მიხეილ სააკაშვილი ე.წ. "კანონიერ ქურდებს" ურჩევს "თვითმფრინავის ბილეთები უკან ჩააბარონ, რადგან საქართველოში მათ არავინ ელოდება"
მინდა ვუთხრა კარგად დავიწყებულ ე.წ. "კანონიერ ქურდებს", შეუძლიათ თვითმფრინავის ბილეთები ჩააბარონ უკან, საქართველოში მათ არავინ ელოდება, - ამის შესახებ საქართველოს პრეზიდენტმა ბორის პაიჭაძის სახელობის ეროვნულ სტადიონზე, მხარდამჭერებთან შეხვედრისას განაცხადა.
მიხეილ სააკაშვილმა არჩევნების თემაზე ისაუბრა და აღნიშნა, რომ სამ დღეში საქართველო უმნიშვნელოვანეს არჩევანს აკეთებს.
"მე მინდა ვუთხრა კარგად დავიწყებულ ე.წ. "კანონიერ ქურდებს", შეუძლიათ თვითმფრინავის ბილეთები ჩააბარონ უკან, საქართველოში მათ არავინ ელოდება. სამ დღეში საქართველო აკეთებს უმნიშვნელოვანეს არჩევანს, რომელიც განსაზღვრავს ჩვენი ქვეყნის მომავალს. არჩევანს, რომელიც შეეხება ყველა ყველა ქალაქსა და ყველა ოჯახს. პირველი ოქტომბერი თანაბრად მნიშვნელოვანი დღეა როგორც ჩვენი სახელმწიფოებრიობისთვის, ისე საზოგადოების თითოეული წევრისთვის და ალბათ აქამდე არასდროს ვმდგარვართ ასეთი მკაფიო არჩევანის წინაშე", - განაცხადა მიხეილ სააკაშვილმა.
მისივე თქმით, პირველი ოქტომბერი არის არჩევანი წარსულსა და მომავალს შორის. "პირველ ოქტომბერს ჩვენ უნდა გავცეთ პასუხი მარტივ შეკითხვას - გვინდა თუ არა გავაგრძელოთ წინსვლა თუ დავიწყოთ უკუსვლა, გვინდა შევინარჩუნოთ თვისუფლება კრიმინალებისგან, ქურდებისგან, ძალადობისგან, თუ თანახმა ვართ ისევ დავიდოთ ხელზე ბორკილები, რომელიც დავამსხვრიეთ 2003 წელს და ჩავბარდეთ განუკითხაობასა და ქაოსს? ეს არის დიდი არჩევანი და მე მჭირდება თქვენი დახმარება", - მიმართა სააკაშვილმა მხარდამჭერებს.
ამასთან, პრეზიდენტმა გასულ კვირას პატიმართა წამების შესახებ გავრცელებულ ვიდეოჩანაწერებზეც ისაუბრა და განაცხადა, რომ ხელისუფლება პრობლემებს არა თუ გაექცა, არამედ მას თვალი გაუსწორა.
"გასულ კვირას ყველამ შევიტყვეთ საშინელი ამბავი და ვნახეთ სულისშემძვრელი ფაქტები უპატიებელი დანაშაულების შესახებ. ჩვენი პასუხი არ იყო გაქცევა, დამალვა და პრობლემებისთვის თავის არიდება. ჩვენი პასუხი იყო პრობლემისთვის თვალის გასწორება, ამიტომაც დატოვა ორმა მინისტრმა პოსტი, ამიტომაც დაიწყო გამოძიება, ამიტომაც დაინიშნა სასჯელაღსრულების მინისტრად სახალხო დამცველი, რომელიც ყველაზე დიდი კრიტიკოსი იყო სისტემის. ასე პასუხობს, ევროპულად პასუხობს საქართველო ყველაზე რთულ გამოწვევას, რომელიც შეიძლება მოხდეს ნებისმიერი ქვეყნის ნებისმიერ სისტემაში. ჩვენ პრობლემას ვუპასუხეთ როგორც გაზრდილმა, თანამედროვე, 21-ე საუკუნის ქვეყანამ", - განაცხადა სააკაშვილმა.
LIVE: გია ხუხაშვილი "ნიუსრუმიდან"
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
