ლალი მაროშკინა სასამართლომ 2 500 ლარით დააჯარიმა
სასამართლომ სასჯელაღსრულების მინისტრის მრჩეველი ლალი მაროშკინა 2 500 ლარით დააჯარიმა.
როგორც "ინტერპრესნიუსს" უზენაესი სასამართლოდან აცნობეს, ამის მიზეზი მოსამართლესთან სატელეფონო ზარი გახდა, რომლის დროსაც მაროშკინა კონკრეტულ პირებთან მიმართებაში ამნისტიის აქტის დაჩქარებით განხორციელებას ითხოვდა.
მცხეთის რაიონულ სასამართლოში საქმის მასალები მოსამართლესთან კომუნიკაცის წესის დარღვევის ფაქტთან დაკავშირებით 29 იანვარს განიხილეს.
"საქმის მასალებით და მხარეთა ახსნა-განმარტებების საფუძველზე სასამართლომ საჯარო მოსამსახურე ლალი მაროშკინას მიერ მოსამართლესთან 2013 წლის 24 იანვარს 23.31 საათზე განხორციელებული სატელეფონო საუბარი (რომელიც შეეხებოდა კონკრეტული პირების მიმართ ამნისტიის აქტის დაჩქარებით განხორციელების მითითებას) ცნო მოსამართლესთან კომუნიკაციის წესის დარღვევად და, შესაბამისად, საჯარო მოსამსახურე ლალი მაროშკინა დააჯარიმა 2500 ლარით, აქვე სასამართლომ ჯარიმის თანხის განსაზღვრისას გაითვალისწინა ლალი მაროშკინას მიერ ჩადენილი ქმედების აღიარება", - აღნიშნულია უზენაესი სასამართლოს ინფორმაციაში.
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
