საპროტესტო აქციის მონაწილეებმა მელიქიშვილის გამზირი გადაკეტეს

ფილარმონიასთან მიმდინარე საპროტესტო აქციის მონაწილეებმა მელიქიშვილის გამზირი გადაკეტეს.

გადაწყვეტილება აქციის ორგანიზატორებმა რამდენიმე წუთის წინ მიიღეს. ამ დროისთვის გამზირზე ავტომანქანების მოძრაობა შეჩერებულია. გარდა ამისა, როგორც აქციაზე დაჩი ცაგურიამ განაცხადა, შესაძლოა, მომიტინგეებმა მოაწყონ საპროტესტო მსვლელობა, თუმცა რა მიმართულებით, არ დაუკონკრეტებია. აქციაზე დაჩი ცაგურიამ შსს მინისტრის ბაჩო ახალაიას გადადგომის მოთხოვნა დააყენა.

"ბაჩო ახალაია არის იმ სისტემის შემქმნელი, რაც დღეს სასჯელაღსრულების სფეროში ყველაზე მთავარ პრობლემას წარმოადგენს. სანამ ის არ წავა, პატიმრები იქნებიან იგივე პირობებში, რაშიც ახლა", - დასძინა ცაგურიამ.

ფილარმონიასთან მიმდინარე აქციის მონაწილეები სკანდირებენ "არ აწამო". ასევე აქციის ლოზუნგია - "არ გაჩუმდე, არ დაფარო, არ შეეგუო, გამოიძიე".

"ინტერპრესნიუსი"