რესპონდენტთა 47%-ის აზრით, საპარლამენტო არჩევნები მეტ-ნაკლებად კარგად ჩატარდება

გამოკითხულთა 47%-ის აზრით, მომავალი საპარლამენტო არჩევნები მეტ-ნაკლებად კარგად ჩატარდება, - ასეთია NDI-ს მიერ ჩატარებული სოციოლოგიური გამოკითხვის შედეგები, რომლის პრეზენტაციაც სასტუმრო "თბილისი მარიოტში" დღეს გაიმართა.

კითხვაზე, როგორ ჩატარდება მომავალი საპარლამენტო არჩევნები, რესპონდენტთა პასუხები შემდეგნაირად გადანაწილდა: 13% მიიჩნევს, რომ არჩევნები ძალიან კარგად, 47%-ის აზრით, მეტ-ნაკლებად კარგად ჩატარდება, 18%-ს აზრით კი, ნაწილობრივ გაყალბდება. არჩევნების სრულად გაყალბებას კი გამოკითხულთა 3% ვარაუდობს. შეკითხვაზე პასუხების კატეგორია "არ ვიცი" შემოხაზა 10%-მა.

ამასთან, კითხვაზე, რა არის 3 უმთავრესი დამაბრკოლებელი ფაქტორი სამართლიანი არჩევნებისთვის, გამოკითხულთა 22% ასეთად ამომრჩევლის მოსყიდვას მიიჩნევს, 18%-ის აზრით, ეს დაკავშირებულია ამომრჩეველთა სიებთან, 17% ფიქრობს, რომ არჩევნების სამართლიანად ჩატარებისთვის ერთ-ერთი მთავარი დამაბრკოლებელი ფაქტორი საარჩევნო ყუთებში ზედმეტი ბიულეტენების ჩაყრაა.

"ინტერპრესნიუსი"