მიხეილ სააკაშვილი სტიქიით დაზარალებულ ოჯახს დახმარებას პრეზიდენტის ფონდიდან დაჰპირდა

საქართველოს პრეზიდენტი მიხეილ სააკაშვილი, ბათუმში ბარაკების ტიპის დასახლებაში, სტიქიის შედეგად დაზარალებულ ელგუჯა სიხარულიძის ოჯახს ესტუმრა.

პრეზიდენტის ადმინისტრაციის ინფორმაციით, დაახლოებით 2 საუკუნის დროინდელ, ავარიულ სახლში, რომელშიც სტიქიის შედეგად სახურავიდან წყალი ჩამოდის, 6-სულიან ოჯახს გაუსაძლის პირობებში უწევს ცხოვრება. მიხეილ სააკაშვილი დახმარებას მათ პრეზიდენტის ფონდიდან დაჰპირდა.

"ეს კვარტალი მთლიანად უნდა გადასახლდეს, მაგრამ ამისათვის, უპირველესად, საჭიროა, რომ ბათუმს ბიუჯეტი აღუდგეს. ბარაკების აღების პროგრამას მთლიანად 80 მილიონი სჭირდება და თუკი ბათუმის ბიუჯეტს დაუბრუნდება ის 120 მილიონი ლარი, რომელიც მოაკლეს, შესაძლებელი გახდება ამ პროგრამისთვის თანხის გამოყოფა და ბარაკების პრობლემა საერთოდ აღარ გვექნება. ასევე მნიშვნელოვანია, რომ ხელი შევუწყოთ ბინათმშენებლობას. მთავარია ახლა ბათუმის მერიამ ყველა დაზარალებულს უპოვოს ბინა და რასაც მერია ვერ გადაიხდის, მწირი შესაძლებლობის მიუხედავად, პრეზიდენტის ფონდიდან დავამატებთ", - განაცხადა პრეზიდენტმა.

"ინტერპრესნიუსი"