ომბუდსმენი - შსს-მ მიკაელ კადიევის უდანაშაულობის პრეზუმფცია დაარღვია

შს სამინისტრომ მიკაელ კადიევის უდანაშაულობის პრეზუმფცია დაარღვია, - ამის შესახებ "ინტერპრესნიუსს" სახალხო დამცველმა უჩა ნანუაშვილმა განუცხადა. როგორც ომბუდსმენი აცხადებს, უდანაშაულობის პრეზუმფცია დარღვეულია შს სამინისტროს მიერ თავდაპირველად გავრცელებული განცხადებით, რომლის მიხედვითაც, კადიევი ტერაქტის მცდელობისთვის დააკავეს, შემდეგ კი აღმოჩნდა, რომ იარაღისა და ასაფეთქებელი ნივთიერებების მართლსაწინააღმდეგოდ შენახვა ედებოდა ბრალად.

ომბუდსმენის განცხადებით, იგი დღეს აპირებს, წინასწარ პატიმრობაში მყოფ მიკაელ კადიევს გლდანის N8 სასჯელაღსრულების დაწესებულებაში შეხვდეს.

"მიკაელ კადიევს შევხვდები და გავეცნობი ინფორმაციას იმ დარღვევების შესახებ, რომელზეც იგი საუბრობს ამ საქმესთან დაკავშირებით", - განაცხადა უჩა ნანუაშვილმა.

შს სამინისტრომ 13 ივნისს განცხადება გაავრცელა, რომლის მიხედვითაც, უცხო ქვეყნის მოქალაქეები, მიკაელ კადიევი და რიზვან ომაროვი ტერაქტის მცდელობის ფაქტზე დააკავეს, თუმცა დაკავებულების აღმკვეთი ღონისძიების დროს ცნობილი გახდა, რომ ორივე პირს ბრალად იარაღისა და ასაფეთქებელი ნივთიერების მართლსაწინააღმდეგოდ შენახვა ედებოდათ.

"ინტერპრესნიუსი"