არჩევნები ბუქარესტის საარჩევნო უბანზე ჩაიშალა, მარტვილში კი - ამომრჩეველთა სია გაიტაცეს

ცენტრალური საარჩევნო კომისიის ინფორმაციით, საპარლამენტო არჩევნები ბუქარესტის საარჩევნო უბანზე ჩაიშალა.

როგორც ცესკოს სპიკერმა ეკა აზარაშვილმა ბრიფინგზე განაცხადა, ბუქარესტის საარჩევნო უბანზე კომისიის 7 წევრიდან ორი ჯანმრთელობის გაუარესების გამო არ გამოცხადდა. მისი თქმით, ამ უბანზე სულ 24 ამომრჩეველია რეგისტრირებული.

აზარაშვილის ინფორმაციით, ინციდენტი მოხდა რუსთავის ოლქის მე-16 უბანზე, სადაც საუბნო კომისიის თავმჯდომარეს ფიზიკური შეურაცხყოფა მიაყენეს და ის მუშაობას ვეღარ აგრძელებს. მის მოვალეობას მოადგილე ასრულებს, საქმეს კი სამართალდამცავები იძიებენ.

მისი ცნობით, მარტვილის ოლქის მე-3 საარჩევნო უბანზე იმ ამომრჩევლების სია გაიტაცეს, რომლებიც ხმას გადასატანი ყუთით აძლევენ. აზარაშვილის განმარტებით სია დაბრუნებულია, საარჩევნო პროცესი გრძელდება და გამოძიება მიმდინარეობს

დარღვევა მოხდა საჩხერის ოლქის 25-ე და 53-ე უბნებზეც, სადაც ორივე უბანზე რეგისტრატორის ბეჭდები ერთი და იმავე ნომრით - 25-ით მიიტანეს. აზარაშვილის თქმით, ამ ინციდენტს საარჩევნო პროცესი არ შეუფერხებია.

აზარაშვილმა განმარტება გააკეთა იმის შესახებ თუ რატომ არის ზოგიერთ უბანზე ბიულეტენების რაოდენობა ამომრჩეველთა რაოდენობაზე ნაკლები. მისი თქმით, როდესაც სიაში არის ჩანაწერი - "იმყოფება საზღვარგარეთ, ან "პატიმრობაშია" ან "სამხედრო სამსახურშია" - ასეთი ამომრჩევლებისთვის განკუთვნილი ბიულეტენები საერთო რაოდენობას აკლდება.

"ინტერპრესნიუსი"