საგამოძიებო სამსახურმა თბილისის მერიის 4 თანამდებობის პირი დააკავა
ფინანსთა სამინისტროს საგამოძიებო სამსახურმა წუხელ თბილისის მერიის 4 თანამდებობის პირი დააკავა. აღნიშნულთან დაკავშირებით, საგამოძიებო სამსახური ოფიციალურ განცხადებას ავრცელებს.
"მერიის კუთვნილი თანხების მითვისება-გაფლანგვის ფაქტზე საგამოძიებო სამსხურის თანამშრომლებმა დააკავეს თბილისის მერის მოადგილე დავით ალავიძე, თბილისის განვითარების ფონდის თავმჯდომარე დავით ავალიანი, თბილისის შესყიდვების სამსახურის უფროსი ალექსი თაბუაშვილი, მთაწმინდა-კრწანისის გამგებლის მოადგილე დიმიტრი ჩხეიძე.
გამოძიებით დადგინდა, რომ დაკავებულებმა სხვა პირებთან ერთად მიითვისეს და გაფლანგეს განსაკუთრებით დიდი ოდენობით ფულადი თანხა 48 930 822 ლარამდე. გამოძიება მიმდინარეობს საქართველოს სისხლის სამართლის კოდექსის 182 -ე მუხლის მესამე ნაწილით, რაც სასჯელის სახით ითვალისწინებს 7-დან 11 წლამდე თავისუფლების აღკვეთას.
საქმის გამოძიება გრძელდება და სისხლის სამართლის პასუხისგებაში მიეცემა დანაშაულებრივი ჯგუფის წევრი, თბილისის განვითარების ფონდის ყოფილი დირექტორი გიორგი საბანაძე, რომელიც ამჟამად მიმალვაში იმყოფება.
აღნიშნული საქმის დეტალებზე საგამოძიებო სამსახური საგანგებო განცხადებას დღის განმავლობაში გაავრცელებს", - ნათქვამია საგამოძიებო სამსახურის განცხადებაში.
დაკავებულები საგამოძიებო სამსახურიდან ე.წ. მოდულის შენობაში გადაიყვანეს.
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
