ირაკლი ღარიბაშვილი - დანაშაულთან მიმართებაში ნულოვანი ტოლერანტობის პოლიტიკა შენარჩუნდება

პოლიცია, უპირველეს ყოვლისა, პოლიტიკისგან გათავისუფლდება და ხალხისა და ქვეყნის სამსახურში ჩადგება, - ამის შესახებ ჟურნალისტებს შს მინისტრობის კანდიდატმა, ირაკლი ღარიბაშვილმა განუცხადა.

მისივე განმარტებით, დანაშაულთან მიმართებაში ნულოვანი ტოლერანტობის პოლიტიკა შენარჩუნდება და ვერავითარი კრიმინალი საქართველოში ფეხს ვეღარ მოიკიდებს.

გარდა ამისა, ღარიბაშვილის განმარტებით, სამინისტროს ყველა კეთილსინდისიერი თანამშრომელი თანამდებობას შეინარჩუნებს. მინისტრობის ახალი კანდიდატი მედიას მაქსიმალურ გახსნილობასა და გამჭვირვალობას დაჰპირდა.

"აქამდე პოლიციის შენობები იყო გამჭვირვალე, თუმცა შიგნით გაუმჭვირვალე ამბები ხდებოდა. ამიერიდან ჩვენ პასუხიმგებლები ვართ ქართველი ხალხის წინაშე, დაგეგმილია ძალიან ბევრი რეფორმა, არავითარი პოლიტიკური დევნა არ იქნება და მე ვარ გარანტი იმისა, რომ ყველა ის პირი, ვინც ხალხს და სამშობლოს კეთილსინდისიერად ემსახურება, თანამდებობაზე დარჩება", - აღნიშნა ირაკლი ღარიბაშვილმა.

მისივე განმარტებით, სამინისტროში უახლოეს დღეებში მივა და მუშაობის სპეციფიკას უფრო ახლოს გაეცნობა.

"ინტერპრესნიუსი"