ბიძინა ივანიშვილი - ევროკომისიის პრეზიდენტი დავარწმუნე, რომ ადამიანის უფლებების დაცვისთვის ყველაფერს გავაკეთებთ

ახალი მთავრობა, რომლის მეთაურსაც მე წარმოვადგენ, ძირითად პრიორიტეტად მიიჩნევს ევროინტეგრაციას, - ამის შესახებ ბრიუსელში ვიზიტით მყოფმა საქართველოს პრემიერ-მინისტრმა ბიძინა ივანიშვილმა ევროკომისიის პრეზიდენტ ჟოზე მანუელ ბაროზოს შეხვედრის შემდეგ განაცხადა.

მისი თქმით, საუბარი იმ საკითხებს შეეხებოდა, რაც საქართველო-ევროკავშირის დღის წესრიგშია.

"შეხვედრაზე კიდევ ერთხელ დავაფიქსირე, რომ ახალი მთავრობა, რომლის მეთაურსაც მე წარმოვადგენ, ძირითად პრიორიტეტად მიიჩნევს ევროინტეგრაციას და ყველაფერს გავაკეთებთ იმისთვის, რომ გავაღრმავოთ და დავაჩქაროთ ეს პროცესი.

განვიხილეთ ყველა ის ძირითადი საკითხი, რომელიც საქართველო-ევროკავშირის დღის წესრიგშია. გავაანალიზეთ დინამიკა და დავსახეთ ჩვენი ურთიერთობის რაც შეიძლება სწაფად განვითარების ამოცანები. ორივემ აღვნიშნეთ დიდი ინტერესი 2013 წლის ვილნიუსის სამიტთან დაკავშირებით და განვაცხადე, რომ საქართველო ყველაფერს გააკეთებს იმისთვის, რათა მოახერხოს და შეასრულოს ის ამოცანები, რაც აღმოსავლეთ პარტნიორობის საგზაო რუკის მოქმედებების გეგმის მიხედვითაა დასახული", - განაცხადა ბიძინა ივანიშვილმა.

მისივე განმატებით, ვილნიუსის სამიტამდე საქართველოს მთავარ ამოცანას ევროკავშირთან ასოცირების შესახებ შეთანხმების ხელმოწერა წარმოადგენს.

"ასევე, უნდა მოვახერხოთ და ყველა სფეროს მომცველი თავისუფალი სავაჭრო ურიერთობები გავაფორმოთ ევროპასთან. ჩვენი მიზანია, თავისუფალი სავიზო რეჟიმის დაწყების განხილვაც. 3 დეკემბერს ევროკომისარ სესილია მალმსტრემს ველოდებით, რომელიც თავისუფალ სავიზო მიმოსვლასთან დაკავშირებით გეგმას წარმოგვიდგენს. ვეცდებით ის შევასრულოთ, რომ ვილნიუსის სამიტამდე მივიღოთ რეალური გეგმები", - აღნიშნა საქათველოს პრემიერ-მინისტრმა.

ამასთან, ივანიშვილის თქმით, მან ევროკომისიის პრეზიდენტი დაარწმუნა იმაშიც, რომ ახალი ხელისუფლება ყველაფერს გააკეთებს, რათა საქართველოში ადამიანის უფლებები დაცული, დემოკრატიული ინსტიტუტები კი ძლიერი იყოს.

"ინტერპრესნიუსი"