82 წლის იულია სმირნოვა თავის კატებს შვილებივით უვლის. ის მათ ექიმებს ეძახის და ამ ასაკამდე მოღწევას სწორედ ამ კატებს უმადლის. უკვე 16 წელია მეეზოვედ მუშაობს და ეზოშიც რამდენიმე კატას პატრონობს.
- რუსეთში, ქალაქ კალინინში დავიბადე, ძალიან მშრომელი ოჯახი მყავდა. სახლში ბევრი შინაური ფრინველი და ცხოველი გვყავდა და ბავშვობიდანვე შემიყვარდა მათი მოვლა. ჩემს ცხოვრებაზე შეიძლება წიგნიც კი დაიწეროს, იმდენი რამ მაქვს გამოვლილი. მამა ომში დამეღუპა, დედა - ავადმყოფობით, 6 წლით უმცროსი და მყავდა და ოჯახში ყველაფერს მე ვაკეთებდი. ჩემი მომავალი მეუღლე მუშა იყო - ომის შემდეგ დანგრეული ქალაქის მშენებლობაში მონაწილეობდა, მოკლედ, გავთხოვდი და საქართველოში გამოვემგზავრეთ.
- თბილისში ჩამოხვედით?
- არა, კახეთში, ძალიან კარგი დედამთილი შემხვდა, მართლა დედასავით შემაყვარა თავი, მაგრამ მაზლებმა და მათმა ცოლებმა ცხოვრება გამიმწარეს. ჩემი ქმარიც ზარმაცი იყო, მუშაობა არ უყვარდა. კოლმეურნეობის თავმჯდომარემ მე და ჩემს ქმარს სამსახური შემოგვთავაზა, მაგრამ ჩემმა ქმარმა არ ისურვა. არ იმუშავეთ და ქალაქში წადითო - გვიპასუხა თავმჯდომარემ. მაშინ ზედმეტ ხალხს 3 წლით ქალაქში სამუშაოდ გზავნიდნენ. მას შემდეგ აქ ვარ. ქმარს 50-წლიანი თანაცხოვრების მერე დავშორდი და ასე ცალ-ცალკე ვცხოვრობთ, 2 შვილი მყავს, მაგრამ ბიჭი მოსკოვშია, გოგოს არ ვჭირდები. ვცხოვრობ მარტო ჩემს კატებთან ერთად, ესენი ჩემი ოჯახის წევრები არიან
- მეეზოვედ მუშაობა როდიდან დაიწყეთ?
- უკვე 16 წელია აქაურობას ვალაგებ. თავი რაღაცით ხომ უნდა მერჩინა? მანამდე არაყს ვყიდდი. ერთხელაც ერთი კაცი მოვიდა და მითხრა, სამსახური თუ გინდა, დამლაგებელი გვჭირდება, ოღონდ მერე არაყს ვერ გაყიდიო. გამიხარდა და დავთანხმდი. მას შემდეგ ვალაგებდი შარდენის და ლესელიძის ქუჩებს, ახლა ყოველდღე ამ ბაღში ვარ. ძალიან მიყვარს შრომა, უსაქმოდ ყოფნა არ შემიძლია, თან ორ კაპიკს ვშოულობ, რომ ჩემი კატები ვარჩინო.
- სულ რამდენი კატა გყავთ?
- სულ 14, 10 დიდი და 4 კნუტი.
- ამ კატებმა როდიდან დაიდეს თქვენთან ბინა?
- ქუჩაში პატარა კნუტებს რომ ვხედავ, მებრალებიან, რა ვქნა? ასე ვიპოვე ტიგრიკაც. სულ პაწაწინა იყო, ჯიბეში ჩავისვი და სახლში წავიყვანე, მერე ლედის გადავაწყდი. ყველა ჩემი კატა მათი შთამომავალია. ტიგრიკამ 10 წელი იცოცხლა და ავადმყოფობამ მოკლა. ლედის კიბო აღმოაჩნდა, ძალიან იტანჯებოდა საწყალი და დავაძინე, არ შემეძლო მისი ტანჯვისთვის მეყურებინა. მარგუშაც შარდენზე ვიპოვე, სულ ფეხს ურტყამდნენ. შემებრალა, წამოვიყვანე, დავბანე, ტილებისა და რწყილებისგან გავათავისუფლე და დღეს უკვე 16 წლისაა.
- სამუშაოდან დაბრუნებულს როგორ გხვდებიან ოთხფეხა ოჯახის წევრები?
- ოოო, გააჩნია რა ჩაიდინეს (იცინის). თუ რამე აქვთ დაშავებული, გასაღების გაჩხაკუნებისთანავე ლოგინის ქვევით იმალებიან და ხმას არ იღებენ. თუ არადა, კნავილით შემომეხვევიან ხოლმე. ჩემთვის შვილებივით არიან, სახლში მოსულს ამათი თამაში და ყურება მაძლებინებს, მოვლენ და მეფერებიან ხოლმე. მე რომ 82 წლის ასაკში ცოცხალი ვარ, ესეც მათი დამსახურებაა, ისინი ჩემი ექიმები არიან. როგორც კი დავწვები, მაშინვე ერთი ფეხებში დამიწვება, მეორე მხარზე, მესამე თავზე, თვითონ ხვდებიან, რა მტკივა და მათი სითბო წამალივით მშველის. წლებია წნევას არ შევუწუხებივარ.
მაკა ქობალია
ყოველკვირეული გაზეთი "ყველა სიახლე"
(გამოდის ოთხშაბათობით)