შსს-მ ცრუ შეტყობინების ბრალდებით დაკავებულ პირზე ოფიციალური განცხადება გაავრცელა

შსს-მ ცრუ შეტყობინების ბრალდებით პირის დაკავების შესახებ ოფიციალური განცხადება გაავრცელა. სამინისტროს ინფორმაციით, 1942 წელს დაბადებული, ქუთაისში მცხოვრები ომარ ფ. იმერეთის, რაჭა-ლეჩხუმისა და ქვემო სვანეთის სამხარეო მთავარი სამმართველოს თანამშრომლებმა დააკავეს.

ბრალდებულმა 26 ივლისს, 15:00 საათზე, შინაგან საქმეთა სამინისტროს გადაუდებელი დახმარების ოპერატიული მართვის ცენტრ 112-ში დარეკა და განაცხადა, რომ ქუთაისში, პარლამენტის შენობა აფეთქდებოდა.

შსს-ს ცნობით, სამართალდამცველები შეტყობინებიდან რამდენიმე წუთში გამოცხადდნენ ადგილზე. მათ შენობიდან დეპუტატებისა და პერსონალის ევაკუაცია განახორციელეს, პერიმეტრი კი ამკრძალავი ლენტით შემოისაზღვრა.

როგორც სამინისტროში განმარტავენ, ადგილზე, შესაბამისი წესების დაცვით, შსს-ს გამნაღმველთა სამსახურმა და კინოლოგებმა იმუშავეს. დაახლოებით ერთ საათიანი მუშაობის შედეგად პარლამენტის შენობაში ბომბის არსებობა არ დადასტურდა.

გამოძიება მიმდინარეობს ტერორიზმის შესახებ ცრუ შეტყობინების ფაქტზე (სსსკ-ის 331-ე მუხლით).

"ინტერპრესნიუსი"