სერგეი უდალცოვი - გვარი თარგამაძე პირველად მესმის

რუსეთის "მემარცხენე ფრონტის" ლიდერი სერგეი უდალცოვი კატეგორიულად უარყოფს, რომ რუსეთში საპროტესტო მოძრაობა საზღვარგარეთიდან ფინანსდება, ის ხვდება შუამავლებს საქართველოდან და ოპოზიცია ძალისმიერი სცენარისთვის ემზადება.

"ყველაფერი, რისი თავსმოხვევაც "ენ-ტე-ვეს" სურს, ბოდვაა. "ენ-ტე-ვე" ჯერ კიდევ გაზაფხულზე ამტკიცებდა, რომ პროტესტი საზღვარგარეთიდან ფინანსდებოდა. ახლა გამოჩნდნენ რაღაც ქართული სამსახურები, ბანკირი ბოროდინი და ასე შემდეგ. პირდაპირ გეტყვით: ბოლო წლების განმავლობაში რუსეთის ფედერაცია არ დამიტოვებია, არანაირ ოლიგარქებთან და სპეცსამსახურების თანამშრომლებთან ურთიერთობა არ მქონია, გვარი თარგამაძე პირველად მესმის", - განუცხადა რუსულ მედიას უდალცოვმა.

რუსულმა ტელეკომპანია "ენ-ტე-ვემ" 2008-2012 წლების მოწვევის საქართველოს პარლამენტის თავდაცვისა და უშიშროების კომიტეტის თავმჯდომარის, გივი თარგამაძისა და რუსეთის "მემარცხენე ფრონტის" ლიდერის, სერგეი უდალცოვის შეხვედრის ამსახველი ფარული ვიდეოჩანაწერი გაავრცელა.

ვიდეოჩანაწერი ნაჩვენებია ფილმში - "ანატომია 2", რომელიც მოსკოვში რუსეთის ოპოზიციის აქციებს ეძღვნება.

რუსული მედიის ცნობით, "ენ-ტე-ვეს" ეთერში გასული ვიდეოჩანაწერის მიხედვით, გივი თარგამაძესა და სერგეი უდალცოვს რუსეთში რევოლუციის ორგანიზება სურთ. მისი მიხედვით, რევოლუცია შესაძლოა, კალინინგრადში დაიწყოს, სადაც რუსეთი დამატებით ჯარებს ვერ გადაისვრის, რადგან ამის გაკეთება ნატო-ს წევრი ქვეყნების ტერიტორიის გავლით მოუწევს.

ფილმის ავტორების მტკიცებით, ოპოზიციის მხარდასაჭერად და რევოლუციის მოსაწყობად ფინანსების გაღებისთვის მზად არის "მოსკოვის ბანკის" ყოფილი პრეზიდენტი ანდრეი ბოროდინი. "ანატომია 2"-ის ავტორებმა საქართველოსთან ბოროდინიც დააკავშირეს - მათი მტკიცებით, ბოროდინი მზად არის, საქართველოში საცხოვრებლად გადავიდეს, თუ ლონდონში დარჩენა არ გამოუვა.

"ინტერპრესნიუსი"