ვისი იმედი აქვს ირაკლი სესიაშვილს და რა არ მოსწონს ეკა ხერხეულიძეს

ირაკლი სესიაშვილი და ეკა ხერხეულიძე ერთმანეთს პირადად არ იცნობენ, თუმცა როგორც პოლიტიკურ ოპონენტებს, ერთმანეთის შესახებ გარკვეული შეხედულებები აქვთ. ქვეყანაში მიმდინარე აქტუალურ მოვლენებს სხვადასხვაგვარად აღიქვამენ და აფასებენ.

- როგორ ფიქრობთ, მიმდინარე პროცესებიდან გამომდინარე, როგორ უნდა გაგრძელდეს საერთაშორისო საზოგადოებასთან ურთიერთობა და მათი ცხარე კრიტიკის დადებითი შეფასებებით შეცვლა? რა კონკრეტული ნაბიჯები უნდა გადადგას ამისათვის საგარეო საქმეთა მინისტრმა და პრემიერ-მინისტრმა?

ირაკლი სესიაშვილი, პარლამენტის თავდაცვისა და უშიშროების კომიტეტის თავმჯდომარე, უმრავლესობის წევრი:

- ჩვენს ხელისუფლებას იმდენად რთული მემკვიდრეობა დარჩა, რომ პირველ რიგში, ისეთი გადაუდებელი ღონისძიებების ჩატარება გვიწევს, რომლებიც ქვეყნისთვის სასიცოცხლო მნიშვნელობისაა. საქმეებს პრიორიტეტულობის მიხედვით განვიხილავთ. ახალი ხელისუფლების მიმართ მათი დამოკიდებულება ორ ნაწილად უნდა გავყოთ. ერთია, თუ რა სახის ურთიერთობები ყალიბდება საქართველოსა და საერთაშორისო თანამეგობრობას შორის, განსაკუთრებით - დასავლეთთან. ისინი ახალი ხელისუფლების ნაბიჯებს პოზიტიურად აფასებენ და მეორეა - საერთაშორისო მედია, რომელიც წლების მანძილზე, ჩემი აზრით, სააკაშვილის "პიარის" მსხვერპლი იყო. გავრცელებული ინფორმაციები კი ლობისტების კარგი შრომის შედეგი იყო. ის ჟურნალ-გაზეთები, რომლებიც დღეს გვაკრიტიკებენ, წინასაარჩევნოდ აქტიურად ირწმუნებოდნენ, რომ ბიძინა ივანიშვილს მხარდაჭერა 7-10% ჰქონდა. დასკვნები ხალხმა გამოიტანოს. წინა მთავრობას ძალაუფლების გარკვეული კუნძულები აქვს შემორჩენილი, რომლებიც ინერციით გადმოჰყვა და ისინი ამას ე.წ. გარდამავალ პერიოდში, ვიწრო პოლიტიკური ინტერესებისთვის იყენებენ. თუმცა, ჩვენი ხელისუფლების მიმართ კრიტიკულიც ვიქნები და ვიტყვი, რომ საერთაშორისო საზოგადოებასთან მუშაობაში მოვიკოჭლებთ, რადგან ბრძოლა ერთდროულად რამდენიმე ფრონტზე გვიწევს.

ეკა ხერხეულიძე, "ნაციონალური მოძრაობის" წევრი:

- მე ამ ქვეყნის მოქალაქე ვარ და არ წარმოვადგენ იმ ადამიანთა კატეგორიას, რომლებიც ჩასაფრებულები ელოდებიან ცუდს, რომ საკუთარ საზოგადოებას თითი ნიშნის მოგებით უქნიონ. მინდა, რომ ქვეყანაში განვითარებული მოვლენები მხოლოდ პროგრესისკენ დაიძრას. დაჭერებსა და პროკურატურაში დაბარებებს კი ამის ნიშნებად ვერ ჩავთვლი. ბოლო ორი თვეა, აპოკალიფსური სურათი ვითარდება და პროგრესს რომ ვერ ვხედავ, ეს გულს მიკლავს და მანერვიულებს. ხელისუფლებას სერიოზული დაფიქრება მართებს, საერთაშორისო საზოგადოების წინაშე რომ უფრო მეტად არ შევირცხვინოთ თავი. იმდენი შეცდომა გვაქვს, რომ გვმართებს დიდი დაფიქრება, კონსოლიდირება, პრეზიდენტთან ერთად და აუცილებელია ამ საკითხების დაუყოვნებლივ გადაჭრა.

- თქვენი აზრით, რატომ არ ჩადის ივანიშვილი აშშ-ში?

ირაკლი სესიაშვილი:

- ამას შესაბამისი პასუხიც აქვს. თქვენ იცით, რომ აშშ-ში გარკვეული ცვლილებები იგეგმება. მაია ფანჯიკიძე ჰილარი კლინტონს შეხვდა, ჩვენ სტრატეგიული პარტნიორები ვართ, ჩვენი მეგობრობა კიდევ უფრო მყარია და ემყარება არა ვიწრო პოლიტიკურ ინტერესებს, როგორც ეს წინა ხელისუფლების დროს იყო, არამედ - ქვეყნის ინტერესებს. მათთან ურთიერთობას ჩვეულებრივად ვაგრძელებთ, ჩვენც ჩავალთ და ისინიც გვესტუმრებიან. როგორც ქვეყანას წაადგება, ისე მოვიქცევით.

ეკა ხერხეულიძე:

- ივანიშვილის შტატებში ჩაუსვლელობის მიზეზი, მაია ფანჯიკიძის თქმით ისაა, რომ იგი საქმეებითაა დაკავებული, რაც დიპლომატისთვის ძალზე უხერხული პასუხია. მას იქ დასასვენებლად კი არ ეპატიჟებოდნენ, არამედ - ქვეყნის პრობლემების მოსაგვარებლად. სამუშაო განრიგში ეს უნდა გაეთვალისწინებინათ, ვინაიდან, პირადად მე, დღევანდელი ხელისუფლების პოლიტიკურ წარმომადგენლებს ვერც ერთ შემთხვევაში ვერ დავწამებ, რომ რაიმე დადებითის გაკეთება არ უნდათ, უბრალოდ, კვალიფიკაცია არ ჰყოფნით.

- როგორ წარმოგიდგენიათ დღესდღეობით ქვეყანაში არსებული პრობლემების ხალხის სასარგებლოდ მოგვარება?

ირაკლი სესიაშვილი:

- ძალიან მარტივად: ხელისუფლებას უნდა ჰქონდეს ამის ნება და განცდა, რომ ის მოსულია არა იმისთვის, რომ კომფორტით იცხოვროს და ძალაუფლებით დატკბეს, არამედ, ხალხის სამსახურში ჩასადგომად. ჩვენ სწორედ მათ მიერ ვართ დაქირავებულები, ხელფასს ამაში გვიხდიან. ამ ყველაფერს სათავეში ბატონი ბიძინა ივანიშვილი უდგას, რომელიც აქ თავისი ბიზნესის გასაფართოებლად კი არ ჩამოვიდა, არამედ იმისთვის, რომ ქვეყანაში წესრიგი დამყარდეს და დოვლათი ხალხს მოხმარდეს.

ეკა ხერხეულიძე:

- პირადად ჩემთვის, ჩვენი ქვეყნისთვის ტერიტორიული მთლიანობის აღდგენის საკითხი უფრო აქტუალურია, მაგრამ როგორც დავინახე, საზოგადოების უმრავლესობისთვის პირადი პრობლემების მოგვარება უფრო მთავარი აღმოჩნდა. შესაძლოა, დუხჭირი ცხოვრებიდან გამომდინარე, დღის წესრიგში ყოფითი პრობლემების მოგვარება - ელექტროენერგიისა და ბუნებრივი აირის ტარიფის დაწევა დადგა, რასაც მთავრობა ვერ ასრულებს. ტყუილები მათ მალე ჩააგდებს კოლაფსში, თუ მდგომარეობას ვერ გამოასწორებენ. ამ ყველაფერს ჩვენ ეტაპობრივად ვაგვარებდით და არავის ვატყუებდით, რომ ეს ერთ დღეში მოხდებოდა.

- მოსახლეობაში უკმაყოფილება გამოიწვია მედიკამენტებისა და სალარო აპარატების თემამ. ხელისუფლების ოპონენტების მხრიდან, ხშირად ისმის, რომ წინასაარჩევნო დაპირებები არ სრულდება. თქვენ როგორ ფიქრობთ?

ირაკლი სესიაშვილი:

- ალბათ წინა ხელისუფლებისგან ბორკილახსნილმა ხალხმა იფიქრა, რომ შესაძლოა, თავს უფლება მივცეთ და კანონი დავარღვიოთო, ამან კი გამოიწვია ის, რომ განცხადება პრევენციულად გაკეთდა. რაც შეეხება დაპირებებს, ისინი თოფში კი არ იყო ჩატენილი, ამ ყველაფერს გაკეთება და დრო სჭირდება. ჯერ წინა ხელისუფლების მემკვიდრეობის ნამსხვრევებს ვებრძვით, რომ შენება დავიწყოთ. "ნაციონალური მოძრაობისგან" ამაზე კრიტიკას ნამდვილად ვერ მივიღებ, ხალხისგან კი - მხოლოდ მას შემდეგ, როცა უახლოეს თვეებში საშუალება მოგვეცემა, ჩვენი დაპირებების შესრულება დავიწყოთ.

ეკა ხერხეულიძე:

- არ ვიცი, სპეციფიკური სფეროა, ეს კერძო ბიზნესია და ნამდვილად ვერ დავწამებ, რომ აქ ვინმეს ჩარევა ხდება. ალბათ მათ საზოგადოების წინაშე მეტი გულისხმიერება მართებთ, რადგან შეჭირვებულ ადამიანებს არა აქვთ შესაძლებლობა, ძვირად ღირებული მედიკამენტები მთლიანი კოლოფებით იყიდონ და კარგი იქნება, თუ მათ მდგომარეობაში შევლენ.

- როგორი დამოკიდებულება გაქვთ განსხვავებული აზრის მქონე ადამიანების მიმართ?

ირაკლი სესიაშვილი:

- შესანიშნავი. ნორმალური ადამიანი ამაზე სწავლობს და იზრდება. განსხვავებული აზრი ჩემთვის არის საშუალება, რომ საკითხში უკეთ გავერკვეთ, ვიმსჯელოთ და სწორი გადაწყვეტილება მივიღოთ. შეგიძლიათ, უმცირესობის წარმომადგენლებს ჰკითხოთ, კომიტეტის სხდომაზე რამდენად ვცდილობ შენიშვნებისა და კრიტიკის მიღებას და რამდენს დავთანხმებივარ კიდეც. ჩემთვის მთავარი საქმე და შედეგია და არა ის, თუ ვინ რა პოლიტიკურ კურსს ემსახურება.

ეკა ხერხეულიძე:

- ადამიანი, რომელსაც ასეთი აზრის მოსმენა, ატანა, გაზიარება არ შეუძლია, ნორმალურად არ მიმაჩნია. არ შეიძლება მხოლოდ და მხოლოდ შენთვის სასურველი ტექსტები გესმოდეს. ადამიანი უკეთესაც წარმართავს კარიერასა და ბიოგრაფიას, თუკი რეალურ და ობიექტურ რჩევებს გაითვალისწინებს.

- ვანო მერაბიშვილი და ყალბი პასპორტი. როგორია თქვენი აზრი ამ ფაქტის შესახებ?

ირაკლი სესიაშვილი:

- ეს ისე გაჩენილი ეჭვი არ არის. ამის ამსახველი კადრები ვნახე, სადაც ყველაფერი დაფიქსირებულია, რამდენიმე მოწმის ჩვენებაა, რაც ჩემთვის, როგორც მოქალაქისთვის, ერთი შეხედვით, უტყუარ მტკიცებულებას წარმოადგენს. ვანო მერაბიშვილი ამას უარყოფს და უმცირესობა, რაც უნდა ეცადოს და პოლიტიკურ მოტივზე გააკეთოს აქცენტი, უცხო პასპორტი მისთვის ჯიბეში არავის ჩაუდვია. სხვა რამ უფრო მადარდებს - თუ ეს ფაქტი დადგინდება, არ არის გამორიცხული, რომ ასეთი პასპორტები ზოგ-ზოგიერთსაც ჰქონდეს ჩამორიგებული. ვანო მერაბიშვილის სახელთან ასოცირდება გახმაურებული საქმეები, ბიზნესებთან დაკავშირებული ეჭვები, ადამიანის უფლებების შელახვა, მიტინგების დარბევა და ა.შ. მინიმუმ პოლიტიკური პასუხისმგებლობის საკითხი უნდა დადგეს. როგორც ვიცი, საგამოძიებო კომისიის შექმნა იგეგმება, რომელიც მსგავს საკითხებს შეისწავლის და მოამზადებს.

ეკა ხერხეულიძე:

- მთავარი ის გახლავთ, რომ თუ ეს ფაქტი მართლაც არსებობდა, აუცილებელი იყო ნებისმიერი მოქალაქის საზღვარზე დაკავება. კანონდარღვევის საშუალება არ უნდა მიეცათ. მაშინ რატომ გაატარეს ბატონი ვანო? მას ხომ მთელი საქართველო შესანიშნავად ცნობს სახეზე. ეს ჩემში ბევრ კითხვასა და ეჭვს ბადებს. ბევრი ადამიანი ფსიქოლოგიურად ვერ გაუმკლავდა იმ ზეწოლას, რომელიც "ქართული ოცნების" გამარჯვების შემდეგ ხორციელდებოდა და წავიდა. ვანო მერაბიშვილს ქვეყნიდან გაქცევა რომ ნდომოდა, მანამდეც მოახერხებდა.

- როგორ დაახასიათებთ თქვენს ოპონენტს?

ირაკლი სესიაშვილი:

- ზოგადად, ადამიანების შეფასება და განსჯა არასწორად მიმაჩნია. ეკა ხერხეულიძეს, ჩემთვის ოპონენტური პოლიტიკური ძალის ერთ-ერთ ლიდერად თუ შევაფასებ. ჩემი აზრით, რიგ შემთხვევებში, ის აბსოლუტურად უსამართლოდ იცავდა წინა ხელისუფლების მიერ წარმოებულ არასწორ პოლიტიკას. ის იმ ძალის წარმომადგენელია, რომლის მმართველობა ხალხის მიერ უარყოფითად იქნა შეფასებული. როგორც ადამიანს, მას არ ვიცნობ და ყველაფერს საუკეთესოს ვუსურვებ.

ეკა ხერხეულიძე:

- ირაკლი სესიაშვილს არ ვიცნობ. ის საზოგადოებაში ცნობილია როგორც ექსპერტი, ოღონდ არ ვიცი, რა კვალიფიკაციის მქონეა. ახლა გახდა აქტუალური ადამიანი და ბუნებრივია, დროთა განმავლობაში შევძლებ მის უკეთესად დახასიათებას.

თამთა დადეშელი

ჟურნალი ”გზა”

(გამოდის ხუთშაბათობით)