JOSS JP1 - შვიდწლიანი შრომის "ნაყოფი"

ავსტრალიის ქალაქ მელბურნში უკვე შვიდი წელია, რაც ადგილობრივი კომპანია JOSS Developments-ი სუპერქარზე მუშაობს და, როგორც იქნა, ამ ავტომობილის კონცეპტუალური ვერსია საკუთარ სამშობლოში ოფიციალურად წარმოადგინა.

სიახლემ მიიღო კოდური სახელწოდება JP1 და მას შესანიშნავი გამოხმაურება მოჰყვა.

ავტომობილს სპორტული სუპერავტომობილებისთვის დამახასიათებელი ნიშნები აქვს - წამყვანი უკანა ბორბლები, ძრავი ბაზაში, კარბონის კომპოზიტისგან დამზადებული მზიდი მონოკოკი და კევლარის ბოჭკოსგან დამზადებული ძარას პანელები.

ავსტრალიური სუპერქარი ალუმინის V8 ტიპის ძრავითაა აღჭურვილი და 500 ცხენის ძალას ავითარებს. მასთან 6-საფეხურიანი მექანიკური კოლოფია შეწყვილებული. მწარმოებელი ირწმუნება, რომ ამ ტანდემის მეშვეობით, ავტომობილი ადგილიდან 100 კმ/სთ სიჩქარეს 3 წამზე ნაკლებ დროში ავითარებს, მისი მაქსიმალური სიჩქარე კი 340 კმ/სთ-ს აღწევს.

ავსტრალიის ბაზარზე JOSS JP1, სავარაუდოდ, 500 000 ავსტრალიური დოლარი ეღირება, რაც 530 000 ამერიკული დოლარისა და 375 000 ევროს ექვივალენტია.

კოკა კვირკველია

რადიო "პალიტრა"