"დენზე ნაგვის გადასახადის მიბმა ან მგზავრობის საფასურის გაზრდა მუნიციპალიტეტის პასუხისმგებლობაა''

პარლამენტის ვიცესპიკერი და მმართველი პარტიის ერთერთი ლიდერი მიხეილ მაჭავარიანი ოპოზიციის საქმეებში არ ერევა და გვარწმუნებს, რომ მგზავრობის საფასური აღარ გაიზრდება.

ოპოზიცია ისევ დაბნეულია. ნაციონალურმა მოძრაობამ კი 2012 წლის არჩევნებისთვის მზადება აშკარად დაიწყო. თუმცა ექსპერტები მართულ ოპოზიციაზე საჯაროდ ალაპარაკდნენ და უკვე წინასწარ აცხადებენ, რომ საპარლამენტო არჩევნებში წარმატების შანსი მხოლოდ იმ პარტიებს აქვთ, ვინც ხელისუფლებასთან "გარიგებულია''. აკონტროლებს თუ არა ხელისუფლება ოპოზიციაში მიმდინარე პროცესებს, როგორ აფასებს 27 სექტემბერს ეროვნული ფორუმის მიერ ინიცირებულ "ქართველთა მარშს'' და, საერთოდ, ხედავს თუ არა მმართველი პარტია ოპოზიციაში რეალურ კონკურენტს, ამ და სხვა საკითხებზე "ვერსია'' საქართველოს პარლამენტის პირველ ვიცესპიკერს მიხეილ მაჭავარიანს ესაუბრა:

- ნაციონალურმა მოძრაობამ წინა არჩევნების დასრულების დღიდანვე დაიწყო შემდეგი არჩევნებისთვის მზადება და იმ დაპირებების შესრულება, რომელიც საზოგადოებას მისცა. ჩვენ, მართლაც, აქტიურად ვმუშაობთ, რათა საქართველო თანამედროვე და დემოკრატიული სახელმწიფო გახდეს. მიუხედავად იმისა, რომ ამ ხნის განმავლობაში ბევრ რამეს მივაღწიეთ, იმასაც კარგად ვხედავთ, რომ გარკვეული საკითხები ჯერ კიდევ მოსაგვარებელია.

- არ ფიქრობთ, რომ "ნაციონალურ მოძრაობას'' საკმარისი დრო ჰქონდა იმ დაპირებების ნახევარი მაინც პირნათლად შეესრულებინა, რითიც ხელისუფლებაში მოვიდა?

- შეიძლება ნახევარი არა, მაგრამ ძალიან დიდი ნაწილი კონკრეტული დაპირებებისა, შევასრულეთ. ვაღიარებთ, რომ ჯერ კიდევ ბევრი საკითხი დაგვრჩა მოსაგვარებელი. 2008 წელს პრეზიდენტი პენსიის 100 დოლარამდე გაზრდას დაჰპირდა და ჩვენ ამ მიმართულებით მივდივართ კიდეც. იცით, რომ წელს თბილისსა და რეგიონებში პენსია გათანაბრდა და ასი ლარი გახდა. ახლო მომავალში საზოგადოებას პენსიის ასდოლარიან პაკეტს შევთავაზებთ, რომელშიც დაზღვევის ელემენტებიც შევა. მთავრობასთან ამ საკითხზე მთელი ზაფხულის განმავლობაში ვიმუშავეთ. ჩვენი მიზანია საქართველოში სოციალური პრობლემები მოვაგვაროთ და დემოკრატიული გზით განვაგრძოთ ჩვენი ქვეყნის განვითარება.

- მაშინ, როცა თქვენ დემოკრატიული გზით მიდიხართ, თქვენი ოპონენტები სულ უფრო აქტიურად საუბრობენ რეპრესიებზე, არათანაბარი საინფორმაციო ველის არსებობაზე...

- ვერც ერთი ჩემი ოპონენტი ვერ იტყვის, რომ მისი ბრიფინგები არ შუქდება, მადლობა ღმერთს, ამის პრობლემა საქართველოში არ არსებობს. ჩართეთ "მეორე არხი'' და თავად დარწმუნდებით ამაში. რაც შეეხება ცენტრალურ ტელევიზიებს, მათ კომპეტენციაზე პასუხს ვერ ვაგებთ, რადგან ტელევიზიის ხელმძღვანელობა გადაცემების ფორმატს თავადვე წყვეტს. შეგახსენებთ, რომ ოპოზიციის მიერ ორგანიზებული ბოლო აქციები საზოგადოებრივი მაუწყებლის პირდაპირ ეთერში გადაიცემოდა.

- ალბათ, უკვე იცით, რომ მორიგი საპროტესტო მსვლელობის გამართვას 27 სექტემბერს "ეროვნული ფორუმი'' გეგმავს. როგორ აფასებთ ამ ინიციატივას?

- საქართველო დემოკრატიული ქვეყანაა და ყველას აქვს უფლება, საკუთარი აზრი გამოხატოს. ჩვენ არ ვაპირებთ, ამ ყველაფერში ჩავერთოთ და ვიკინკლაოთ.

- როგორც ჩანს, 27 სექტემბრის მარში თქვენთვის რეალურ საფრთხეს არ წარმოადგენს და ამიტომაც ხართ ასე მშვიდად.

- ჩვენ ყოველთვის მშვიდად ვართ. ხელისუფლებისთვის ახლა მარშებზე უფრო მნიშვნელოვანია, მოსახლეობისთვის იმ პრობლემების მოგვარება, რომლებიც მათ ყველაზე მეტად აწუხებს. თუ ჩვენს ოპონენტებს სურთ, თავიანთი მხარდამჭერების მობილიზება და კანონის ფარგლებში ქუჩაში გამოვიდნენ, ვერაფერს დავუშლით.

- ამ განცხადებას იმ ფონზე აკეთებთ, როცა 2007 წლის ნოემბერი საზოგადოებას ჯერ არ დავიწყებია? რომ არაფერი ვთქვათ, 26 მაისზე.

- 2007 წლის ნოემბრის შემდეგ ხელისუფლებამ ყველაზე რთული გამოცდა ჩააბარა, როცა ორი, საპრეზიდენტო და საპარლამენტო არჩევნები ჩაატარა. ზოგადად, დემოკრატიულ სახელმწიფოში ოპოზიციის როლი ძალიან მნიშვნელოვანია, მაგრამ რადგანაც ამ ეტაპისთვის ხელისუფლებას წარმოვადგენ, ჩემგან არასწორი იქნება მათზე საუბარი და ამიტომ თავს შევიკავებ და ჩემს ოპოზიციონერ კოლეგებს აღარ გავაკრიტიკებ. მთავარია, მათ სწორი გზა აირჩიონ და ცდუნებას არ აყვნენ.

- კონკრეტულად. რა ცდუნებაზე საუბრობთ და ოპოზიციისთვის სწორი გზა რომელია?

- მაგალითად, ჩემი აზრით, ის, რაც 2008 წელს მოხდა. არ იყო მართებული, როცა ოპოზიციის წარმომადგენლები პარლამენტში არ შემოვიდნენ. ამით მათ, რეალურად, ტრიბუნა და საკუთარი ამომრჩევლები დაკარგეს. მით უმეტეს, მაშინ ოპოზიციას საკმაოდ მრავალრიცხოვანი მხარდამჭერი ჰყავდა. საკუთარ თავში ეძებონ პრობლემები, ჩემი საქმე კი მათ კინკლაობაში ჩართვა ნამდვილად არ არის. იმ პარტიებმა, რომლებმაც ექსპერტებთან ერთად, საარჩევნო კოდექსთან დაკავშირებით ხელისუფლებასთან ერთად გააგრძელეს მუშაობა, ნათლად დაინახეს, რომ ჩვენ კომპრომისებისთვის მზად ვართ. დაინახეს, რომ პოლიტიკა შესაძლებლობების ხელოვნებაა.

- თუმცა, ოპოზიციასთან კომპრომისზე იმ დოზით არ წასულხართ, რომ თქვენი კოლეგები უპირატეს მდგომარეობაში თუ არა, თანაბარ მდგომარეობაში მაინც ჩაგეყენებინათ.

- რა დოზითაც შევთავაზეთ კომპრომისი, ხომ შევთავაზეთ? ნაწილმა ოპოზიციისა გადაწყვიტა, 2008 წლის მარტში დაშვებული შეცდომა აღარ გაემეორებინა და ჩვენს შეთავაზებას დათანხმებოდა. ანუ, არის ვარიანტი, რომელიც მიაჩნია ხელისუფლებას სწორად და არის მეორე ვარიანტი, რომელსაც ოპოზიცია მიიჩნევს მართებულად. ჩვენ ყოველთვის მზად ვართ, შუალედურ კომპრომისზე. 2008 წელს ოპოზიცია გაჯიქდა, არ გვინდა შუალედური კომპრომისიო და პარლამენტიდან გაიქცა. ჩვენ კი, ამ დროს მივიღეთ ის ვარიანტი, რომელიც სწორად მიგვაჩნდა. ამჯერად, ოპოზიციის ნაწილი, მიმაჩნია, რომ ძალიან სწორად მოიქცა, რადგან მარტო არ დაგვტოვა. შესაძლოა, ჩვენი შეთავაზება მათთვის საუკეთესო ვარიანტი არ იყო, მაგრამ ვფიქრობ, უარს ნამდვილად სჯობდა.

- რატომღაც, ცუდი ტონი იგრძნობა თქვენს სიტყვებში, თითქოს ოპოზიციას იმ მცირე დათმობასაც ამადლით, რაც შეიძლება ითქვას, "წაგგლიჯეს''.

- მთელ მსოფლიოში ასე ხდება. გაიხსენეთ ამერიკაში, ობამასა და რესპუბლიკელებს შორის დებატები ბიუჯეტთან. ობამას მუშტი კი არ დაუბრახუნებია, ასე იქნება და მორჩა, ან რესპუბლიკელებს კი არ უთქვამთ, ჩვენ უმრავლესობაში ვართ და საკითხი დახურულიაო, არამედ, მათ შორის კომპრომისი მოიძებნა. ორივე მხარე რომ გაჯიქებულიყო, ამერიკა დეფოლტში აღმოჩნდებოდა, ამიტომ ვფიქრობ, დიალოგი ხელისუფლებასა და ოპოზიციას შორის აუცილებელია და ეს ლიტონი სიტყვები არ არის. მთავარი, ამ ეტაპზე, მოსახლეობისთვის კარგი სიების შეთავაზებაა, რომლის გასასწორებლადაც სპეციალური ჯგუფი იქმნება კიდეც. არჩევნებამდე, ვფიქრობ, ეს პრობლემა აღმოიფხვრება. ჩვენ ნამდვილად გვინდა ჩავატაროთ ისეთი არჩევნები, რომელსაც შეფასებები მოჰყვება. ვითანამშრომლებთ როგორც ეუთოსთან, ასევე სხვა საერთაშორისო ორგანიზაციებთანაც. მთავარია, საზოგადოებას ჰქონდეს იმის შეგრძნება, რომ არჩევნებმა სამართლიან გარემოში ჩაიარა.

- რას ელით 2012 წლის საპარლამენტო არჩევნებისგან, კვლავ საპარლამენტო უმრავლესობას?

- ამაზე საუბარი, ალბათ, ჯერ ადრეა. მთავარია, ჩვენ არჩევნებამდე თითოეული დღე უნდა გამოვიყენოთ, უმუშევრობა რომ შევამციროთ და გაზრდილი ფასების გამო ხალხს ცხოვრება შევუმსუბუქოთ.

- საკვებ პროდუქტებზე გაზრდილი ფასების შემსუბუქებაზე საუბრობთ, რომლის ხელოვნურად გაზრდაში თქვენი ოპონენტები გადანაშაულებენ.

- მე შენახული მაქვს მსოფლიო ბანკის მონაცემები, სადაც აღნიშნულია, რომ მსოფლიოში, ბოლო სამი წლის განმავლობაში, საკვებ პროდუქტებზე ფასები 30%-ით გაიზარდა. მსოფლიოში რომ ფასები იზრდება, ეს ხომ ჩვენი მთავრობის ბრალი არ არის? უბრალოდ, ეს არის მორიგი ბრალდება ციკლიდან - ყველაფერი ამათი ბრალია.  

- ისევ ოპოზიციას დავუბრუნდეთ. მათ შორის რეალურ კონკურენტს ხედავთ?

- მთავარი კონკურენტი პრობლემა უმუშევრობაა. თუ ჩვენ შევძლებთ ამ პრობლემის მოგვარებას, კონკურენტი არ გვეყოლება.

- ასე არასერიოზულად აღიქვამთ ოპოზიციის შესაძლებლობებს?

- ყველა ოპოზიციური პარტია, მეტნაკლებად, ჩვენს კონკურენტად შეიძლება ჩაითვალოს, მაგრამ თქვენ ხომ რეალურ კონკურენტზე მკითხეთ? მოგატყუებთ, რომ გითხრათ, ოპოზიციაში მიმდინარე პროცესებს თვალს არ ვადევნებ-მეთქი, მაგრამ მათი შესაძლებლობების შეფასება ჩემი საქმე არ არის. ისინი თვითონ მოაგვარებენ და დაარეგულირებენ იმ პრობლემებს, რაც აქვთ. ჩვენ კი ჩვენი საქმეები გვაქვს გასაკეთებელი. პარლამენტი ისედაც რთულ მდგომარეობაშია. საზოგადოებისთვის ჩვენ ღია სტრუქტურა ვართ და ამიტომ ყველა მწვავე პრობლემა ჩვენსკენ მოდის ხოლმე. ასე რომ, პარლამენტის წევრობა საკმაოდ რთულია და ძალიან დიდ პასუხისმგებლობას გულისხმობს. თუმცა, თუ გადაწყვეტ, რომ ამ მიმართულებით იმუშაო, ყველაფერი უნდა გააკეთო, საკუთარ ამომრჩეველს იმედი რომ არ გაუცრუო. ისიც უნდა ითქვას, რომ პარლამენტს თავისი კომპეტენცია აქვს, მუნიციპალიტეტს კი თავისი და ორივე ცალ-ცალკე საკუთარი ამომრჩევლის წინაშე წარსდგება.  

- რას გულისხმობთ, საზოგადოებისთვის მნიშვნელოვან საკითხებზე ერთმანეთთან არ თანხმდებით, თქვენ ხომ "ერთი გუნდი'' ხართ?

- რა თქმა უნდა, მაგრამ დენის გადასახადზე ნაგვის გადასახადის მიბმა ან სამარშრუტო ავტობუსებით მგზავრობის საფასურის გაზრდა, მუნიციპალიტეტის პასუხისმგებლობაა. გიგი უგულავა თავის სფეროზე აგებს პასუხს. სხვათა შორის, როცა დენზე ნაგვის გადასახადის მიბმაზე მიიღო მერიამ გადაწყვეტილება, ძალიან ბევრი ვიკამათეთ, მაგრამ გიგის არგუმენტები მაშინ უფრო დამაჯერებელი აღმოჩნდა. სამარშრუტო ტაქსებით მგზავრობას რაც შეეხება, გავრცელდა ხმები, რომ მგზავრობის გადასახადი კიდევ გაიზრდება. ამ საკითხთან დაკავშირებით, საკმაოდ მნიშვნელოვან შეთანხმებას მივაღწიეთ და გარწმუნებთ, მგზავრობის გადასახადი აღარ მოიმატებს.

რუსუდან შელია

გაზეთი "ვერსია"