გიორგი თარგამაძე - ახალი მთავრობა საარჩევნო დაპირებებისგან თავს ასე მარტივად ვერ დააღწევს

"ქრისტიან-დემოკრატიული მოძრაობის" ლიდერი გიორგი თარგამაძე მზად არის, ახალ მთავრობას ტარიფებთან დაკავშირებით კონსულტაციები გაუწიოს.

როგორც "ინტერპრესნიუსს" თარგამაძემ "კავკასიურ სახლში" სტუმრობისას განუცხადა, ტარიფების თემა მათთვის ძალიან მშობლიურია.

ქდმ-ს ლიდერი ირწმუნება, რომ ელექტროენერგიისა და გაზის გადასახადის შემცირებისთვის სერიოზული რესურსები არსებობს.

"ჩვენ გაცილებით ოპტიმისტური ხედვები გვაქვს საქართველოში კომუნალური გადასახადების კლების რესურსებთან დაკავშირებით, ვიდრე ამ მხრივ ოპტიმიზმი ახალ მთავრობას აღმოაჩნდა. მზად ვართ, წლების განმავლობაში ქართველ და უცხოელ სპეციალისტებთან კონსულტაციების შედეგად დაგროვილი გამოცდილება გავუზიაროთ ახალ მთავრობას და მინისტრ კალაძეს, რომელიც ახალია ამ საქმეში, თუმცა ვხედავთ მის მოწადინებას და სურვილს, რომ ტარიფები შემცირდეს", - განაცხადა თარგამაძემ.

ქდმ-ს ლიდერი იმედოვნებს, რომ ახალი მთავრობა ქართულ პოლიტიკურ სპექტრში და ექსპერტთა საზოგადოებაში წლების განმავლობაში დაგროვილ გამოცდილებას გაიზიარებს.

"ასე მარტივად საარჩევნო დაპირებებისგან თავს ვერ დააღწევენ. ამას ნიშნის მოგებით არ ვამბობ. ვიცით, რომ "ნაციონალური მოძრაობის" მემკვიდრეობა რთულია, მაგრამ გამოუვალი მდგომარეობა არ არის. არსებობს სერიოზული რესურსები იმისთვის, რომ ქვეყანაში, როგორც ელექტროენერგიის, ისე ბუნებრივი აირის მოხმარების გადასახადზე მნიშვნელოვანი კლება განხორციელდეს", - აღნიშნა თარგამაძემ.

ბიძინა ივანიშვილი გაზისა და ელექტროენერგიის ტარიფების განახევრებაზე საუბარს გადაჭარბებულად მიიჩნევს და აცხადებს, რომ ეს არ გამოვა.

როგორც პრემიერ-მინისტრმა გუშინ, სასტუმრო "რედისონში" ჟურნალისტებთან შეხვედრისას "ინტერპრესნიუსის" კითხვის პასუხად განაცხადა, ტარიფებთან დაკავშირებული პროცესი გაჭიანურდა, რადგან ახალმა მთავრობამ ფასწარმოქმნაში ბოლომდე გარკვევა ჯერ ვერ მოახერხა.

"ტარიფების განახევრება, რასაც ველოდი, არ გამოვა და, როგორც ჩანს, გადაჭარბებულად ვსაუბრობდით. საპარტნიორო ფონდის პრეზიდენტი ირაკლი კოვზანაძე და მისი მოადგილე გიორგი ბაჩიაშვილი ელექტროენერგიასთან დაკავშირებით თურქეთში თურქულ კომპანიას ხვდებიან. გარდაბანში დაგეგმილი იყო თბოელექტროსადგურის მშენებლობა, რომელიც 200 მილიონ დოლარზე მეტი ჯდებოდა. ეს "ინტერ რაო ესს" უნდა დაეფინანსებინა იმ საინვესტიციო თანხიდან, რომელსაც ელექტროენერგიის 16-თეთრიანი ტარიფი მოიცავდა. 16 თეთრში მოიაზრება საინვესტიციო თანხა, რომელიც აუცილებელია და რომელიც ყოველთვის შედის ტარიფში - ეს არის სისტემის სრულყოფის თანხები. ამ თანხიდან "ინტერ რაოს" უნდა დაეფინანსებინა შესატყვისი მშენებლობა გარდაბანში", - განაცხადა ივანიშვილმა.

"ინტერპრესნიუსი"