რესპონდენტთა 27% შემდეგ პრეზიდენტად "ნაციონალების" კანდიდატს ისურვებდა, 12% - ივანიშვილის მიერ მხარდაჭერილ კანდიდატს, 4% კი - სააკაშვილს

NDI-ის კვლევის მიხედვით, კითხვაზე - ყველაზე მეტად ვის ისურვებდით საქართველოს შემდეგ პრეზიდენტად, გამოკითხულთა 27% "ნაციონალური მოძრაობის" კანდიდატს ასახელებს , 12% ბიძინა ივანიშვილის მიერ მხარდაჭერილ კანდიდატს, 4% კი - მიხეილ სააკაშვილს.

როგორც NDI-ის საქართველოს ოფისის დირექტორმა ლუის ნავარომ განაცხადა, იმის მიუხედავად, რომ რესპონდენტებს განემარტათ, რომ მიხეილ სააკაშვილს მესამე ვადით წილისყრის უფლება არ ჰქონდა, მათ მაინც სააკაშვილი დაასახელეს.

გამოკითხულთა 3% საქართველოს შემდეგ პრეზიდენტად გიორგი თარგამაძეს ისურვებდა, 2% - არც ერთ კანდიდატს, 28% პასუხობს, რომ არ იცის, ხოლო 21 % პასუხზე უარს აცხადებს.

კითხვაზე – ხვალ რომ საპრეზიდენტო არჩევნები იყოს, მიიღებდით თუ არა მონაწილეობას – 77% პასუხობს, რომ არჩევნებში მონაწილეობას მიიღებდა, ხოლო 23%– არა. პროცენტული მაჩვენებლები ანალოგიურად გადანაწილდა საპარლამენტო არჩევნებთან დაკავშირებითაც.

NDI-ის კვლევის საველე სამუშაოები ჩატარდა 31 ივლისიდან - 12 აგვისტოს პერიოდში, საქართველოს მასშტაბით 2038 პირისპირ ინტერვიუს წარმომადგელობითი შერჩევის საფუძველზე.

კვლევებს აფინანსებს შვედეთის საერთაშორისო განვითარების თანამშრომლობის სააგენტო (Sida) და ატარებს კავკასიის კვლევითი რესურსების ცენტრი (CRRC).

პარტიების რეიტინგების პრეზენტაცია NDI-მ დღეს გამართა.