პედაგოგთა უმრავლესობამ სასერტიფიკაციო გამოცდაზე ბარიერი ვერ გადალახა

პედაგოგთა უმრავლესობამ სასერტიფიკაციო გამოცდაზე ბარიერი ვერ გადალახა. როგორც "ინტერპრესნიუსს" გამოცდების ეროვნული ცენტრის ხელმძღვანელმა მაია მიმინოშვილმა განუცხადა, სასერტიფიკაციო გამოცდების შედეგები ძალიან ცუდია, რადგან იმ პედაგოგების რაოდენობა, რომლებმაც ბარიერის გადალახვა ვერ მოახერხეს, ნამდვილად ძალიან მაღალია. მისი თქმით, შედეგებით იგი შეშფოთებულია.

მისი თქმით, შედეგები ყველა საგანში არ არის ცნობილი, გამოქვეყნებულია მხოლოდ ქიმიის, ფიზიკის, ბიოლოგიის, ისტორიის, გეოგრაფიის, მათემატიკის, სამოქალაქო განათლებისა და სახვითი ხელოვნების შედეგები. მიმინოშვილის ინფორმაციით, ფიზიკაში ბარიერი ვერ გადალახა პედაგოგების 96%-მა, ქიმიაში 82%-მა და ანალოგიური ვითარებაა მათემატიკაში.

რაც შეეხება ისტორიას, მისი განცხადებით, ამ საგანში ბარიერი პედაგოგთა 57%-მა, გეოგრაფიაში - 49%-მა, ბიოლოგიაში - 77%-მა, სამოქალაქო განათლებაში - 82%-მა, სახვით ხელოვნებაში კი - 74%-მა ვერ გადალახა. როგორც მიმინოშვილმა აღნიშნა, ამ პედაგოგებს კიდევ აქვთ შესაძლებლობა მომავალ წელს გავიდნენ გამოცდაზე.

"ალბათ ძალიან სერიოზულად უნდა დავფიქრდეთ ამ შედეგზე და ასე მარტივად არ უნდა მივუდგეთ ამ საკითხს. პირველ რიგში პედაგოგი არ უნდა დავადანაშაულოთ იმაში, რომ ვერ მოახერხეს ბარიერის დაძლევა. მას ყველა პირობა უნდა შეექმნას იმისთვის, რომ მოახერხოს კვალიფიკაციის ამაღლება, მოტივაცია გაუჩნდეს და ასე შემდეგ", - აღნიშნა მან.

"ინტერპრესნიუსი"