შსს-მ საბრძოლო მასალა და ასაფეთქებელი მოწყობილობა ამოიღო

შინაგან საქმეთა სამინისტროს ბორჯომის რაიონული სამმართველოს თანამშრომლებმა საბრძოლო მასალის და ასაფეთქებელი მოწყობილობის უკანონო შეძენა-შენახვა-ტარების ბრალდებით ერთი პირი დააკავეს.

შსს-ს ცნობით, სამართალდამცველებმა, ვლადიმერ ე. ბორჯომის რაიონის დაბა ახალდაბაში იმ დროს დააკავეს, როდესაც მას ჩანთით უკანონო საბრძოლო მასალა და ასაფეთქებელი მოწყობილობა გადაჰქონდა.

სამინისტროს ცნობით, მისი პირადი ჩხრეკისას ამოიღეს: კუმულაციური ტანკსაწინააღმდეგო ხელყუმბარის "ერ-კა-გე-ზე-ემ"-ის 3 კორპუსი, ავტომატური ცეცხლსასროლი იარაღის 23 საბრძოლო ვაზნა და ტანკსაწინააღმდეგო ყუმბარის "ერ-კა-გე-ზე-ემ"-ის 2 კაფსულა-დეტონატორი (ამფეთქი).

გამოძიება საბრძოლო მასალის და ასაფეთქებელი მოწყობილობა უკანონო შეძენა-შენახვა-ტარების ფაქტზე მიმდინარეობს, რაც სსსკ-ის 236-ე მუხლის 1-ლი და მე-2 ნაწილებით არის გათვალისწინებული.

"ინტერპრესნიუსი"