ვახტანგ ძაბირაძე – პრემიერს, პროკურორს და უმრავლესობას რომ განსხვავებული მოსაზრებები აქვთ, ნორმალურია და ამას უნდა მივეჩვიოთ

საშინაო და საგარეო პოლიტიკის აქტუალურ თემებზე "ინტერპრესნიუსი" კონსტიტუციონალისტსა და დამოუკიდებელ ექსპერტთა კლუბის წევრს, ვახტანგ ძაბირაძეს ესაუბრა.

- ბატონო ვახტანგ, როგორ შეაფასებდით ქვეყანაში მიმდინარე პოლიტიკურ პროცესებს მას შემდეგ, რაც შემოდგომაზე დაგეგმილი საპრეზიდენტო არჩევნების თარიღად პრეზიდენტმა 27 ოქტომბერი განსაზღვრა?

- არჩევნების თარიღის გამოცხადებას კომიკური ელფერი ჰქონდა. რამოდენიმე დღე საზოგადოება ვერ გაერკვა, როდის იქნებოდა არჩევნები - 27-ში, თუ 31-ში. ევროკავშირის წარმომადგენელთან შტეფან ფულესთან შეხვედრაზე პრეზიდენტმა განაცხადა, რომ ევროკავშირის ვილნიუსის სამიტზე, რომელიც 29 ოქტომბერს უნდა ჩატარდეს, პრეზიდენტის რანგში მიიღებს მონაწილეობას. სწორედ ვილნიუსის სამიტზე სააკაშვილის პრეზიდენტის რანგში მონაწილეობას რომ უკავშირდებოდა არჩევნების თარიღი, ამას ბევრი ვარაუდობდა. ასეა თუ ისე, არჩევნების თარიღი განსაზღვრულია და ამას მოჰყვა გარკვეული აქტივობა პოლიტიკურ ასპარეზზე, თუმცა უნდა ითქვას, რომ ეს პროცესი შედარებით მშვიდ გარემოში მიმდინარეობს. შეიძლება ითქვას, ჯერჯერობით საპრეზიდენტო არჩევნების სუნთქვა ქართულ პოლიტიკურ რეალობაში მაინცადამაინც მძლავრად არ იგრძნობა. ქართული პოლიტიკური ელიტისა და საზოგადოებისთვის უფრო აქტუალური სხვა მიმდინარე საკითხებია პრობლემატური, ვიდრე - შემოდგომაზე ჩასატარებელი საპრეზიდენტო არჩევნები.

ბუნებრივია, არჩევნების თარიღის გამოცხადების შემდეგ დაიწყო პრეზიდენტობის სავარაუდო კანდიდატთა გარკვეული აქტივობა და პოზიციების დაფისქირება, მაგრამ არა მგონია, რომ ეს პროცესი ერთ თვეში გააქტიურდეს და რაიმე ექსტრაარაორდინალური მოხდეს. ამ თვალსაზრისით, საკმაოდ მნიშვნელოვანია, რა პოზიციას დაიჭერს არჩევნებში მონაწილეობასთან დაკავშირებით პაატა ბურჭულაძე, ანუ გადაწყვეტს თუ არა იგი არჩევნებში მონაწილეობას.

- პრემიერმა ივანიშვილმა საპრეზიდენტო არჩევნებთან დაკავშირებით საზოგადოებას საკმაოდ მნიშვნელოვანი განცხადებით მიმართა. მისი თქმით, "საპრეზიდენტო არჩევნები უნდა გახდეს ქვეყანაში მომხდარი ფუნდამენტური ცვლილებების ყველაზე მკაფიო დემონსტრირება" და ისეთი "სამაგალითოდ სუფთა, თავისუფალი და სამართლიანი არჩევნები უნდა ჩატარდეს, როგორიც ეკადრება ევროპისკენ მიმავალ ქვეყანას." ივანიშვილის პოლიტიკაში ყოფნის პრაქტიკა არ ტოვებს ეჭვის საბაბს, რომ მართლაც ამგვარი არჩევნების სურვილი აქვს, მაგრამ თქვენი როგორ აღიქვით პრემიერის ეს განცხადება და თქვენი აზრით, როგორ შეაფასებენ ივანიშვილის ამ განცხადებას ადრესატები - "ნაცმოძრაობის" ლიდერები, პოლიციის პირადი შემადგენლობა, სახელმწიფო დაწესებულებებში დასაქმებული ადამიანები, ჟურნალისტები?

- ალბათ, აღქმა არ იქნება ერთმნიშვნელოვანი. ყველა თავისებურად შეეცდება ამ განცხადების გამოყენებას და გაგებას თავისი ინტერესებიდან გამომდინარე. სამწუხაროდ, დღეს "ქართულ ოცნებას" არ ჰყავს კონკურენტი და მას არჩევნების მოსაგებად დამატებითი ძალისხმევის გამოყენება არც სჭირდება. ამიტომ, იგი შეეცდება, არჩევნები ჩაატაროს სწორედ ისე, როგორც პრემიერმა განაცხადა.

დარწმუნებული ვარ და ამას პირველად არ ვამბობ, "ქართული ოცნების" კანდიდატი არჩევნებში პირველივე ტურში გაიმარჯვებს. ძალიან კარგი იქნება, თუ პრეზიდენტის ვინაობის დადგენას მეორე ტური დასჭირდა. მგონია, რომ ეს ქვეყნისთვის უკეთესი იქნება. მაგრამ, ჯერჯერობით არსებული რეალობიდან და იმ კანდიდატებიდან გამომდინარე, რომლებიც არჩევნებში მონაწილოებას აპირებენ, მგონია, რომ არჩევნები პირველივე ტურში დამთავრდება. ოპოზიცია იმისათვის იბრძვის, თუ ვინ იქნება საპრეზიდენტო არჩევნებში მეორე ადგილზე. ამიტომაც ვამბობ, რომ "ქართული ოცნების" ელიტა სამართლიანი და გამჭირვალე საპრეზიდენტო აღჩევნების ჩატარებით დაინტერესებულია.

რაც შეეხება პრემიერის განცხადების ადრესატებს, "ქართული ოცნებამ" ბევრი რამ უნდა გააკეთოს, რათა ადგილობრივ და საშუალო დონეზე დასაქმებულ ჩინოვნიკებს გააგებინოს, რომ მას სახელისუფლო ზეწოლისაგან თავისუფალი არჩევნების ჩატარება სურს. ზოგადად, ასეთ განცხადებებს ყველა ხელისუფალი აკეთებდა, მაგრამ ხმამაღლა ერთს აცხადებდა, ხოლო ჩინოვნიკებს ყურში მეორეს ეჩურჩულებოდა. ეს ფაქტორი დღემდე მუშაობს და შესაძლოა, ქვედა დონეებზე საკუთარი თავის წარმოსაჩენად ბევრი შეეცადოს ზედმეტ აქტიურობას.

- არჩევნები ისე სამაგალითოდ როგორ ჩატარდება, როცა ყველაფერს რომ თავი დავანებოთ, ამომრჩეველთა სიები სერიოზულად არის გაბერილი და საარჩევნო კოდექსი სრულყოფილებისგან ძალიან შორსაა? მოასწრებს პარლამენტი კანონში სერიოზული ცვლილებების შეტანას?

- პარლამენტმა ცვლილებების შეტანა რომც მოასწროს, საარჩევნო კოდექსში მაინც არ იქნება ის, რაც აუცილებელია არჩევნების უმაღლეს დონეზე ჩატარებისათვის. გარდა ამისა, საუბარია კანდიდატთა ფინანსური თვალსაზრისით თანასწორობაზე. რაც ყველაზე მთავარია, ამომრჩეველთა სიების პრობლემაა. დღევანდელ ხელისუფლებას იმ სიებით მოუწევს არჩევნების ჩატარება, რა სიებითაც 1 ოქტომბრის არჩევნები ჩატარდა. მე სხვა პრობლემაზეც გავამახვილებდი ყურადღებას. 1 ოქტომბრის არჩევნებამდე იყო საუბარი იმაზე, რომ უამრავი ყალბი პირადობის მოწმობაა დაბეჭდილი, რომელსაც "ნაცმოძრაობა" გამოიყენებდა. მერე ითქვა, რომ მათი გამოყენება "ნაციონალებმა" ვერ მოახერხეს. ეს კარგი, მაგრამ იცის ვინმე სადაა ეს ყალბი პირადობის მოწმობები? და თუ მათი გამოყენება შარშან ვერ მოხერხდა, შეიძლება წელს გამოიყენოს? წინა ხელისუფლებამ ისეთი პრობლემები გააჩინა, რომელიც არ უნდა ყოფილიყო. ერთი წლის განმავლობაში სიების გადამოწმება ნამდვილად შეიძლებოდა. არ შეიძლება ქვეყნის პრობლემიდან პრობლემამდე მართვა, საჭიროა სტრატეგიის გაწერა და დადება. განა შარშან არ ვიცოდით, რომ ერთი წლის შემდეგ საპრეზიდენტო არჩევნები გვექნებოდა ჩასატარებელი? სიებთან დაკავშირებული პრობლემის მოგვარება ნამდვილად შეიძლებოდა. ვიმეორებ, "ქართულ ოცნებას" არჩევნების გაყალბება არ სჭირდება, მაგრამ ის, თუ ვინ გავა მეორე ადგილზე ოპოზიციისთვის მნიშვნელოვანია. ამიტომ, სიების უზუსტობის გამო საპრეზიდენტო არჩევნებს ჩრდილი მაინც მიადგება.

- ურეკში, პრემიერ-მინისტრის უმცირესობის ლიდერთან, დავით ბაქრაძესთან შეხვედრისა და უმცირესობის პარლამენტში დაბრუნების შემდეგ "ქართული ოცნების" მისამართით ხშირად გაიგონებთ ასეთ ბრალდებას - "ქართული ოცნება" "ნაცმოძრაობის" გადარჩენას ცდილობს. ფსონი გაკეთდა "ნაციონალებთან" კოჰაბიტაციაზე და "მთავარ ოპოზიციურ ძალად" მათ გამოცხადებაზე; იმაზე, რომ თითქოს ბაქრაძეს საპრეზიდენტო არჩევნებზე მეორე ადგილის დაკავება შეუძლია და ბურჯანაძეს გაუსწრებს. თქვენი აზრით, რამდენად საფუძვლიანია ხელისუფლების მისამართით გამოთქმული ბრალდებები და მტკიცება იმისა, თითქოს ივანიშვილის კოალიციას მთავარ ოპონენტად "ნაციონალები ურჩევნია ჰყავდეს, ვიდრე იგივე ბურჯანაძე და მისი "დემოკრატიული მოძრაობა" ან კიდევ ვინმე სხვა?

- ამ თემებზე საუბარი ის პატარა სიოა, რომელიც არჩევნებს უკავშირდება და რომელმაც მხოლოდ ახლა დაუბერა. ამ ეტაპზე "ქართული ოცნებისთვის" ძალიან დიდი მნიშვნელობა არ აქვს, საპრეზიდენტო არჩევნებზე მეორე ადგილზე ვინ იქნება. ამ აზრს მხოლოდ იმ შემთხვევაში შეიძლება დავეთანხმოთ, რომ "ქართული ოცნების" რეიტინგი დაეცა, მაგრამ - არც ისე მნიშვნელოვნად. როგორი პარადოქსიც უნდა იყოს, დღეს "ქართული ოცნების" რეიტინგის კლებას ხელს უშლის პარლამენტში "ნაციონალების" აქტიურობა. მაგრამ, იმის თქმა, რომ კოალიციას მეორე ადგილზე ვიღაცის გაყვანა უნდა, არა მგონია სინამდვილეს შეესაბამებოდეს. თუ "ქართულ ოცნებას" რამე უნდა, ამ შემთხვევაში კოალიციის ელიტას ვგულისხმობ, ისაა, რომ არჩევნები ყოველგვარი გაყალბებისა და მაქინაციების გარეშე ჩატარდეს. ეს მისთვის გაცილებით მნიშვნელოვანია, ვიდრე ის, თუ რომელი პოლიტიკური ჯგუფის წარმომადგენელი გავა საპრეზიდენტო არჩევნებზე მეორე ადგილზე.

- ბურჯანაძემ განაცხადა, რომ დაასრულებს "ნაციონალებთან" კოჰაბიტაციას და არჩევნებში გამარჯების შემთხვევაში სააკაშვილს ციხეში ჩასვამს, ვინც წინა ხელისუფლებასთან კოჰაბიტაციის პროცესით უკმაყოფილოა და 1 ოქტომბერს "ქართულ ოცნებას" მისცა ხმა, დიდი ალბათობით ამჯერად მხარს ბურჯანაძეს დაუჭერს. კანდიდატების შანსებზე საუბარი ნაადრევია, მაგრამ ელექტორატის ხმები რომ ისე აღარ განაწილდება, როგორც ეს 1 ოქტომბერს მოხდა, უკვე ცხადია. . .

- აბსოლუტურად გეთანხმებით, რომ ელექტორატის ხმები 1 ოქტომბრის მსგავსად არ გადანაწილდება. ვთქვათ, ბურჯანაძეს ხმები მოუტანა განცხადებებმა იმის თაობაზე, რომ არჩევნებში გამარჯვების შემთხვევაში დაასრულებს კოჰაბიტაციას და ციხეში ჩასვამს სააკაშვილს. ვეჭვობ, ეს განცხადება იმათზე იყოს გათვლილი, ვინც საქმეში მეტ-ნაკლებად ჩახედულია. ხომ უნდა ვიცოდეთ, რომ დღეს პრეზიდენტად არჩეული კაცი მომავალში ბევრ რამეს ვერ გადაწყვეტს. მეორეც, ვინც უნდა იყოს პრეზიდენტი, კოჰაბიტაციას ვერ დაასრულებს. არჩეული პრეზიდენტის უფლებამოსილებაში ეს საკითხები არ შედის.

თუ ბურჯანაძე კონსტიტუციის დარღვევას აპირებს, არ ვიცი, თუ კონსტიტუციის ფარგლებში აპირებს მოქმედებას, მაშინ ამ პროცესებზე ზეგავლენის მოხდენას ვერ შეძლებს. მრჩება შთაბეჭდილება, რომ ჩვენ ჩვენსავე ამომრჩეველს ცუდად ვიცნობთ - რახან "ქართული ოცნების" რეიტინგი არ არის ისეთი, როგორც შარშან და "ნაცმოძრაობას" საზოგადოება უბრალოდ ვერ იტანს, ეს იმას არ ნიშნავს, რომ ამით სხვა მოიგებს. შესაძლოა, ამომრჩეველთა ნაწილი საერთოდ არ წავიდეს არჩევნებზე, მაგრამ საბოლოო სურათს კოალიციის საწინააღმდეგოდ მაინც არ შეცვლის. ოპოზიციამ უნდა ივარგოს ადგილობრივ არჩევნებზე და არ უნდა დაუშვას ერთპარტიული ვერტიკალის შექმნა. მე სწორედ იმის მეშინია დღეს, თუ დღეს მთელი ოპოზიცია თავის რესურს საპრეზიდენტო არჩევნებს შეალევს, საზოგადოება ცუდ დღეში ადგილობრივ არჩევნებზე აღმოჩნდება.

- ბედუკაძესთან დაკავშირებით პროკურორ კბილაშვილს არაერთი განმარტების გაკეთება მოუწია. გასაგებია, რომ პრემიერი ცდილობს არ ჩაერიოს პროკურატურისა და პოლიციის საქმიანობაში, მაგრამ საკმაოდ მნიშვნელოვან თემებზე ახალი ხელისუფლების წარმომადგენლებს სხვადასხვა აზრი აქვთ, საზოგადოების თვალში ახალ ხელისუფლებას ეს ღირსებას არ მატებს, შესაძლოა, პირიქითაც კი იყოს. ამას ხელისუფლება ვერ აცნობიერებს, თუ რა შეიძლება ვიფიქროთ?

- ჩვენ აღმოვჩდით სრულიად მოულოდნელ სიტუაციაში. პრემიერმა საჯაროდ მოუწოდა პროკურორს, გადახედოს თავისი დამოკიდებულება ბედუკაძესთან დაკავშირებით და პროკურორი ამბობს, რომ არ გადახედავს. მართალია, მან უარის თქმას არგუმენტებიც მოაყოლა, მაგრამ, ქართული პოლიტიკის ტრადიციებიდან გამომდინარე, ჩვენთვის ეს უცვეულო იყო. ჩვენთან ხომ სულ ასე იყო - თუ პირველმა თქვა, რომ ნიანგები დაფრინავენ, ისინი დაფრინავენ. კბილაშვილის განცხადებას მოჰყვა ის, რომ ამ საკითხში უმრავლესობაშიც არ ყოფილა ერთიანი პოზიცია და იმაზე საუბარი, რომ გენპროკურორს ბედუკაძე პასუხიმგებლობისგან არ უნდა გაეთავისუფლებინა. ჩემი აზრით, პრემიერს, პროკურორს და უმრავლესობას რომ განსხვავებული მოსაზრებები აქვთ, ნორმალირია და ჩვენ ამას უნდა მივეჩვიოთ.

პრემეირმა არ უნდა იცოდეს და არც ევალება იცოდეს პროცესუალური საკითხები, იცოდეს ყველა ის კანონი, რომელიც გენპროკურატურის საქმიანობას განსაზღვრავს. მესმის, რომ მომხდარმა საზოგადოებაში გაოცება და ცოტა გაკვირვებაც გამოიწვია, მაგრამ, ჩემი დაკვირვებით, არავის არ უთქვამს, რომ პროკურორი პრემიერს არ დაემორჩილა და ამის გამო მოღალატეა. წინა ხელისუფლებების შემთხვევაში პროკურორის მოღალატედ შერაცხვა ჩვეულებრივი ამბავი იქნებოდა. ამიტომ ვამბობ, რომ სხვადასხვა საკითხებზე აზრთა სხვადასხვაობა ნორმალური ამბავია და ამას საზოგადოება უნდა მიეჩვიოს. არც უმრავლესობა უნდა იყოს ყოველთვის ერთ ხმაში მომღერალი და არც უმცირესობა. დემოკრატიულ საზოგადოებაში ერთი გუნდი, ერთის დიქტატს არ ნიშნავს.

- პრეზიდენტმა სააკაშვილმა მთავრობას კატეგორიულად მოთხოვა წარუდგინოს გენპროკურორ კბილაშვილის გადაყენების დოკუმენტი. ძნელი დასაჯერებელი პრეზიდენტი ისეთი გულიბრყვილო იყოს და თავად სჯეროდეს რომ მის მოთხოვნას მთავრობა დააკმაყოფილებს?

- ეს ისევ იმ პიარის ნაწილია, რასაც "ნაცმოძრაობა" ზოგადად ახორციელებს. ახლა ისინი სამართლიანობისა და ადამიანის უფლებების დამცველებად გამოდიან და ავიწყდებათ, რომ სულ ცოტა ხნის წინ ადამიანის უფლებებს არღვევდა, ათას საშინელებებს ჩადიოდნენ. სიმანდვილეში მათ არც ბედიკაძის და არც შეურაცყოფილი პატიმრების ბედი არ აინტერესებთ.

ჩემი აზრით, კბილაშვილთან დაკავშირებით პრეზიდენტისა და "ნაცმოძრაობის" აქტიურობას, პიარის გარდა, კიდევ ერთი მნიშვნელოვანი რამ უდევს საფუძვლად - თუ ბედუკაძე იქნება გათავისუფლებული (რაც ყველამ დაგმო, მაგრამ მე ეს, პოლიტიკური თვალსაზრსიით, ერთადერთი სწორი გადწყვეტილება მგონია), ეს არის შანსი იმისა, რომ ის ადამინები, რომლებიც ნებსით თუ უნებლიეთ, ზეწოლით თუ რაღაც სხვა მექანიზმებით ჩართულნი იყვნენ წინა ხელისუფლების უბედურებებში, ხმას ამოიღებენ და საუბარს დაიწყებენ. ანუ, დაიწყებენ ლაპარაკს იმაზე, რა დანაშაულობები ხდებოდა. ეს "ნაცმოძრაობისთვის" ვებერთელა საფრთხის შემცველია. თუ ბედუკაძის მსგავსად რამოდენიმე ათეულმა ადამიანმა დაიწყო ლაპარაკი, წარმოგიდგენიათ, რა იქნება? სააკაშვილს და "ნაცმოძრაობას" ახლა ის ადარდებთ, ბედუკაძის მსგავსად სხვა ადამიანებმაც არ დაიწყონ მათ დანაშაულობებზე ლაპარაკი.

"ნაციონალებს" იმიტომაც უნდათ დაისაჯოს ბედუკაძე, რომ მათ დანაშაულობებზე საუბარი სხვამ არ დაიწყოს. პარლამენტმა კბილაშვილის კრიტიკა კი არ უნდა დაიწყოს, უნდა მოძებნოს ისეთი სამართლებრივი ფორმა, რომელიც ბედუკაძის მსგავს ადამიანებს მისცემს საშუალებას, თქვან ის, რისი თქმაც შეუძლიათ და ამ ტვირთისგან თავად გათავისუფლდენენ და ჩვენც გაგვათავისუფლონ. ეს კარგი გარანტია იქნებოდა იმისა, რომ ასეთ საშინელებებს არავინ სხვა არ გააკეთებს. ჩემი აზრით, სწორი მიდგომა სწორედ ასეთი მიდგომა იქნებოდა.

- დეპუტატმა უმცირესობიდან აკაკი ბობოხიძემ განაცხადა - "პარტიის ყველა თანამდებობის პირი, მათ შორის სააკაშვილი "ნაცმოძრაობის" თავმჯდომარეობიდან, ხოლო მერაბიშვილი "ნაცმოძრაობის" გენმდივნობიდან უნდა გადადგეს." კოკა გაბაშვილმა დააზუსტა, რომ ამ თემაზე "პარტიას არ უმსჯელია." რა პროცესები ვითარდება "ნაცმოძრაობაში"? როგორც ჩანს, ბაქრაძე კი იქნება "ნაციონალების" კანდიდატი, მაგრამ რატომ რჩება კვლავ უკანა პლანზე გიგა ბოკერია? და კიდევ, ცხადია, რომ "ნაცმოძრაობას" რებრენდინგი სჭირდება, მაგრამ თქვენი ვარაუდით, რა შედეგებით შეიძლება დასრულედეს "ნაციონალების" რებრენდინგი?

- ბობოხიძემ დააზუსტა, რომ მისი განცხადება ეხებოდა არა მარტო სააკაშვილსა და მერაბიშვილს, არამედ მთელ "ნაცელიტას". მაგრამ ეს განცხადება გაკეთდა და ეს იმას ნიშნავს, რომ "ნაცმოძრაობაში" ახალი ეტაპია დაწყებული იმასთან დაკავშირებით, თუ როგორ იმოქმედონ მათ მომავალში. გეთანხმებით, რომ "ნაციონალების" საპრეზიდენტო კანდიდატი ბაქრაძე იქნება, რაც შეეხება გიგა ბოკერიას, ეს ყველაზე საინტერესო საკითხია "ნაციონალებთან" დაკავშირებულ სიტუაციაში. როგორც ჩანს, დასტურდება გავრცელებული მოსაზრება, რომ ბოკერია ჭკვიანი კაცია., "ნაცმოძრაობაში" დაწყებული რღვევის პროცესი ჯერ ბოლომდე არ დასრულებულა და წინ კიდევ მოსალოდნელია კატაკლიზმები, ჭკვიანი ადამიანი არჩევს, ერთი-ორი ნაბიჯით უკან იყოს, დაელოდოს პროცესების, ახალი ბირთვის გამოკვეთას დაელოდოს და შემდეგ, ამ პროცესებს ერთი ან მეორე მიმართულებით კარგი და სასურველი გაგრძელება მოუძებნოს.

იმის გათვალისწინებით, რომ "ნაცმოძრაობას" საკმაოდ კარგი ორგანიზაციული პარტიული სტრუქტურა ყველა ქალაქსა და რაიონში აქვს, ძალიან დიდი მნიშვნელობა აქვს, თუ ვინ იქნება "ნაცმოძრაობის" ფინანსური და ქონებრივი მემკვიდრე. ჭკვიანი კაცი სწორედ ისე მოიქცეოდა, როგორც ბოკერია იქცევა. "ნაცმოძრაობის" საპრეზიდენტო კანდიდატი განწირული ფიგურაა და მნიშვნელობა არა აქვს, არჩევნების შედეგებით რომელ ადგილს დაიკავებს.

- რუსეთის დუმის დეპუტატ გავრილოვის თბილისში ჩამოსვლას დიდი აჟიოტაჟი მოჰყვა. პოლიციასა და დუმის დეპუტატის ვიზიტის გამპროტესტებელ ახალგაზრდებს შორის შეხლა-შემოხლამ ოპოზიციას მისცა საშუალება, ახალი ხელისუფლება კრემლთან დამეგობრებაში დაედანაშაულებინა. როგორც გაირკვა, დუმის დეპუტატები თბილისში წინა ხელისუფლების დროსაც სტუმრობდნენ. . .

- ახლანდელი რეაქცია "ნაცმოძრაობის" ძველი ინერციიდან მოდის, რომლის თანახმადაც, საქართველოს ხელისუფლებაში პრორუსული ხელისუფლებაა მოსული. ეს ერთადერთი თემაა, რომლითაც მას შეუძლია ქვეყნის შიგნით აპელირება, თორემ ქვეყნის გარეთ ამის არავის სჯერა. ამასთანავეა კავშირში ის აქცია, რომელიც ახალგაზრდებმა სტადიონთან გამართეს. გულრწფელად ვამბობ, ძალიან კარგია, რომ ეს აქცია გაიმართა ლოზუნგით - "ოკუპანტებო, გაეთრიეთ", მაგრამ ამასთანავე ძალიან კარგი იქნება, თუ ასეთი აქციები არ იქნება მიბმული "ნაცმოძრაობის" ლიდერებთან და იქ არ დავინახავთ "ნაცმოძრაობის" ცნობად სახეებს. საზოგადოების საკმაოდ დიდ ნაწილს ამგვარი კარგი აქციების მიმართ ცუდი რეაქცია მხოლოდ იმის გამო უყალიბდება, რომ "ნაციონალებისადმი" დამოკიდებულება ყველასათვის ცხადია.

კობა ბენდელიანი

"ინტერპრესნიუსი"