.

მე მაინც მომხრე ვარ ორმხრივი კომპრომისის. შესაძლოა, ამ პროცესში მეტი პასუხისმგებლობა ეკისრება ხელისუფლებას, მაგრამ არც ოპოზიცია უნდა იქცეოდეს უპასუხისმგებლოდ. თუ ვინმეს უნდა ხელოვნურად წარმოქმნას პრობლემები, რათა ვიღაცას დაანახვოს ხელისუფლების არაკონსტრუქციულობა, არაფერი გამოვა. როგორც ვიცი, აზრთა განსაკუთრებული სხვადასხვაობაა პროპორციულ-მაჟორიტარულ სისტემასა და ბიომეტრიულ პასპორტებზე.

თუ დადასტურდება, რომ რეალურია ბიომეტრიის გამოყენებით არჩევნების ჩატარება და მთელი ბიუჯეტი არ დასჭირდება ამის ორგანიზებას, მაშინ შეიძლება დაფიქრება. მინდა მოვუწოდო ყველა ოპოზიციურ ძალას თანამშრომლობისკენ. დარწმუნებული ვარ, ოპოზიციურ სპექტრში იქნებიან ისეთი ძალებიც, რომელთა მიზანი შეთანხმება კი არა, უფრო დესტრუქციული მოქმედება იქნება, ისინი შეეცდებიან დიალოგის ჩაშლა ინსტრუმენტად გამოიყენონ თავიანთი წარუმატებლობის ან არჩევნებში მონაწილეობაზე უარის გასამართლებლად.

- ოპოზიციაში არიან ძალები, რომლებიც პროცესების რევოლუციურ განვითარებაზე ლაპარაკობენ...

- საქართველო დემოკრატიული ქვეყანაა, ნებისმიერ პარტიას აქვს უფლება, აირჩიოს მოქმედების სტრატეგია და ამაზე ხმამაღლა ილაპარაკოს, თუმცა ერთი პირობით: ყველაფერი კანონის ფარგლებში უნდა იყოს მოქცეული. გარდა ამისა, აღსანიშნავია ერთიც: საქართველო არ არის ნორმალურ ვითარებაში მყოფი ქვეყანა, ჩვენი ტერიტორიები ოკუპირებულია, რუსეთი კი მეტად არაპროგნოზირებადი ქვეყანაა.

არ ველოდებით რუსეთისგან თავდასხმას, მაგრამ მათ ხელში ბევრი ისეთი ბერკეტია, რითაც შეუძლიათ ისეთი პროცესების პროვოცირება, რაც არასასიკეთოდ აისახება ქვეყნის ეკონომიკასა და პოლიტიკურ ვითარებაზე. ამიტომ ვეუბნებით ჩვენს კოლეგებსა და ოპონენტებს: კარგად დაფიქრდნენ! რევოლუციაზე წარუმატებელი და სასოწარკვეთილი პოლიტიკოსები ლაპარაკობენ. ლაპარაკობენ, რომ სისხლს დაღვრიან, ხელისუფლებას შეცვლიან და ა.შ. მაგრამ არც საზოგადოება და არც ხელისუფლება ამას არ დაუშვებს.

- სოფელ არგვეთში მუხრან მაჭავარიანისთვის მიცემული პირობის შესრულება ერთ დიდ სკანდალად იქცა. პრეზიდენტმა წყალი საზეიმოდ გახსნა, თუმცა შემდეგ აღმოჩნდა, რომ ზემო იმერეთის სოფლებს წყალი არ მიეწოდებოდა.

- ვერაფერს გეტყვით, ჩემთვის უცნობია, რა მოხდა. ერთი რამ ვიცი ზუსტად: იშვიათად ხდება, რომ სააკაშვილი არა მხოლოდ ამ დონის დაპირებებს, არამედ გაცილებით მასშტაბურსაც არ ასრულებდეს. თუ ვინმემ მოიტყუა, ფული გამოიყო და არ გაკეთდა, დარწმუნებული ვარ, ეს ადამიანები მკაცრად აგებენ პასუხს.

ნათია დოლიძე

ყოველკვირეული გაზეთი ”ყველა სიახლე”

(გამოდის ხუთშაბათობით)