მანანა მანჯგალაძე - "შენობა, სადაც პრეზიდენტის ადმინისტრაცია ფუნქციონირებს, მოქალაქე მიხეილ სააკაშვილის კუთვნილება არ არის"
საქართველოს პრეზიდენტის ადმინისტრაცია მიხეილ სააკაშვილისადმი პრემიერ-მინისტრის დღევანდელ მოწოდებას ეხმაურება და საქართველოს მთავრობას განსხვავებული აზრის მქონე ინსტიტუტების არსებობასთან შეგუებისკენ მოუწოდებს.
როგორც პრეზიდენტის პრესსპიკერმა მანანა მანჯგალაძემ საგანგებო ბრიფინგზე განაცხადა, შენობა, სადაც პრეზიდენტის ადმინისტრაცია ფუნქციონირებს, მოქალაქე მიხეილ სააკაშვილის კუთვნილება არ არის.
"საქართველოს პრეზიდენტის ინსტიტუტი ჩვენი ქვეყნის კონსტიტუციური წყობილების მნიშვნელოვანი ნაწილია. შენობა, სადაც ფუნქციონირებს პრეზიდენტის ადმინისტრაცია, მოქალაქე მიხეილ სააკაშვილის კუთვნილება არ გახლავთ, ეს გახლავთ საქართველოს პრეზიდენტის ადმინისტრაცია. სხვადასხვა სახელმწიფო ინსტიტუტების ნორმალური ფუნქციონირება ყველა ცივილიზებული ქვეყნის დემოკრატიული ნაწილია. საქართველოს შემთხვევაშიც ეს ჩვენი ქვეყნის, ქართული დემოკრატიის ნაწილია. ასევე, ჩვენი ქვეყნის დემოკრატიის ნაწილია შეუთანხმებლობის მიუხედავად განსხვავებული აზრის მქონე ინსტიტუტების არსებობისადმი შეგუება. ვთვლით, რომ ეს არის კარგი და სწორი ჩვენი ქვეყნის შემდგომი დემოკრატიული განვითარებისთვის. იმედს გამოვთქვამთ, რომ ახალი მთავრობა გარდამავალ პროცესს ისევე ცივილურად მიუდგება, როგორც საქართველოს პრეზიდენტი და წინა მთავრობა", - განაცხადა პრეზიდენტის სახელით მანანა მანჯგალაძემ.
მან კონსტიტუციით გათვალისწინებული ის დებულებაც განმარტა, რომლის მიხედვითაც პრეზიდენტს უფლებამოსილების ვადა 2013 წლის ოქტომბრამდე აქვს. "ასევე სრულიად ნათელია, რომ საქართველოს კონსტიტუციით პრეზიდენტს უფლებამოსილების ვადა ახალი პრეზიდენტის არჩევის შემდეგ ეწურება, ახალი არჩევნები კი შედგება 2013 წლის ოქტომბერში. ეს იგივე კონსტიტუცია და იგივე ვადაა, რომლითაც აირჩა ამჟამინდელი პარლამენტი და შეიქმნა ახალი უმრავლესობა, მაშინ კი, საკონსტიტუციო ვადებთან დაკავშირებით კითხვები არ დასმულა", - აღნიშნა მანჯგალაძე.
LIVE: გია ხუხაშვილი "ნიუსრუმიდან"
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
