თბილისში ყირიმ-კონგოს ჰემორაგიული ცხელებით დაავადებულ ფეხმძიმე ქალს მკურნალობენ

თბილისის ინფექციურ საავადმყოფოში ყირიმ-კონგოს ჰემორაგიული ცხელებით დაავადებულ ქალს მკურნალობენ. როგორც "ინტერპრესნიუსს" ინფექციური საავადმყოფოს რეანიმაციული განყოფილების გამგე ანა ლაღიძემ აცნობა, ყირიმ-კონგოს ჰემორაგიული ცხელებით დაავადებული ფეხმძიმე ქალი ახალციხის რაიონიდან ჩამოიყვანეს, რომელსაც რეანიმაციული დახმარება უტარდება.

ანა ლაღიძის ინფორმაციით, თბილისის ინფექციური საავადმყოფოს დაარსებიდან დღემდე ყირიმ-კონგოს ჰემორაგიული ცხელების სამი შემთხვევაა მხოლოდ დაფიქსირებული.

ყირიმ-კონგოს ჰემორაგიული ცხელება ადამიანებზე ცხოველების ტკიპებიდან გადადის. ინფიცირებულ პაციენტს სხეულზე სისხლჩაქცევები უვითარდება და ხშირ შემთხვევაში ლეტალურად სრულდება.

საქართველოში აღწერილი შემთხვევებიდან, ექიმმა-ინფექციონისტებმა სამივე პაციენტის გადარჩენა მოახერხეს.

"ინტერპრესნიუსი"