მთავარ პროკურატურაში ლევან კალაძის მკვლელობის საქმეზე დღეს საჩივარი შევა

საქართველოს მთავარ პროკურატურაში ლევან კალაძის გატაცებისა და მკვლელობის საქმის ხელახლა გამოძიების მოთხოვნით საჩივარი შევა, - ამის შესახებ "ინტერპრესნიუსს" ადვოკატმა ირმა ჭკადუამ განუცხადა. მისივე განმარტებით, საქმეზე მსჯავრდებული ლევან ცინცაძე, რომელიც 25 წლიან სასჯელს იხდის, საჩივარში მტკიცებულებების გაყალბებაზე საუბრობს და დანაშაულთან კავშირს უარყოფს.

"საქმეში არსებობს მთელი რიგი უზუსტობები. მათ შორის სასაფლაოს დირექტორის ჩვენებაც, რომელიც ყვება, რომ იმ ღამეს, როდესაც თითქოს ლევან კალაძის გვამი აღმოაჩინეს, ორთაჭალის სასაფლაოზე 125-მდე ცხედარი ამოთხარეს. საქმე ამისულაშვილის ჩვენების საფუძველზე გაიხსნა, თუმცა არსებობს მტკიცებულებები, რომ იგი გატაცებული ჰყავდათ შინაგან საქმეთა სამინისტროს მაღალჩინოსნებს, აწამებდნენ, რის შემდეგაც დაიდგა ეს სპექტაკლი. გარდა ამისა, იმ პერიოდში, როდესაც დანაშაული მოხდა, ლევან ცინცაძე ავად იყო და არსებობს ამის დამადასტურებელი სამედიცინო ცნობებიც. შესაბამისად, ვითხოვთ რეალურ გამოძიებას", - აღნიშნა ირმა ჭკადუამ.

მისივე ინფორმაციით, საჩივარს კალაძის საქმის ხელახლა გამოძიების მოთხოვნით მთავარ პროკურატურაში დღეს, 11:30 საათზე შეიტანს.

"ინტერპრესნიუსი"