გადადის თუ არა ზოოპარკი თბილისის ზღვაზე
დედაქალაქის მერია ერთხანს თბილისის ზოოპარკის ქალაქგარეთ გადატანას აპირებდა, თუმცა შემდეგ ეს თემა ყველას მიავიწყდა. "ყველა სიახლე" დაინტერესდა, ზოოპარკის გადატანა კვლავ დგას თუ არა დღის წესრიგში და აღნიშნულ თემაზე სასაუბროდ ზოოპარკის დირექტორ ზურაბ გურიელიძეს მივმართეთ.
- ახლახან ზოოპარკს თბილისის ზღვის ახლოს 30 წლით, უზუფრუქტით გადაეცა ტერიტორია. ზოოპარკის გადატანა ძალიან ძვირადღირებული და რთული საქმეა, რის საშუალებაც დღესდღეობით არ გვაქვს. თუ დამფინანსებელი გამოგვიჩნდება, მაშინ სხვა საქმეა. თუმცა, ამისთვის იმდენად დიდი თანხაა საჭირო, რომ დაფინანსების მოპოვება მეტად საეჭვოა. რადგან ამჟამად ძალიან ბევრი ცხოველი გვყავს, გადავწყვიტეთ მათი ის ნაწილი, რომელიც დამთვალიერებლისთვის ნაკლებად საინტერესოა, თბილისის ზღვაზე გადავიყვანოთ. მაგალითად, გვყავს 17 დათვი და მათი უმეტესობის გადაყვანას იქ ვაპირებთ. ყველაზე მნიშვნელოვანი ვოლიერების მოწყობაა. მსოფლიოს ყველა ქვეყანაში არსებობს ე.წ. სითი ზოოპარკები, ისინი ქალაქის ცენტრში მდებარეობს, მაგრამ თითოეულს ქალაქგარეთ დიდი ტერიტორია აქვს, სადაც სამეცნიერო სამუშაოებს ეწევიან. ზოოპარკის ამოცანა უნდა იყოს სხვადასხვა სახეობის ცხოველებისა თუ ფრინველების შეძენასა და გადარჩენაზე მუშაობა და არა შოუს მოწყობა. აქაც ზუსტად ასეთი მოდელის დამკვიდრებას ვაპირებთ. ეს უკვე დღის წესრიგშია და ტერიტორიის ათვისებას ნოემბერში დავიწყებთ. უამრავი სახის ზოოპარკი არსებობს და ყველას აქვს ფუნქციონირების უფლება, თუ იქ გარკვეული საერთაშორისო წესებია დაცული. ჩვენი ზოოპარკი უკვე მესამე წელია, "ევროპის აკვარიუმებისა და ზოოპარკების ასოციაციის" წევრობის კანდიდატია. წესით კანდიდატი 5 წლის განმავლობაში უნდა იყო, 2 წელიწადში კი შესაძლოა "ეაზას" სრულუფლებიანი წევრი გავხდეთ. მათი წარმომადგენელი წელიწადში ორჯერ ჩამოდის და გვიმოწმებს, თუ როგორ ვმუშაობთ, ტერიტორიაზე ყველაფერს აკონტროლებს. ასე რომ, ვიცით, სწორი გზით მივდივართ. რასაკვირველია, ჯერჯერობით ყველა ვოლიერი ვერ აკმაყოფილებს მოთხოვნებს. შეუძლებელია, ეს ერთი ხელის დაკვრით გაკეთდეს. ცნობილია, რომ ზოოპარკის მთლიანად აღორძინებას საშუალოდ, 10 წელი სჭირდება. ჩვენ კი 7 წლის განმავლობაში საკმაოდ ბევრი რამ გავაკეთეთ.
- ცხოველებზე რაიმე ფორმით თუ აისახება ის, რომ მათ დიდი სივრცე არა აქვთ?
- ფართობი საკმაოდ მნიშვნელოვანია, მაგრამ არა გადამწყვეტი, როგორც ბევრს ჰგონია. ამიტომ საჭიროა საზოგადოებამ იცოდეს, რა როგორ და რატომ კეთდება. არ უნდა იფიქრონ, რომ ჩვენ ბოროტი ადამიანები ვართ და გვსიამოვნებს, როცა ცხოველები პატარა ტერიტორიაზე გვყავს გამოკეტილი. არსებობს სტანდარტები და ჩვენი ზოოპარკი ამ სტანდარტებს აკმაყოფილებს. ძალიან ბევრი რამ მხოლოდ ვიზიტორებისთვის კეთდება, მათთვის განკუთვნილი, ასე ვთქვათ, ეფექტები კი ძალიან ძვირი ჯდება. ჩვენი მიზანი თავიდანვე ცხოველებისთვის ნორმალური პირობების შექმნა იყო, რასაც მივაღწიეთ და ამის დასტური ცხოველების გამრავლების ტემპია, ის კი ძალიან მაღალია. საერთაშორისო დამკვირვებლებისგანაც კარგ შეფასებებს ვიღებთ. ნებისმიერ ზოოპარკში, ცხოველს რამხელა თავისუფალი სივრცეც არ უნდა ჰქონდეს, მოწყენილი იქნება, თუ ვოლიერში გარკვეული სამუშაოები არ ჩატარდა. ამას გარემოს გამდიდრება ეწოდება და საკმაოდ რთული პროცესია, რადგან შეიძლება რაღაც სხვა ზოოპარკიდან გადმოიღო, მაგრამ ჩვენთან ამან არ იმუშაოს. ამიტომ ხდება ცხოველებზე დაკვირვება და ამის მიხედვით ვმოქმედებთ. რაც შეეხება აქტივობის დონეს, გააჩნია, ადამიანი როდის მოდის ზოოპარკში. პიკის საათებში ცხოველები, რა თქმა უნდა, ძილს არჩევენ, ეს სიცხის დროს ბუნებრივია. ისინი ძალიან აქტიურები არიან დილით და საღამოს. ამას გარდა, ცხოველს დამალვის შესაძლებლობა უნდა ჰქონდეს. ადამიანისთვისაც აუტანელია, როცა ყველა მას უყურებს და ერთი სული აქვს, მყუდროება მოიპოვოს. საჭიროა ცხოველსაც ჰქონდეს შესაძლებლობა, როცა მოესურვება, თვალს მოეფაროს, ჰოდა ჩვენს ზოოპარკშიც ასეა.
ეკა აბაშიძე
ყოველკვირეული გაზეთი "ყველა სიახლე"
(გამოდის ოთხშაბათობით)
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
