ნინო გიორგობიანი - "შინაგან საქმეთა მინისტრი არ არის მთავარი პროკურორის ხელმძღვანელი"

პროკურატურის საქმიანობაში შინაგან საქმეთა მინისტრი არ და ვერ ჩაერევა, - ამის შესახებ "ინტერპრესნიუსს" შსს-ს პრესსამსახურის ხელმძღვანელმა ნინო გიორგობიანმა მთავარი პროკურორის, არჩილ კბილაშვილის ინფორმაციის კომენტირებისას განუცხადა.

"შინაგან  საქმეთა მინისტრმა ორჯერ განაცხადა, რომ იზიარებს პრემიერ-მინისტრის პოზიციას ბედუკაძის საქმესთან დაკავშირებით. ირაკლი ღარიბაშვილმა საჯაროდ უკვე მოუწოდა არჩილ კბილაშვილს, რომ მანაც გაიზიაროს პრემიერის პოზიცია. რაც შეეხება გადაწყვეტილების მიღებამდე ამ საკითხის განხილვაში მინისტრის მონაწილეობას, შინაგან საქმეთა მინისტრი არ არის მთავარი პროკურორის ხელმძღვანელი. როგორც ცნობილია აღნიშნული გადაწყვეტილების მიღება მხოლოდ და მხოლოდ მთავარი პროკურორის დისკრეციული უფლებამოსილებაა. ზოგადად, პროკურატურის საქმიანობაში შინაგან საქმეთა მინისტრი არ და ვერ ჩაერევა", - აღნიშნა გიორგობიანმა.

მთავარმა პროკურორმა არჩილ კბილაშვილმა დღეს რადიო "პალიტრის" გადაცემა "რეზიუმეში" სტუმრობისას განაცხადა, რომ ვლადიმერ ბედუკაძეზე გადაწყვეტილების მიღებამდე საკითხის განხილვაში შინაგან საქმეთა მინისტრი ირაკლი ღარიბაშვილი მონაწილეობდა. ამასთან, კბილაშვილი არ ახმაურებს, რა პოზიცია ჰქონდა ღარიბაშვილს ბედუკაძის სისხლის სამართლებრივი დევნის შეწყვეტასთან დაკავშირებით. მისი თქმით, ამ პროცესში მონაწილეობა არც პრემიერ-მინისტრს და არც პოლიტიკური გუნდის წარმომადგენლებს მიუღიათ და გადაწყვეტილება მთავარმა პროკურორმა მიიღო. "ყველა შემთხვევაში პასუხისმგებლობა ამ გადაწყვეტილებაზე მეკისრება მე", - აღნიშნა კბილაშვილმა.

"ინტერპრესნიუსი"