რომანი, რომელზეც მრავალდასასრულიან ფილმს გადაიღებენ

24 იანვარს პოლიტიკოს ნესტან კირთაძის ქალიშვილმა ანა რეხვიაშვილმა საკუთარი წიგნის პრეზენტაციაზე მიმიწვია. მართალი გითხრათ, ეს სიურპრიზი იყო ჩემთვის. "F 63,9" - ასე ჰქვია რომანს, რომელიც ანამ "თბილისი მარიოტში" შეკრებილ საზოგადოებას წარგვიდგინა.

- დღეს დიდი პრ­ოექტის პირველ საფ­ეხურს წარმოგიდგენთ. პროექტს ჰქვია "ვირუს F 63,9". ეს არ არის კოდი, რომლითაც მსოფლიოს ჯანდაცვის ორგანიზაციამ სიყვარული აღნიშნა, როგორც დაავადება. დღეს წარმოგიდგენთ წიგნს, რომანს, რომელშიც მოთხრობილია ჩვეულებრივი თბილისური სიყვარულის ამბავი. პარალელურად დაიწერა სცენარი ფილმისთვის. სცენარისთვის მოვიწვიეთ ქართველი, რუსი და ევროპელი მწერლები. თითოეულ მათგანს მივეცით დავალება, დასასრულის თავისი ვერსია დაეწერა. ანუ ეს იქნება მრავალდასასრულიანი ფილმი.

- შენი დასასრული "ჰეფიენდია"?

- ვისთვის როგორ. მინდა, ყველამ ისეთი დასასრული მიიღოს, როგორიც თავად სურს, ამიტომ იქნება ფილმი მრავალდასასრულიანი.

- რომანის წერით რომ დაკავდი, ცოტა გამიკვირდა. რომანტიკულად კი გამოიყურები. შეგიყვარდა ვინმე?

- არა, ეს ჩემი პირადით არ არის გამოწვეული (იცინის), თუმცა ნებისმიერი ადამიანი თავის თავს იპოვის ამ წიგნში. არის ჩემი ცხოვრების ფრაგმენტებიც. შენც იპოვი შენი ცხოვრების გარკვეულ ფრაგმენტს. პირობითია გმირებიც და ისტორიაც, ისევე, როგორც დასასრული.

პრეზენტაციას მო­წ­ვეულ სტუმრებთან ერთად ანის მშობლები, მეგობრები, მსახიობები, მომღერლები ესწრებოდნენ, მოვახერხე და რამდენიმე მათგანი ფირზეც აღვბეჭდე.

ლილიკო ნემსაძე:

- ანა ჩემი მეგობარია. მთხოვა, წიგნის საუნდტრეკი დამეწერა. წიგნის სათაურიც საკმარისი იყო იმისთვის, რომ მუსიკა დამეწერა. სიყვარულს ერთი ენა აქვს. წიგნს თან ახლავს სიდი, რომელზეც ეს მელოდიაა ჩაწერილი.

ანი სანაია:

- ანისთან ვმეგობრობ და შესაბამისად, ერთ-ერთი პირველი ვიყავი, ვინც ეს წიგნი წაიკითხა. მაშინ გამიჩნდა იდეა, რომანი ფილმად გვექცია. იდეა დაიხვეწა და მალე ფილმის გადაღებას დავიწყებთ.

- ხომ არ გიხილავთ ფილმში?

- არ ვიცი, ჯერ რეჟისორი უნდა შეირჩეს, შემდეგ სამსახიობო გუნდი და ვნახოთ.

DJბუკლე

ჟურნალი "რეიტინგი"

(გამოდის ორშაბათობით)