IRI – გამოკითხულთა უმეტესობას თბილისის მერის ძირითადი მიღწევების დასახელება უჭირს

"საერთაშორისო რესპუბლიკური ინსტიტუტის" (IRI) კვლევის მიხედვით, გამოკითხულთა უმეტესობას თბილისის მერის, გიგი უგულავას ძირითადი მიღწევების დასახელება უჭირს.

"რა ძირითადი მიღწევები აქვს თბილისის მერს, გიგი უგულავას?" – შესაბამის შეკითხვაზე პასუხისას რესპონდენტთა 44 %-მა კატეგორია "არ ვიცი" აირჩია, 10 %-მა კი უპირატესობა მიანიჭა კატეგორიას "არაფერი".

რაც შეეხება გამოკითხვის ფარგლებში ჩამოთვლილ ცალკეულ საკითხებს, მათი რეიტინგი ასეთია: ინფრასტრუქტურა პირველი რიგის წარმატებულ საკითხად გამოკითხულთა 13 %-მა, მეორე რიგის მიღწევად კი 17 %-მა დაასახელა.

შემდეგ ადგილზე მოდის ქუჩების რეაბილიტაცია, რომელიც რესპონდენტთა 8 %-ის აზრით, გიგი უგულავას პირველი რიგის მიღწევას წარმოადგენს, ხოლო 12 %-ის შეფასებით, მეორე რიგში წარმატებული საკითხია.

რეიტინგში შემდეგ პოზიციები ასე ნაწილდება: დასუფთავება – 8-13 %, პარკების აშენება – 3-6 %, ვაუჩერების დარიგება - 3-4 %, ფასადების რემონტი - 2-3 %, ქუჩების განათება - 2-4 %, ძველი თბილისის რეკონსტრუქცია - 2-3 %, ტრასნპორტი - 1-2 % და სოციალური პრობლემების მოგვარება - 1-2 %.

რაც შეეხება თბილისის მერის ჩავარდნებს, გამოკითხულთა უმეტესობას – 47 %-ს მისი წარუმატებლობის დასახელებაც უჭირს, 2 % ფიქრობს, რომ გიგი უგულავას ჩავარდნა "არაფერში" ჰქონია, 3 % კი პასუხისას ირჩევს კატეგორიას "ყველაფერი".

"რას მიიჩნევთ თბილისის მერის, გიგი უგულავას ძირითად ჩავარდნად?", - კონკრეტულ საკითხებთან მიმართებაში გამოკითხულთა შედეგები ასე გამოიყურება:

ტრანსპორტის მაღალი ღირებულება - 8-11 %, ხალხისადმი უდარდელი დამოკიდებულება - 6-7 %, კორუფცია - 6-8 %, ბიუჯეტის გაფლანგვა - 5-6 %, მისი პოლიტიზირება - 4-4 %, მშენებლობების დაბალი ხარისხი - 3-3 %, სოციალური პრობლემები - 2-4 %, ელექტროენერგიის და დასუფთავების გადასახადის გაერთიანება - 2-4 %, ის, რომ ვერ მოახერხა გადასახადების შემცირება - 2-3 %, მისი ცხოვრების სტილი - 2-2 %, ხალხში ნდობის დაკარგვა - 1-2 % და პროდუქტებზე გაზრდილი ფასები - 1-2 %.

კვლევა მიმდინარე წლის 17 მაისიდან 2 ივნისის პერიოდში ჩატარდა. მის ფარგლებში საარჩევნო ასაკის მქონე 3 998 რესპონდენტი გამოიკითხა.

"ინტერპრესნიუსი"