ე.წ. გადასატანი საარჩევნო ყუთის მეშვეობით კენჭისყრის პროცედურა არჩევნების დღეს 09:00-დან 19:00 საათამდე იწარმოებს

ე.წ. გადასატანი საარჩევნო ყუთის მეშვეობით კენჭისყრის პროცედურა არჩევნების დღეს 09:00 საათიდან დაიწყება და 19:00 საათზე დასრულდება.

გადასატანი საარჩევნო ყუთის მეშვეობით ხმას აძლევენ და შესაბამისი სია დგება ამომრჩეველთა ერთიანი და სპეციალური სიების საფუძველზე, თუ ამომრჩეველს შეზღუდული შესაძლებლობის ან ჯანმრთელობის მდგომარეობის გამო კენჭისყრის შენობაში მისვლა დამოუკიდებლად არ შეუძლია; თუ ამომრჩეველი იმყოფება პატიმრობაში; თუ წევს საავადმყოფოში ან სხვა სტაციონარულ სამკურნალო დაწესებულებაში და მასში საარჩევნო უბანი არ იხსნება.

გარდა ამისა, გადასატანი საარჩევნო ყუთით ხმას აძლევს სამხედრო მოსამსახურე, რომელიც სახელმწიფო საზღვარზე განლაგებულ ისეთ სამხედრო ნაწილში მსახურობს, რომელიც საარჩევნო უბნიდან შორსაა განლაგებული და მასში საარჩევნო უბანი არ იხსნება. მისით სარგებლობის შესაძლებლობას კანონი ისეთ ამომრჩეველსაც აძლევს, რომელიც საარჩევნო უბნის ტერიტორიაზე იმყოფება, მაგრამ ძნელად მისადგომ ადგილას.

ამომრჩეველი გადასატანი საარჩევნო ყუთის მეშვეობით ხმის მიცემის მოთხოვნით საუბნო საარჩევნო კომისიას კენჭისყრის დღემდე ორი დღით ადრე მაინც უნდა მიმართოს. კენჭისყრის დღეს სტაციონარულ სამკურნალო დაწესებულებაში მყოფი ამომრჩევლის შესახებ ინფორმაციას საოლქო საარჩევნო კომისია შესაბამის საუბნო საარჩევნო კომისიას გადასცემს კენჭისყრის დღემდე არა უგვიანეს ორი დღისა.

ამომრჩეველი გადასატანი საარჩევნო ყუთის სიაში შეჰყავთ მას შემდეგ, რაც: საუბნო საარჩევნო კომისიის მდივანი სარეგისტრაციო ჟურნალში რეგისტრაციაში გაატარებს და ხელმოწერით დაადასტურებს ამომრჩევლის წერილობით განცხადებას ან სატელეფონო ზეპირ განცხადებას, სატელეფონო შეტყობინების ზუსტი დროისა და შესაბამისი ტელეფონის ნომრის მითითებით; ამომრჩეველთა ერთიან ან სპეციალურ სიაში აღინიშნება ამომრჩევლის გადაყვანა გადასატანი საარჩევნო ყუთის სიაში, რაც დასტურდება საუბნო საარჩევნო კომისიის თავმჯდომარისა და კომისიის მდივნის ხელმოწერებით.

გადასატანი საარჩევნო ყუთის სიაში შესაყვანი ამომრჩევლების შესახებ ინფორმაცია დაუყოვნებლივ უნდა გამოიკრას საარჩევნო უბანში თვალსაჩინო ადგილზე. საუბნო საარჩევნო კომისიის წევრებს, საარჩევნო სუბიექტის წარმომადგენლებსა და დამკვირვებლებს უფლება აქვთ, გადაამოწმონ გადასატანი საარჩევნო ყუთის მეშვეობით ხმის მიცემის მოთხოვნის საფუძვლიანობა და არჩევნების დღემდე ნებისმიერ დროს დასვან საუბნო საარჩევნო კომისიის წინაშე ამ პირების გადასატანი საარჩევნო ყუთის სიაში შეყვანის მიზანშეწონილობის საკითხი.

გადასატანი საარჩევნო ყუთის მეშვეობით ხმის მიცემის პროცესზე ვრცელდება ყველა პროცედურა, რომლებიც დაკავშირებულია საარჩევნო უბანზე ხმის მიცემასთან; იდენტურია წარმომადგენლისა და დამკვირვებლის უფლებამოსილებებიც.

გადასატანი საარჩევნო ყუთი საარჩევნო უბანში უნდა დაბრუნდეს არა უგვიანეს 20 საათისა.

"ინტერპრესნიუსი"