შსს მკვლელობაში ბრალდებულის დაკავებაზე ოფიციალურ ინფორმაციას ავრცელებს

შინაგან საქმეთა სამინისტრო ტაშკენტის ქუჩაზე მომხდარ მკვლელობაში ბრალდებულის დაკავების შესახებ ოფიციალურ ინფორმაციას ავრცელებს. სამინისტროს ინფორმაციით, პოლიციის მთავარი სამმართველოსა და ვაკე-საბურთალოს პოლიციის სამმართველოს თანამშრომლებმა ერთობლივად, ცხელ კვალზე ჩატარებული ოპერატიულ-სამძებრო და საგამოძიებო ღონისძიებების შედეგად, 1980 წელს დაბადებული მიხეილ ზ. მკვლელობიდან რამდენიმე საათში დააკავეს.

განცხადებაში ნათქვამია, რომ დაკავებულმა გუშინ საღამოს თბილისში, ტაშკენტის ქუჩაზე 1986 წელს დაბადებული დენის ალექსანდრეს ძე მატიაშის საცხოვრებელ ბინაში ეჭვიანობის ნიადაგზე, ურთიერთშელაპარაკებისას ცეცხლსასროლი იარაღით თავის არეში დაჭრა მამა - ალექსანდრე მატიაში, შემდგომ კი დანით სხეულზე მრავლობითი დაზიანება მიაყენა. მიღებული დაზიანებების შედეგად ალექსანდრე მატიაში ადგილზე გარდაიცვალა. დაკავებულმა ასევე დანით გულმკერდისა და ფეხის არეში დაჭრა შვილი - დენის მატიაში, რის შემდეგაც შემთხვევის ადგილიდან მიიმალა. დენის მატიაში ემერჯენსის კლინიკაში მოათავსეს.

დაკავებული ჩადენილ დანაშაულს აღიარებს.

"ინტერპრესნიუსი"