დედაქალაქის "გასაგრილებელი" ადგილები
კუს ტბა
კუს ტბა აქტუალობას წელიწადის არც ერთ სეზონზე არ კარგავს. ჯანსაღი ცხოვრების მოყვარულები სავარჯიშოდ უპირატესობას სწორედ კუს ტბას ანიჭებენ. ზაფხულის დადგომისთანავე თბილისის ცენტრში მდებარე დასასვენებელ ადგილს უამრავი ადამიანი სტუმრობს გასარუჯად და გასაგრილებლად. დამსვენებლებს აქ კომფორტულად მოწყობილი პლაჟი და ღია საზაფხულო კაფე-ბარები ელის. ბავშვებისთვის კი მოწყობილია ხელოვნურსაფარიანი მოედნები და ატრაქციონები. შეგიძლიათ წყლის ველოსიპედით გასეირნება, რომლის დაქირავებაც ნახევარი საათით 7 ლარი ღირს.
თბილისის ზღვა
თბილისის ზღვაზე გარუჯვა და ცურვა ყველას შეუძლია, მაგრამ სანაპირო ზოლის დიდი ნაწილი დაბინძურებულია. ამის მიუხედავად ზაფხულის სიცხეს აქ თავს უამრავი ადამიანი აფარებს. თბილისის ზღვის კლუბი მომხმარებელს წყლის სპორტისა და გართობის სრულ სერვისს სთავაზობს. კლუბის ერთდღიანი აბონემენტის ფასი 15-დან 20 ლარამდე მერყეობს.
ლაგუნა ვერე
ლაგუნა ვერეს სპორტულ-გამაჯანსაღებელი ცენტრი 33 წელზე მეტს ითვლის. კომპლექსი აღჭურვილია თანამედროვე ტექნიკით, ფუნქციონირებს სატრენაჟორო და აერობიკის დარბაზები, სილამაზის სალონი, კაფე-ბარები, მაღაზიები. ერთჯერადი აბონემენტის ფასი 15 ლარია.
ლისის ტბა
ლისის ტბა ქალაქის ერთ-ერთი ყველაზე პოპულარული და განვითარებული სარეკრეაციო ზონაა. ტბის მიმდებარე ტერიტორია გამოირჩევა მრავალფეროვანი ფაუნით. აქვე მოწყობილია სარბენი და ველობილიკები, საბავშვო მოედნები, ღია კაფეები.
ვაკის აუზი
თბილისში არსებული დასასვენებელი და გამაჯანსაღებელი ადგილებიდან ყველაზე ძვირადღირებული ვაკის აუზია. კლიენტს შეუძლია ისარგებლოს აუზით, საუნით, ჯაკუზით და სატრენაჟორო დარბაზით. აუზი დახურულია, თუმცა გარუჯვა შესაძლებელია ვერანდაზე. ვაკის აუზზე ერთჯერადად შესვლა 90 ლარი ღირს.
მარი მგელაძე
ყოველკვირეული გაზეთი "ყველა სიახლე"
(გამოდის ოთხშაბათობით)
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
