პატიმრების წამების ბრალდებით გლდანის ციხის კონტროლიორი დააკავეს

პატიმრების წამებაში ბრალდებული კიდევ ერთი პირი დააკავეს. როგორც პროკურატურაში დღეს გამართულ ბრიფინგზე პროკურორმა შოთა ტყეშელაშვილმა განაცხადა, დაკავებულია ბრალდებული მამუკა ჩხიტუნიძე, რომელიც გლდანის მე-8 საპყრობილის კონტროლიორი იყო. პროკურორის ინფორმაციით, მას ბრალად ედება საქართველოს სისხლის სამართლის კოდექსის 144" მუხლით გათვალისწინებული დანაშაული, რომელიც წამებას გულისხმობს.

პროკურორის ინფორმაციით, სულ ამ დროისთვის დაკავებულია 12 პირი. დაკითხულია სასჯელაღსრულების დეპარტამენტის ყოფილ და მოქმედ მოხელეთა დიდი ნაწილი. მისი თქმით, გამოძიება გრძელდება და მისი მიმდინარეობისას  საზოგადოებას პერიოდულად მიეწოდება ინფორმაცია.

ამასთან, პროკურორის თქმით, ამ დროისთვის სასჯელღასრულების დეპარტამენტის თანამშრომელთა მიერ პატიმართა წამებისა და მათ მიმართ არაადამიანური მოპყრობის გამოძიების ფარგლებში გამოვლენილია მძიმე მეთოდებისა და ხერხების გამოყენებით წამებისა და არაადამიანური მოპყრობის სხვა ფაქტებიც. პროკურორის განცხადებით, გამოძიების მიზანია, ყველა დამნაშავე წარსდგეს მართლმსაჯულების წინაშე.

"ინტერპრესნიუსი"